ការនាំចេញកៅស៊ូកម្ពុជា រកចំណូលបានជាង ២០០លានដុល្លារ កើនឡើងជិត ៤០ភាគរយ

កម្ពុជា រកចំណូលបានពីការនាំចេញជ័រកៅស៊ូ និងផលិតផលធ្វើពីកៅស៊ូ បានចំនួនប្រមាណជាង ២០០លានដុល្លារ មានការកើនជាង ៣៨ភាគរយ បើធៀបនឹងរយៈពេលដូចគ្នាក្នុងឆ្នាំ២០២២ សម្រេចបានតែជាង ១៤៩លានដុល្លារប៉ុណ្ណោះ។ នេះបើតាមរបាយការណ៍រយៈពេល ៤ខែ ឆ្នាំ ២០២៣ របស់អគ្គនាយកដ្ឋានគយ និងរដ្ឋាករកម្ពុជា។

យោងតាមតារាងរបាយការណ៍អគ្គនាយកដ្ឋានគយ និងរដ្ឋាករកម្ពុជា បានបង្ហាញថា ការនាំចេញនៅក្នុងខែ មេសា ឆ្នាំ ២០២៣ សម្រេចបានទឹកប្រាក់ជាង ៣៨លានដុល្លារ កើនឡើង ២០ភាគរយ បើធៀបនឹង ខែមេសា ឆ្នាំ ២០២២ បានតែជាង ៣២ ភាគរយ។

គិតត្រឹមឆ្នាំ២០២២ កម្ពុជាមានផ្ទៃដីដាំដំណាំកៅស៊ូសរុបចំនួនជាង ៤០ម៉ឺនហិកតា ក្នុងនោះ ផ្ទៃដីចៀរជ័រមានចំនួន ៣១០ ១៩៣ហិកតា ស្មើនឹង៧៧ភាគរយ និងផ្ទៃដីថែទាំមានចំនួន ៩៣ ៨៥១ហិកតា ស្មើនឹង២៣ភាគរយ។ ចំណែកឯទីផ្សារសំខាន់ៗ ក្នុងការនាំចេញកៅស៊ូរបស់កម្ពុជា មានដូចជា ប្រទេសវៀតណាម ម៉ាឡេស៊ី ចិន សិង្ហបុរី ជប៉ុន កូរ៉េ និងសហគមអឺរ៉ុបជាដើម។

សូមបញ្ជាក់ថា កាលពីឆ្នាំ ២០២២ កម្ពុជា បានរកចំណូលពីការនាំចេញកៅស៊ូធម្មជាតិ និងផលិតផលកៅស៊ូបានប្រមាណ ៥៤១. ៦៦ លានដុល្លារ មានការកើនឡើង ២៨,៣ ភាគរយ បើធៀបនឹងឆ្នាំ ២០២១ បើទោះបីជាមានស្ថានភាពមិនល្អ រួមទាំងការធ្លាក់​ចុះនៃតម្លៃកៅស៊ូធម្មជាតិយ៉ាងណាក្តី៕