ព័ត៌មានជាតិ
Beyond The Games ប្រគល់ថវិកា៥០០លានរៀលដល់គណៈកម្មាធិការជាតិប៉ារ៉ាឡាំពិកកម្ពុជា
នៅថ្ងៃចន្ទនេះ យុទ្ធនាការ Beyond The Games នៃសហភាពសហព័ន្ធយុវជនកម្ពុជាបានប្រគល់ថវិកាជាផ្លូវការចំនួន ៥០០ លានរៀលដល់គណៈកម្មាធិការជាតិប៉ារ៉ាឡាំពិកកម្ពុជា។ ថវិកានេះ គឺទទួលបានពីការបរិច្ចាគរបស់វិស័យឯកជនក្រោមការបំបែកឯតទគ្គកម្ម«បេះដូងច្រើនជាងគេលើពិភពលោក»។
បើតាមលោក សុខ សប្បាយណា ប្រធានប្រតិបត្តិយុទ្ធនាការ Beyond The Games គឺកាលពីអំឡុងខែមេសា ឆ្នាំ ២០២៣ កម្ពុជាបានបំបែកឯតទគ្គកម្ម«បេះដូងច្រើនជាងគេលើពិភពលោក»ប្រកបដោយភាពជោគជ័យដែលមានចំនួន បេះដូងប្រមាណជិត៤លានបេះដូង។
លោក សុខ សប្បាយណា លើកឡើងថា ការបំបែកឯតទគ្គកម្មបេះដូងច្រើនជាងគេលើពិភពលោកនេះ ជាការបង្ហាញពីទំហំទឹកចិត្ត និងសេចក្តីស្រលាញ់គាំទ្រដល់អត្តពលិកកម្ពុជាដែលបានខិតខំហ្វឹកហាត់តំណាងជាតិមាតុភូមិ ហើយតាមរយៈបេះដូងទាំងនេះ ក៏ជាកម្មវត្ថុក្នុងការស្វែងរកថវិកា ដើម្បីជូនទៅអត្តពលិកមានពិការភាព ក្រោមការសម្របសម្រួលរបស់យុទ្ធនាការ Beyond The Games និងដៃគូបរិច្ចាគចំនួន៥។
ក្នុងពិធីប្រគល់ថវិកាជាផ្លូវការ នៅថ្ងៃទី២៩ ខែឧសភានេះ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានថ្លែងថា យុទ្ធនាការ Beyond The Games ជាវេទិកាក្នុងការផ្សារភ្ជាប់សាធារណជនជាមួយនឹងអត្តពលិកដែលមានពិការភាព ក៏ដូចជាវិស័យឯកជន ឬសប្បុរសជន ដើម្បីរួមគ្នាឧបត្ថម្ភថវិកាដល់គណៈកម្មាធិការប៉ារ៉ាឡាំពិកកម្ពុជា ជាពិសេស ការបង្ហាញ និងបញ្ជាក់ពីទឹកចិត្តគាំទ្ររបស់ប្រជាជនដល់អត្តពលិកកម្ពុជាក្នុងព្រឹត្តិការណ៍កីឡាអាស៊ានប៉ារ៉ាហ្គេម ដែលកម្ពុជាធ្វើជាម្ចាស់ផ្ទះ។
ទន្ទឹមគ្នានេះ ឯកឧត្តម ហ៊ុន ម៉ានី សង្ឃឹម និងជឿជាក់ទុកចិត្តយ៉ាងមុះមុតលើការខិតខំប្រឹងប្រែង និងសមត្ថភាពរបស់អត្តពលិកជាជនពិការកម្ពុជាក្នុងការប្រកួតកីឡាអាស៊ានប៉ារ៉ាហ្គេម នៅពេលខាងមុខ ហើយឯកឧត្តម បានបញ្ជាក់ថា ទាំងរាជរដ្ឋាភិបាល ទាំងឯកឧត្តមផ្ទាល់ ព្រមទាំងប្រជាជនកម្ពុជាជាង១៧លាននាក់ នៅតែបន្តគាំទ្រ និងមានមោទនភាពចំពោះអត្តពលិកកម្ពុជា បើទោះបីជាលទ្ធផលនៃការប្រកួតយ៉ាងណាក៏ដោយ។
ក្នុងឱកាសនោះ លោក យី វាសនា អគ្គលេខាធិការនៃគណៈកម្មាធិការជាតិប៉ារ៉ាឡាំពិកកម្ពុជាបានថ្លែងអំណរគុណចំពោះឯកឧត្តម ហ៊ុន ម៉ានី និងដៃគូឧបត្ថម្ភទាំង៥ ក៏ដូចជាក្រុមការងារនៃយុទ្ធនាការ Beyond The Games ដែលបានផ្ដល់ការគាំទ្រ លើកទឹកចិត្ត និងការចូលរួមចំណែកជួយឧបត្ថម្ភទាំងថវិកា-សម្ភារៈដល់អត្តពលិកជនពិការកម្ពុជានៅពេលនេះ។ តាមរយៈនេះ លោក យី វាសនា បានប្ដេជ្ញាចិត្ត និងសន្យាប្រើប្រាស់ថវិកានេះទៅតាមលទ្ធផលជាក់ស្ដែងក្នុងការទ្រទ្រង់ និងទិញសម្ភារៈបច្ចេកទេសផ្សេងៗដើម្បីជាផលប្រយោជន៍រួមដល់អត្តពលិកពិការភាពកម្ពុជា៕
ដោយ៖ ធឿន វ៉ាន់សុង
-
ចរាចរណ៍៦ ថ្ងៃ ago
បើករថយន្តវ៉ាជែងក្នុងស្ថានភាពគ្រោះថ្នាក់ ក្រឡាប់របួសធ្ងន់ស្រាលជាង១០នាក់
-
ព័ត៌មានជាតិ៥ ថ្ងៃ ago
កម្ពុជា អាចនឹងមានភ្លៀងធ្លាក់លាយឡំជាមួយខ្យល់កន្ត្រាក់ចាប់ពីថ្ងៃទី១៨ ដល់២០មេសា
-
ព័ត៌មានជាតិ១ ថ្ងៃ ago
គេហទំព័រ Weather៖ សប្តាហ៍នេះ កម្ពុជា នឹងក្តៅខ្លាំង ឈានដល់កម្រិតគ្រោះថ្នាក់ ៤០អង្សាសេ
-
ព័ត៌មានជាតិ៦ ថ្ងៃ ago
តួលេខផ្លូវការ ទេសចរដើរលេងចូលឆ្នាំមានជាង ២១ លាននាក់ និងខេត្តចំនួន ៥ ឈានមុខគេ
-
សន្តិសុខសង្គម៤ ថ្ងៃ ago
មកដឹងពីចម្លើយសារភាពរបស់ជនដៃដល់ដែលចាក់សម្លាប់នារីរងគ្រោះក្នុងបុរីឈូកវ៉ា២
-
ព័ត៌មានអន្ដរជាតិ៥ ថ្ងៃ ago
ក្រុមហ៊ុន Toyota នៅ ជប៉ុន ប្រមូលរថយន្ត Prius ជុំវិញពិភពលោក ចាប់ពីសេរ៊ីឆ្នាំ ២០២២ ឡើងទៅចូលរោងចក្រវិញ
-
សេចក្ដីជូនដំណឹង១ ថ្ងៃ ago
ចូលឆ្នាំខ្មែរបានសប្បាយជួបជុំហើយ បានទាំងរង្វាន់ពីគ្រុឌឈ្នះផ្អើលពេញភូមិ
-
សន្តិសុខសង្គម៥ ថ្ងៃ ago
ព័ត៌មានបឋម៖ ចូលចាក់សម្លាប់ស្ត្រីម្នាក់ដល់ក្នុងផ្ទះ រួចអារកសម្លាប់ខ្លួនឯងតាមក្រោយ