ព័ត៌មានជាតិ

ប.ស.ស ចុះប្រមូលទិន្នន័យបញ្ហាសុខភាពកម្មករក្នុងសហគ្រាសមួយចំនួន នៅខេត្តព្រៃវែង

បានផុស

៣ years មុន

នៅ

ថ្ងៃចន្ទ ៥ មិថុនា ២០២៣

ដោយ

ក្រុមការងារការិយាល័យបង្ការសុខភាព នៃនាយកដ្ឋានសេវាមូលដ្ឋានសុខាភិបាល នៃ ប.ស.ស កាលពីពេលថ្មីៗនេះ បានចុះប្រមូលទិន្នន័យបញ្ហាសុខភាពរបស់សមាជិក ប.ស.ស នៅសហគ្រាសចំនួន ០២ ក្នុងខេត្តព្រៃវែង គឺ សហគ្រាស ថបស៊ីលវើរ លីមីតធីត ស្រុកស្វាយអន្ទរ និងសហគ្រាស អរិន មេនូហ្វេកធើរីង(ខ្មែរ) លីមីតធីត ដើម្បីចាត់វិធានការបង្ការ និងថែទាំសុខភាពផ្ទាល់ខ្លួន និងការព្យាបាលទាន់ពេលវេលា។

បើតាមក្រុមការងារការិយាល័យបង្ការសុខភាព បានឲ្យដឹងថា ក្នុងការចុះប្រមូលទិន្នន័យបញ្ហាសុខភាពនេះ ជាការតាមដានស្ថានភាពសុខភាពរបស់សមាជិក ប.ស.ស ដោយផ្ទាល់ តាមរយៈស្ថានភាពការងារជាក់ស្ដែងពាក់ព័ន្ធបរិស្ថានក្នុងសហគ្រាស ដូចជាខ្យល់ពុល ឥទ្ធិពលពីកាកសំណល់ សម្ភារៈមានជាតិពុល បរិយាកាសការងារអាចពាក់ព័ន្ធនឹងគ្រោះថ្នាក់ដល់សុខភាព ដែលនេះជាមូលដ្ឋានសម្រាប់ការគ្រប់គ្រងការថែទាំលើកកម្ពស់ស្ថានភាពសុខភាព ព្រមទាំងបង្ការគ្រោះថ្នាក់ និងជំងឺឆ្លងផ្សេងៗ អាចនឹងកើតមាន ជាពិសេសដើម្បីចាត់វិធានការបង្ការជាអាទិភាពសម្រាប់អ្នកជំងឺឲ្យទទួលបានការថែទាំសុខភាពផ្ទាល់ខ្លួន និងការព្យាបាលទាន់ពេលវេលា។

ក្រុមការងារការិយាល័យបង្ការសុខភាព ក៏បានអំពាវនាវដល់កម្មករនិយោជិតទាំងអស់ ត្រូវយកចិត្តទុកដាក់លើការថែរក្សាបរិស្ថាន ការបរិភោគទឹកឲ្យបានត្រឹមត្រូវ និងរក្សាអនាម័យម្ហូបអាហារសម្រាប់សុខភាពខ្លួនផ្ទាល់ ជាពិសេសចូលរួមសិក្សាស្វែងយល់បន្ថែមអំពីសុខភាពអនាម័យ និងការរស់នៅស្អាត ដែលបង្កឡើងដោយបរិស្ថាន និងសុខភាពសាធារណៈ៕

អត្ថបទ ៖ សំអឿន