លោក ជា ចាន់តូ៖ វិស័យពុទ្ធចក្រ និងអាណាចក្រ ត្រូវដើរទន្ទឹមគ្នា និងពឹងគ្នាទៅវិញទៅមក

លោក ជា ចាន់តូ ទេសាភិបាល ធនាគារជាតិនៃកម្ពុជា បានមានប្រសាសន៍ថា ពុទ្ធចក្រ និងអាណាចក្រ ត្រូវដើរទន្ទឹមគ្នា ពឹងគ្នាទៅវិញទៅមក និងជួយទំនុកបម្រុងគ្នាទៅវិញទៅមក។

ថ្លែងក្នុងពិធីបុណ្យឆ្លង ព្រះវិហារវត្តបារាយណ៍ជាន់ដែកនៅភូមិបារាយណ៍ជាន់ដែក ឃុំបល្ល័ង្ក ស្រុកបារាយណ៍ ខេត្តកំពង់ធំ នៅថ្ងៃទី១១មិថុនានេះ លោក ជា ចាន់តូបានបន្តថា ពុទ្ធចក្រជួយផ្នែកស្មារតី ផ្នែកខាងទស្សនវិជ្ជាដោយសារមានពុទ្ធចក្រទើបអាណាចក្រអាចរុងរឿងបាន។ ជាមួយគ្នានេះ ពុទ្ធចក្រក៏ពឹងពាក់ និងផ្ញើលើរដ្ឋអំណាចផងដែរ ក្នុងនោះដោយ​សារ​មានសុខសន្តិភាព ស្ថិរភាពនយោបាយ និងការអភិវឌ្ឍសេដ្ឋកិច្ច និងសង្គមនេះហើយទើបជំនឿសាសនាមានភាពរុងរឿង។ ជាក់ស្តែង ក្នុងរបបប៉ុលពត ខ្មែរក្រហមបានបំផ្លាញចោលស្ទើរទាំងសុ្រងនូវរចនាសម្ព័ន្ធក្នុងវិស័យអាណាចក្រនិងពុទ្ធចក្រ ទាំងអគារ ទីផ្សារ រោងចក្រ សាលារៀន វត្តអារាម សាលាបាលី និងព្រះវិហារជាដើម ។

លោក ជា ចាន់តូ បានបន្តទៀតថា ខ្មែរក្រហមបានប្រែក្លាយសង្គមកម្ពុជាទៅជាសង្គមទាសភាពបុព្វកាលពុទ្ធចក្រធ្លាក់ដល់ចំណុចសូន្យ បំបិទជំនឿសាសនារីឯផ្នែកអាណាចក្រក៏បានធ្លាក់ដុនដាបផងដែរ ។ ក្នុងសម័យព្រះរាជាណាចក្រកម្ពុជាទី២យើងបានរៀបចំឲ្យមានលទ្ធិប្រជាធិបតេយ្យសេរីពហុបក្ស និងមានស្ថិរភាពនយោបាយ ។ ប្រទេសកម្ពុជាទទួលបានសុខសន្តិភាពពេញលេញ ក្នុងនោះរដា្ឋភិបាលមានលទ្ធភាពគ្រប់គ្រាន់ក្នុងការកសាងប្រទេសជាតិឲ្យមានការរីក​ចម្រើន​លើគ្រប់វិស័យទាំងផ្នែកពុទ្ធចក្រ និងអាណាចក្រ ។

លោក ជា ចាន់តូ បានបន្ថែមថា «អរគុណសន្តិភាព! មានសន្តិភាពទើបមានការអភិវឌ្ឍ! ដូច្នេះ ដើម្បីបន្តនិរន្តរភាពបន្តទៀត នៅថ្ងៃទី២៣ ខែកក្កដា ឆ្នាំ២០២៣ ខាងមុខនេះសូមអំពាវនាវ សូមបងប្អូនប្រជាពលរដ្ឋទាំងអស់អញ្ជើញទៅបោះឆ្នោតឲ្យបានគ្រប់ៗគ្នា និងជ្រើសរើសគណបក្សណាដែលបម្រើបងប្អូនប្រជាពលរដ្ឋពិតប្រាកដ និងជាគណបក្សដែលនៅជិតបងប្អូនប្រជាពលរដ្ឋគ្រប់ពេលវេលា និងជួយទុក្ខធុរៈព្រមទាំងអភិវឌ្ឍភូមិ-ឃុំឲ្យមានការរីកចម្រើន »។

លោកទេសាភិបាល បានបន្តទៀតថា គោលនយោបាយរបស់រាជរដ្ឋាភិបាលដែលមានសម្តេចតេជោ ហ៊ុន សែន ជា​ប្រមុខដឹកនាំប្រកបដោយគតិបណ្ឌិត បានចាត់ទុកការអភិវឌ្ឍធនធានមនុស្សធនធានព្រះសង្ឃ ជាអាទិភាពចម្បង ។ អ្នកប្រាជ្ញលោកបានចាត់ទុកថា សង្គមជាតិមួយដែលមានប្រជាពលរដ្ឋប្រកាន់ភ្ជាប់នូវព្រះពុទ្ធសាសនាមានព្រះសង្ឃមានចំណេះដឹងខ្ពង់ខ្ពស់ សង្គមជាតិនោះ នឹងមានសុខសន្តិភាពសណ្តាប់ធ្នាប់ សុខដុមរមនា ការអភិវឌ្ឍដ៏ល្អប្រសើរ វប្បធម៌ និងអរិយធម៌ នឹងថ្កុំថ្កើនរុងរឿង។

ពាក់ព័ន្ធនឹងពិធីបុណ្យឆ្លង ព្រះវិហារវត្តបារាយណ៍ជាន់ដែកនោះដែរលោក ជា ចាន់តូ បាននាំ​នូវ​ការសាកសួរសុខទុក្ខ និង​នឹករឮកពីសម្ដេ​​​ច​​​​ប្រ​​មុខ​​​​​​ទាំង​២ គឺសម្ដេច​អគ្គ​មហាពញាចក្រី ហេង សំរិន និងសម្តេចអគ្គ​មហា​សេនា​បតី​​តេ​ជោ​​ ហ៊ុន សែន ដែលសម្តេចទាំងពីរតែងតែគិតគូរ​ពីសុខទុក្ខ​​ប្រជាជន​យើង​ជា​និច្ច ។ សម្តេច​ទាំង២ នេះហើយ ដែ​​​ល​​បានធ្វើនូវកិច្ចការសំខាន់ៗ ធំៗ ដើម្បី​ជា​ឧត្តម​​​ប្រយោជន៍​របស់​ជាតិ​យើង​ទាំង​មូលគឺ៖ រំដោះប្រទេស ៧មករា, ការពារការវិលត្រឡប់របបប្រល័យពូជសាសន៍, បង្រួបបង្រួមជាតិ, សន្ដិភាពនិងអភិវឌ្ឍន៍ ។

លោក ជា ចាន់តូ បានបញ្ជាក់ថា ក្រោម​ការដឹ​ក​នាំ​​រប​ស់​សម្តេចតេជោនាយក​រដ្ឋម​ន្ត្រី ដែល​ជា​និច្ច​កាលតែងតែគិតគូរ យកចិត្តទុកដាក់ និ​ង​ខិ​ត​ខំស្វែងរកគ្រប់​ម​ធ្យោ​បាយដើម្បី​ដោះស្រាយ​​​​រាល់ការលំបាកក្នុងជីវភាពរបស់ប្រជាជនយើងជាពិ​សេស​​នៅតំបន់ជនបទ សំដៅ​សម្រេចកាត់បន្ថយ​ភាព​ក្រីក្រនិ​ង​លើកកម្ពស់កម្រិតជីវភាពរស់នៅ​របស់​ប្រជាពលរដ្ឋ​យើង​​​នៅទូទាំង​ប្រទេស ព្រមទាំ​ង​​បានខិតខំកសាងសមិទ្ធផលក្នុងវិស័យ​​​អាណាចក្រ និងពុទ្ធចក្រដូចជា៖ វត្តអារាម ព្រះវិហារ សាលារៀន មន្ទីរពេទ្យ ផ្លូវគមនាគមន៍ ទឹកស្អាត អគ្គិសនី និងប្រព័ន្ធធារាសាស្រ្ត៕

អត្ថបទ៖ សំអឿន