មិនគួរហៅមុខម្ហូបនេះថា«អាម៉ុក» ឡើយ ព្រោះជាពាក្យមិនសមគួរ

ម្ហូបមួយប្រភេទចម្អិនឡើងពីសាច់ត្រីត្រីរ៉ស់ស្រស់ ត្រីអណ្តែងស្រស់  ផ្សំគ្រឿងជាមួយ កាពិបុក និងខ្ទិះដូងជាដើម ខ្ចប់ចំហុយ ដាក់ស្លឹកញ ត្រូវបានប្រជាពលរដ្ឋខ្មែរមួយចំនួនហៅឈ្មោះម្ហូបមួយប្រភេទនេះថា«អាម៉ុក»។ សាធារណជនមួយចំនួនយល់ច្រឡំថា ការហៅឈ្មោះម្ហូបនេះ ថា«អាម៉ុក» គឺត្រឹមត្រូវ ហើយភាន់ច្រឡំថា ការហៅឈ្មោះម្ហូបនេះថា «ហហ្មុក» ជាការហៅឈ្មោះតាមប្រទេសថៃ។

បើយោងទៅតាមវចនានុក្រមសម្ដេច ព្រះសង្ឈរាជ ជួន ណាត និងវចនានុក្រមរាជបណ្ឌិត្យសភាកម្ពុជា គឺត្រូវហៅម្ហូបដ៏មានឱជារសមួយនេះថា«ហហ្មុក»(អានថា ហ៏-ហ៉្មុក ) ទើបត្រឹមត្រូវ ហើយមិនត្រូវហៅថា «អាម៉ុក»នោះទេ ព្រោះជាសម្តីពុំគួរសមសោះឡើយ  ។

ជម្រាបជូនថា ម្ហូបកម្ពុជាមួយមុខនេះ មានការពេញនិយមណាស់ ហើយមិនត្រឹមតែពលរដ្ឋកម្ពុជា សូម្បីគណៈ​ប្រតិភូមកចូលរួមកិច្ចប្រជុំកំពូលអាស៊ាននៅរាជធានីភ្នំពេញ ក៏បាននិយមចូលចិត្តម្ហូបនេះផងដែរ។ នៅក្នុងកិច្ចប្រជុំកំពូលអាស៊ាន ក្នុងឆ្នាំ២០២២ កម្ពុជាបានរៀបចំមុខម្ហូប ហហ្មុក យ៉ាងសម្រិតសម្រាំងជូនដល់ភ្ញៀវ​អន្តរជាតិ​​ដែល​សុទ្ធ​សឹង​ជា​រដ្ឋមន្ត្រី​ការ​បរទេស​បណ្តា​ប្រទេស​អាស៊ាន និង​ប្រទេស​ជា​ដៃគូ ដែល​សរុប​មិន​តិច​ជាង​៣០​ប្រទេស​បានបរិភោគយ៉ាងពេញចិត្ត។ លោក គង់ ភោគ អ្នកនាំពាក្យកិច្ចប្រជុំកំពូលអាស៊ាន បានបញ្ជាក់បែបនេះថា៖ «ការ​រៀបចំ​ម្ហូប​ខ្មែរ ហហ្មុក ​ទទួលភ្ញៀវ​បរទេស​ជា​ផ្នែក​មួយ​នៃ​ការទូត​សេដ្ឋកិច្ច»។

ជាមួយគ្នានេះដែរ កាលពីខែមិថុនា ឆ្នាំ២០២៣ កន្លងទៅថ្មីៗនេះ លោក Charles Calvino Hang កូនកាត់ខ្មែរ-អាមេរិកាំង​ បាននាំយកមុខម្ហូប ហហ្មុក ដែលជាម្ហូបតំណាងកម្ពុជាចូលរួមប្រកួតក្នុងកម្មវិធី Master Chef America ​ ដោយទទួលបាន​ Yes​ ទាំងបួនពីចុងភៅលំដាប់ពិភពលោក​ អាចបន្តទៅវគ្គបន្ទាប់បាន។

បន្ថែមពីនេះ ក្រសួងទេសចរណ៍ បានស្នើសុំដាក់បញ្ចូលមុខម្ហូប៤មុខរបស់កម្ពុជា រួមមាន ហហ្មុក សម្លកកូរ សម្លរម្ជូរគ្រឿង សម្លរប្រហើរ ជាមួយនឹងបង្អែមចំនួន៥មុខបន្ថែមទៀត ដូចជា នំអន្សម នំផ្លែអាយ បាយដំណើបសង្យា នំចក្រច័ន្ទ និងនំស្លឹកស្រស់ ចូល​ទៅ​ក្នុង​បញ្ជី​បេតិកភណ្ឌ​ពិភពលោក​អ​រូបី​របស់​អង្គការ​យូ​ណេ​ស្កូ (UNESCO។ មកទល់ពេលនេះ សំណើរទាំងនេះ កំពុងស្ថិតក្នុងដំណាក់កាល​​ប្រមូល​រៀបចំឯកសារ​ ដើម្បី​ឈាន​ដល់​ស្នើ​សុំជាផ្លូវការ​ចុះបញ្ជី​បេតិកភណ្ឌ​ពិភពលោក​អ​រូបិ​របស់​អង្គការ​យូ​ណេ​ស្កូ៕

អត្ថបទដោយ៖ ង៉ិល​ ណារ៉ាត់