អ្នកនាំពាក្យ គ.ជ.ប បញ្ជាក់ចំពោះចំណាត់ការលើទណ្ឌិត សម រង្ស៊ី និងបក្ខពួក

មន្ត្រីជាន់ខ្ពស់ គ.ជ.ប អះអាងថា ចំណាត់ការទៅលើទណ្ឌិត សម រង្ស៊ី និងបក្ខពួកមួយចំនួនទៀតនោះ ដែលដឹកនាំ និងធ្វើសកម្មភាពណែនាំ និងញុះញង់ឲ្យអ្នកបោះឆ្នោតបំផ្លាញ ឬធ្វើឲ្យខូចសន្លឹកឆ្នោតនោះ គឺធ្វើឡើងដោយផ្អែកលើច្បាប់ ស្ដីពី វិសោធនកម្មច្បាប់ ស្ដីពី ការបោះឆ្នោតជ្រើសតាំង តំណាងរាស្រ្ដ។

ការបញ្ជាក់នេះ បន្ទាប់ពីគណៈកម្មការ​រៀបចំ​ការ​បោះឆ្នោត​រាជធានីភ្នំពេញ (PEC) កាលពីថ្ងៃទី ១៧ ខែកក្កដា ឆ្នាំ ២០២៣ បានបើកសវនាការលើបណ្តឹងចំនួន ៥ ប្ដឹងមេក្លោងបានដឹកនាំធ្វើសកម្មភាពណែនាំ និងញុះញង់ឲ្យអ្នកបោះឆ្នោតបំផ្លាញ ឬធ្វើឲ្យខូចសន្លឹកឆ្នោត និងបក្ខពួកមួយចំនួនទៀត។

លោក សោម សូរីដា អគ្គលេខាធិការរង និងជាអ្នកនាំពាក្យ គ.ជ.ប មានប្រសាសន៍ប្រាប់កម្ពុជាថ្មី នៅព្រឹកថ្ងៃទី ១៨ ខែកក្កដា ឆ្នាំ ២០២៣នេះថា គណៈកម្មការ​រៀបចំ​ការ​បោះឆ្នោត​រាជធានីភ្នំពេញ (PEC) បានសម្រេចលើបណ្ដឹងទាំង ៥នោះ ដូចជា៖

១. សម្រេចលើបណ្ដឹង/សំណុំរឿងលេខ ០០១

-ពិន័យជាប្រាក់ចំនួន ២០លានរៀល ដោយពុំទាន់គិតដល់ទោសព្រហ្មទណ្ឌផ្សេងទៀត ចំពោះឈ្មោះ សម រង្ស៊ី។

-លុបឈ្មោះចេញពីបញ្ជីបោះឆ្នោត និងដកសិទ្ធិឈរឈ្មោះឲ្យគេបោះឆ្នោតសម្រាប់រយៈ ២៥ឆ្នាំ។

២. សម្រេចលើបណ្ដឹង/សំណុំរឿង ០០២

-ពិន័យជាប្រាក់ចំនួន ១០លានរៀល ដោយពុំទាន់គិតដល់ទោសព្រហ្មទណ្ឌផ្សេងទៀត ចំពោះឈ្មោះ សេង ម៉េងប៊ុនរ៉ុង។

-លុបឈ្មោះចេញពីបញ្ជីបោះឆ្នោត និងដកសិទ្ធិឈរឈ្មោះឲ្យគេបោះឆ្នោតរបស់ឈ្មោះ សេង ម៉េងប៊ុនរ៉ុង សម្រាប់រយៈពេល ២០ឆ្នាំ។

៣. សម្រេចលើបណ្ដឹង/សំណុំរឿង ០០៣

-ពិន័យជាប្រាក់ចំនួន ១០លានរៀលក្នុងម្នាក់ៗ ដោយពុំទាន់គិតដល់ទោសព្រហ្មទណ្ឌផ្សេងទៀត ចំពោះឈ្មោះដូចជា៖ ឈ្មោះ សោ ចាន់ដេត , ឈ្មោះ គង់ សភា , ឈ្មោះ ហេង ដាណារ៉ូ។

-លុបឈ្មោះចេញពីបញ្ជីបោះឆ្នោត និងដកសិទ្ធិឈរឈ្មោះឲ្យគេបោះឆ្នោតក្នុងម្នាក់ៗ សម្រាប់រយៈពេល ២០ឆ្នាំ។

៤. សម្រេចលើបណ្ដឹង/សំណុំរឿង ០០៤

-ពិន័យជាប្រាក់ចំនួន ១០លានរៀលក្នុងម្នាក់ៗ ដោយពុំទាន់គិតដល់ទោសព្រហ្មទណ្ឌផ្សេងទៀត ចំពោះឈ្មោះដូចជា៖ ឈ្មោះ គឹម សុខ , ឈ្មោះ ឆាំ ឆានី។

-លុបឈ្មោះចេញពីបញ្ជីបោះឆ្នោត និងដកសិទ្ធិឈរឈ្មោះឲ្យគេបោះឆ្នោត សម្រាប់រយៈពេល ២០ឆ្នាំក្នុងម្នាក់ៗ។

៥. សម្រេចលើបណ្ដឹង/សំណុំរឿង ០០៥

-ពិន័យជាប្រាក់ចំនួន ១០លានរៀលក្នុងម្នាក់ៗ ដោយពុំទាន់គិតដល់ទោសព្រហ្មទណ្ឌផ្សេងទៀត ចំពោះឈ្មោះដូចជា៖ ឈ្មោះ មូរ សុខហួរ , ឈ្មោះ ឡុង រី , ឈ្មោះ ហូរ វ៉ាន់ , ឈ្មោះ អេង ឆៃអ៊ាង , ឈ្មោះ នុត រំដួល , ឈ្មោះ រិន រដ្ឋ , ឈ្មោះ ភាន់ រិទ្ធី , ឈ្មោះ ឆឺយ ឧត្តមរស្មី, ឈ្មោះ នាង សុឃុន , ឈ្មោះ ម៉ៅ វិបុល។

-លុបឈ្មោះចេញពីបញ្ជីបោះឆ្នោត និងដកសិទ្ធិឈរឈ្មោះឲ្យគេបោះឆ្នោត សម្រាប់រយៈពេល ២០ឆ្នាំក្នុងម្នាក់ៗ។

លោក សោម សូរីដា អ្នកនាំពាក្យ គ.ជ.ប បានបញ្ជាក់ទៀតថា ចំណាត់ការរបស់គណៈកម្មការ​រៀបចំ​ការ​បោះឆ្នោត​រាជធានីភ្នំពេញ (PEC) ត្រូវបានអនុវត្តតាមច្បាប់ ស្ដីពី វិសោធនកម្មនៃច្បាប់ ស្ដីពី ការបោះឆ្នោតជ្រើសតាំង តំណាងរាស្រ្ដ មាត្រា ១៤២ថ្មី។

មាត្រា ១៤២ថ្មី នៃច្បាប់ ស្ដីពី វិសោធនកម្មនៃច្បាប់ ស្ដីពី ការបោះឆ្នោតជ្រើសតាំង តំណាងរាស្រ្ដ បានកំណត់ថា៖

-ត្រូវផាកពិន័យជាប្រាក់ពី ៥លានរៀល ទៅ ២០លានរៀល ដោយគណៈកម្មាធិការជាតិរៀបចំការបោះឆ្នោត ដោយពុំទាន់គិតដល់ទោសព្រហ្មទណ្ឌផ្សេងទៀត ចំពោះជនណាដែលតាមគ្រប់មធ្យោបាយទុច្ចរិត៖

-រារាំង ឬញុះញង់ប្រជាពលរដ្ឋដែលមានសិទ្ធិបោះឆ្នោត មិនឲ្យទៅចុះឈ្មោះបោះឆ្នោត ឬរារាំង មិនឲ្យចុះឈ្មោះប្រជាពលរដ្ឋ ដែលមានសិទ្ធិបោះឆ្នោតក្នុងបញ្ជីបោះឆ្នោត និងសៀវភៅបញ្ជីបោះឆ្នោត។

-បង្កការអុកឡុក ឬរារាំងសកម្មភាពជាប្រក្រតី ក្នុងទីកន្លែងសម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត នៅក្នុងអំឡុងពេលនៃការពិនិត្យបញ្ជី និងចុះឈ្មោះបោះឆ្នោត។

-ឲ្យអ្នកគាំទ្រ ឬអ្នកបោះឆ្នោត ប្រព្រឹត្តអំពើរំលោភបំពាន អំពើគំរាមកំហែង អំពើហិង្សាទៅលើបេក្ខជន ឬទៅលើគណបក្សនយោបាយដទៃ។

-រារាំង ឬញុះញង់ប្រជាពលរដ្ឋដែលមានសិទ្ធិបោះឆ្នោតមិនឲ្យទៅបោះឆ្នោត។

-ណែនាំ ឬញុះញង់ឲ្យអ្នកបោះឆ្នោតបំផ្លាញ ឬធ្វើឲ្យខូចសន្លឹកឆ្នោត។

-រារាំងបេក្ខជន ឬអ្នកគាំទ្រគណបក្សនយោបាយមិនឲ្យឃោសនាបោះឆ្នោត តាមការកំណត់។

-ធ្វើឲ្យបាត់ទំនុកចិត្តលើការសម្ងាត់នៃការបោះឆ្នោត។

-ធ្វើឲ្យមានការភាន់ច្រឡំនាំឲ្យបាត់ទំនុកចិត្ដលើការបោះឆ្នោត។

-បង្កការរំខានមិនឲ្យដំណើរការបោះឆ្នោតបាន។

-បង្កការរំខានមិនឲ្យរាប់សន្លឹកឆ្នោតបាន។

-ធ្វើឲ្យខូចរបៀបរៀបរយក្នុងពេលបោះឆ្នោត។

-ទិញសន្លឹកឆ្នោតដោយសម្ភារ ឬដោយប្រាក់កាស។

ត្រូវលុបឈ្មោះចេញពីបញ្ជីបោះឆ្នោត ឬ/និងលុបបេក្ខភាពរបស់សាមីខ្លួន ឬ/និងដកសិទ្ធិឈរឈ្មោះឲ្យគេបោះឆ្នោតរបស់សាមីខ្លួន សម្រាប់រយៈពេល ៥ឆ្នាំយ៉ាងតិច ដោយគណៈកម្មាធិការជាតិរៀបចំការបោះឆ្នោត បន្ថែមលើទណ្ឌកម្មដែលបានចែងក្នុងកថាខណ្ឌទី ១ខាងលើ ចំពោះជនដែលបានប្រព្រឹត្តអំពើល្មើសណាមួយដូចមានចែងក្នុងកថាខណ្ឌទី ១ ខាងលើនេះ៕