ព្យាបាលឆែបមាត់ពីកំណើត ដោយឥតគិតថ្លៃ ថែមទាំងផ្តល់ប្រាក់ឧបត្តម្ភដល់អ្នកក្រីក្រ

ការពិគ្រោះនិងព្យាបាលឆែបមាត់ ឆែបក្រអូម និងឆែបឆ្អឹងថ្គាមពីកំណើត គឺជាជំនួយអង្គការ Smile Train ដែល បានផ្តល់ជូនការព្យាបាលដោយឥតគិតថ្លៃ ដល់ពលរដ្ឋកម្ពុជាប្រមាណជាង ១០ឆ្នាំហើយ។ យុទ្ធនាការនេះ គឺដើម្បីជួយឱ្យអ្នកដែល​មិន​មាន​លទ្ធភាព​ព្យាបាល​បញ្ហាខាងលើ អាចទទួល​បានស្នាមញញឹម​មួយ​ដូចមនុស្សទូទៅដែរ ដោយមិនតម្រូវ​ឱ្យ​បង់​ប្រាក់​ឡើយ ហើយថែមទាំងផ្តល់ជូន ៨ម៉ឺនរៀល-១០ម៉ឺនរៀល សម្រាប់អ្នកគ្មានលទ្ធភាពមកទទួលការព្យាបាលនៅសៀមរាប។
នេះបើតាមការបញ្ជាក់ពី លោកវេជ្ជបណ្ឌិត សរ វុឌ្ឍី ឯកទេសវះកាត់កុមារ នៃមន្ទីរពេទ្យកុមារអង្គរ និងបម្រើការងារនៅ មន្ទីរពេទ្យនាគទេព។

បើតាមលោកវេជ្ជបណ្ឌិត សរ វុឌ្ឍី ចំពោះការពិគ្រោះនិងព្យាបាលនេះ មិនកំណត់អាយុឡើយ គឺផ្តោតសំខាន់លើអ្នកដែល មានបញ្ហាឆែបមាត់ ឆែបក្រអូម និងឆែបឆ្អឹងថ្គាមពីកំណើត សុទ្ធតែអាចមកពិគ្រោះនិងព្យាបាលបាន។ ក្នុងនោះ វេជ្ជបណ្ឌិតរូបនេះ បញ្ជាក់ដែរថា សម្រាប់ការវះកាត់ព្យាបាលលើកុមារដែលមានបញ្ហាឆែបមាត់ គឺអាចធ្វើបាន លុះត្រាតែអាយុបាន ៣ខែ ឯការវះកាត់លើកុមារដែលឆែបក្រអូម ត្រូវមានអាយុចាប់ពី ៩ខែឡើង។

គួរបញ្ជាក់ថា ក្រុម​គ្រូពេទ្យ​នៃ​អង្គការ​ Smile Train ​បាន​ព្យាបាល​ជំងឺ​ទូទៅ​ដល់​ពលរដ្ឋខ្មែរក្រីក្រជាច្រើន ដោយមិន​យក​កម្រៃ​ ហើយទិន្នន័យកាលពីឆ្នាំ២០១១ បង្ហាញថា ​មាន​ប្រហែល ២៥០០​ករណី​ បានជាពីជំងឺ​ឆែប​មាត់ ​និង​ឆែប​ក្រអូម។ ឥលូវនេះ តាមរយៈគណនីបណ្តាញទំនាក់ទំនងសង្គមរបស់ លោក សរ វុឌ្ឍី “Sar Vuthy” បានផ្សព្វផ្សាយជាដំណឹង​ដល់សាធារណជន ដែលមិនទាន់​បានដឹងពី​ឱកាសព្យាបាលបញ្ហាពីកំណើតនេះ អាច​មកទទួលការពិគ្រោះនិងព្យាបាលបាន​នៅ មន្ទីរពេទ្យនាគទេព ស្ថិតក្នុងខេត្តសៀមរាបដោយមិនកំណត់ពេលឡើយ។

ចំពោះព័ត៌មានលម្អិតអាចទាក់ទងផ្ទាល់ទៅកាន់លេខទូរស័ព្ទរបស់លោកវេជ្ជបណ្ឌិត សរ វុឌ្ឍី ផ្ទាល់ចំនួន ៤ខ្សែ គឺលេខ 060 60 62 61 (Telegram); 012 94 98 29 (Telegram); 012 56 38 81 ឬអាចទាក់ទងតាមរយៈឆាត Telegram របស់លោកបាន៕