ម្ចាស់កសិដ្ឋានមួយ កៀរគរពលរដ្ឋឱ្យចិញ្ចឹមខ្យង​សម្រាប់ផ្គត់ផ្គង់ក្នុងស្រុក និងនាំចេញទៅទីផ្សារចិន

ម្ចាស់កសិដ្ឋាន ៤០០ នៅស្រុកកែវសីមា ខេត្តមណ្ឌលគិរី គ្រោងចងក្រងពលរដ្ឋចិញ្ចឹមខ្យងលក្ខណៈទ្រង់ទ្រាយធំ ដើម្បីផ្គត់ផ្គង់ទីផ្សារក្នុងស្រុក និងសម្រាប់នាំចេញទៅចិន បន្ទាប់ពីទទួលបានដំណឹងថា ចិនទទួលទិញផលិតផល​ជលផល​របស់​កម្ពុជា ចំនួន ៤ប្រភេទ រួមមានបង្កងប៉ាក អន្ទង់ ត្រីដំរី និងខ្យង។

លោក ហាច ឆន ស្ថាបនិក និងអគ្គនាយកកសិដ្ឋាន ៤០០ ស្ថិតនៅភូមិអូរណា ឃុំស្រែខ្ទុម ស្រុកកែវសីមា បានលើក​ឡើងថា បច្ចុប្បន្ននេះ កសិដ្ឋានបានចិញ្ចឹមខ្យងប្រហែលជាង ៣០០ អាង ហើយផ្គត់ផ្គង់ទូទាំង ២៥ រាជធានីខេត្ត ដោយមានបរិមាណចន្លោះពី ២០០ ទៅ ៣០០ គីឡូក្រាម ក្នុងមួយខែ។ ជាងនេះទៅទៀត លោកបន្តថា ការប្រកបរបរ​ចិញ្ចឹមខ្យងនេះ ហាក់មានភាពទូលំទូលាយច្រើន នៅក្នុងប្រទេសកម្ពុជា តាមរយៈការទិញពូជខ្យងពីកសិដ្ឋាន យកទៅ​ចិញ្ចឹមបន្តប្រមាណជាង ១ពាន់គ្រួសារទៅហើយ។

លោក ឆន បាននិងកំពុងជំរុញបន្ថែមទៀត ដល់ប្រជាកសិករនៅក្នុងមូលដ្ឋាន ឱ្យចិញ្ចឹមទៅតាមស្តង់ដារភូតគាមអនាម័យ ដើម្បីបំពេញតម្រូវការក្នុងស្រុក និងសម្រាប់នាំចេញទៅក្រៅប្រទេស។ លោករំពឹងថា ក្រោយបើកទីផ្សារនាំចេញទៅចិន នឹងរួមចំណែកបង្កើនប្រាក់ចំណូលបន្ថែមទៀត ដល់ពលរដ្ឋប្រកបរបរចិញ្ចឹមខ្យងនេះ។

ប្រធានគណៈ​កម្មការ​ប្រតិបត្ដិ​សមាគមវារីវប្បកម្មនៅកម្ពុជា លោក ឡែមផូរ សុថាវរិទ្ធិ ថ្លែងប្រាប់កម្ពុជាថ្មីថា លោកពិត​ជាត្រេកអរ និងចូលរួមលើកចិត្តដល់ប្រជាកសិករឱ្យខិតខំផលិត ផលិតផល​ជលផល ឱ្យស្របតាមស្ដង​ដារបច្ចេកទេស ដើម្បីផ្គត់ផ្គង់តម្រូវការទីផ្សារ។ ជាងនេះទៅទៀត លោកបន្តថា ដើម្បីផលិតផលិតផលឱ្យស្របតាមតម្រូវទីផ្សារ​ប្រទេស​ចិននោះ លុះត្រាតែមានការចូលរួមពីបណ្ដាភាគីចិន​ ក្នុងការផ្ដល់បច្ចេកទេស ក៏ដូចជាទុនសហវិនិយោគរួមគ្នា សម្រាប់​ការចិញ្ចឹមទៅតាមស្តង់ដារ គុណភាព។

អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ កញ្ញា អ៊ឹម រចនា បានឱ្យដឹងថា ទាក់ទងនឹងការនាំចេញ​ផលិតផល​ជលផលរបស់កម្ពុជា ទៅកាន់ប្រទេសចិននេះ រដ្ឋបាលគយចិន ផ្តល់ការអនុញ្ញាតចំពោះក្រុមហ៊ុននៅកម្ពុជា ដែលធ្វើការ​ស្នើសុំនាំចេញ។

កញ្ញា អ៊ឹម រចនា  បានបញ្ជាក់ដូច្នេះថា« សម្រាប់ការនាំចេញនេះ​ គឺអាស្រ័យទៅលើក្រុមហ៊ុនទាំងស្រុង ថាតើក្រុមហ៊ុន​ជ្រើសយកការចិញ្ចឹមដោយខ្លួនឯង ឬចុះកុងត្រាជាមួយកសិដ្ឋានផ្សេងៗ ក្នុងការចិញ្ចឹម​ប្រកបដោយអនាម័យ គុណភាព​ស្ដង់ដារខ្ពស់ និង​ភូតគាមអនាម័យ សម្រាប់នាំចេញទៅ​កាន់​ទីផ្សារប្រទេសចិន​»៕

អត្ថបទ៖ ផល ធារិត