អ្នកនាំពាក្យ ៖ ក្រសួង នឹងដាក់ពង្រាយមន្រ្តីជំនាញ ១៦០០ នាក់ ដើម្បីពង្រឹងវិស័យកសិកម្មកម្ពុជា

អ្នកនាំពាក្យក្រសួងកសិកម្ម កញ្ញា អ៊ឹម រចនា បានបង្ហើបពីគោលនយោបាយដាក់ពង្រាយមន្រ្តីជំនាញកសិកម្មនៅតាមឃុំ សង្កាត់ដោយមានចំនួនប្រមាណ ១៦០០ នាក់ ទៅតាមឃុំ ដែលមានភាពសកម្មទៅលើវិស័យកសិកម្មនៅទូទាំង ២៥ រាជធានីខេត្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមអ្នកនាំពាក្យរូបនេះការដាក់ពង្រាយអ្នកជំនាញកសិកម្មនេះ​ គឺជាគោលនបាយមួយក្នុងគោលនបាយ​សំខាន់ៗដទៃ​ផ្សេងទៀត របស់រាជរដ្ឋាភិបាលកម្ពុជា ដែលនឹងត្រូវប្រកាសនាពេលឆាប់ៗខាងមុខ ដោយថ្នាក់ដឹកនាំថ្មី នីតិកាលទី៧។

ក្រៅពីនេះ ក៏មានគោលនបាយ ៤ផ្សេងទៀត ដែលនឹងត្រូវអនុវត្ត ព្រមៗគ្នាផងដែរ ក្នុងគោលបំណងរួម​ចំណែកជួយ​ឱ្យប្រជាកសិករមានជីវភាពល្អប្រសើរជាមុន តាមរយៈការចូលរួមផ្ដល់ជាជំនួយបច្ចេកទេស មូលធន និងតាមរយៈ​ការជួយរកទីផ្សារទុកជាមុន ដើម្បីឱ្យវារីវប្បករ ឬអ្នកផលិត ធ្វើឱ្យស្របទៅតាមតម្រូវការទីផ្សារទាំងក្នុងស្រុក និងនាំចេញ​ទៅក្រៅប្រទេស ជាពិសេសប្រទេសចិន។

យោងតាមគោលនយោបាយជាតិអភិវឌ្ឍន៍វិស័យកសិកម្មឆ្នាំ ២០២២-២០៣០ បានបង្ហាញថា គោលនយោបាយជាតិ​អភិវឌ្ឍន៍វិស័យកសិកម្មឆ្នាំ២០២២-២០២៣ ផ្តល់នូវការតម្រង់ទិសយ៉ាងទូលំទូលាយ និងមុតស្រួចដើម្បីអភិវឌ្ឍន៍​វិស័យនេះ សម្រាប់ក្រសួងស្ថាប័នពាក់ព័ន្ធរបស់រាជរដ្ឋាភិបាលកម្ពុជា ដៃគូអភិវឌ្ឍ និងវិស័យឯកជនរួមគ្នាអនុវត្ត។ គោលនយោបាយនេះ បានដាក់ចេញនូវផ្នែកសំខាន់ៗចំនួន៤ គឺ ១) ការធ្វើទំនើបកម្ម និងពាណិជ្ជូបនីយកម្ម​ក្នុងខ្សែច្រវាក់តម្លៃកសិកម្ម, ២) ការវិនិយោគសាធារណៈ និងឯកជនក្នុងវិស័យកសិកម្ម , ៣) កំណើនប្រកប​ដោយចីរភាព និងការបង្កើនភាពធន់ទៅនឹងការប្រែប្រួលអាកាសធាតុ និង ទី៤) ការកែទម្រង់ស្ថាប័ន និងបញ្ហាអន្តរ​វិស័យ៕

អត្ថបទ៖ ផល ធារិត