ដំណាំស្រូវប្រជាកសិករក្នុងស្រុកចំនួន ២ ក្នុងខេត្ត​បាត់ដំបង​ប្រឈម​ខ្វះទឹកស្រោចស្រព

ដំណាំស្រូវរបស់ប្រជាកសិករក្នុងស្រុកមោងឫស្សី និងស្រុកគាស់ក្រឡខេត្តបាត់ដំបង បានប្រឈមការខ្វះទឹកស្រោចស្រព​បណ្តាលឲ្យខូចខាតមួយចំនួន។

ប្រជាកសិករក្នុងស្រុកមោងឫស្សីដែល​ដីស្រែ​នៅឆ្ងាយ​ពីប្រភពទឹក បាន​ដាំ​ប្រភេទ​ស្រូវ​ធ្ងន់ដែលពឹងផ្អែកលើទឹកភ្លៀងបើតំបន់នោះគ្មានភ្លៀងគឺត្រូវខូចខាតទាំងស្រុង។

ពលរដ្ឋ​ឈ្មោះ ថាន ក្នុងចំណោមកសិករផ្សេងទៀតបានបញ្ជាក់ប្រាប់កម្ពុជាថ្មីនៅព្រឹកថ្ងៃទី១៦ ខែសីហានេះថា “ស្រូវខ្ញុំ​ក៏ខូចដែរកាលពីឆ្នាំកន្លងទៅ ព្រោះខ្ញុំបានដាំប្រភេទស្រូវធ្ងន់គឺពឹងផ្នែកតែលើទឹកភ្លៀងប៉ុណ្ណោះ ព្រោះតែតំបន់នោះវាឆ្ងាយពីប្រព័ន្ធប្រឡាយទឹកពេក”។

កសិករ​រូប​នេះ​បញ្ជាក់ថា ក្រោយពីអំណោយទឹកភ្លៀងមិនទៀងទាត់ គាត់​ក៏​ឈប់ធ្វើស្រូវអាស្រ័យមេឃបន្តទៀត ហើយដាក់ដាំ​ដំណាំហូបផ្លែផ្សេងៗជំនួសវិញ ប៉ុន្តែក៏​បន្តធ្វើ​ស្រែណាដែលមិននៅឆ្ងាយពីប្រភពទឹកពេក ហើយក៏បានប្រមូលផលម្តងរួចហើយដែរគឺប្រភេទស្រូវស្រាល។

​

មន្ត្រីនៃមន្ទីរកសិកម្មខេត្ត លោក ហេង សិទ្ធ បានលើកឡើងថា ជាធម្មតានៅតាមបណ្តាស្រុក​មួយ​ចំនួន​ប្រជាកសិករប្រកបរបរកសិកម្ម តែងតែមានតំបន់ខ្លះបានដាំប្រភេទស្រូវធ្ងន់ គឺពឹងផ្អែកតែលើទឹកភ្លៀងប៉ុណ្ណោះ ដោយសារតែវានៅឆ្ងាយដាច់ពីប្រព័ន្ធទឹក។

បញ្ហាដែលមានការបង្ហោះតាមបណ្តាញសង្គម ធ្វើការចោទទៅលើអាជ្ញាធរឬមន្ត្រីពាក់ព័ន្ធមិនជាការពិតនោះទេ ព្រោះវិស័យកសិកម្មនេះរាជរដ្ឋាភិបាលជំរុញឲ្យមន្ត្រីថ្នាក់មូលដ្ឋានយកចិត្តទុកដាក់ណាស់។ តែនៅតំបន់ខ្លះស្ថិតនៅដាច់ឆ្ងាយមិនអាចមានប្រព័ន្ធបញ្ជូនទឹកទៅដល់ផុតពីដែនប្រព័ន្ធធារាសាស្ត្រ។

លោកបញ្ជាក់ថា “ខ្ញុំទទួលស្គាល់ថា វាពិតជាមានខូចខាតចឹងហើយបើទឹកភ្លៀងមិនធ្លាក់យូរថ្ងៃនៅតំបន់នោះ ហើយសម្រាប់ប្រជាកសិករ ដែលបានធ្វើនៅជិតនិងមិនឆ្ងាយពេកពីប្រព័ន្ធទឹក គឺពួកគាត់បានប្រមូលផលម្តងរួចហើយ គឺប្រភេទស្រូវស្រាល។

លោក​ថា នៅ​ក្នុងស្រុកមោងឬស្សីគិតពីតំបន់ធ្វើស្រែពឹងលើទឹកភ្លៀង បានខូចខាតប្រហែលជា ៣ មុឺនហិកតា។ ចំណែកស្រុកគាស់ក្រឡ គឺជាតំបន់ដីកើយទោះមានប្រឡាយក៏រុញទឹកឡើងមិនរួចដែរ គឺប្រឡាយនោះសម្រាប់តែផ្ទុកទឹកភ្លៀងប៉ុណ្ណោះ ហើយការខូចខាតវាមានចំនួនប្រហែលជាង ៣ ពាន់ហិកតា៕

អត្ថបទ៖ សៅ សារិទ្ធ