ក្រសួងសុខាភិបាល សម្រេច​បិទ​មន្ទីរ​សម្រាកព្យាបាល​ឯកជន​ស្ពាន​មង្គល ក្រោយ​មាន​ករណី​ស្លាប់​អ្នកជំងឺ​

ភ្នំពេញ ៖ នៅយប់​ថ្ងៃទី២១ ខែសីហា ឆ្នាំ២០២៣នេះ ក្រសួងសុខាភិបាល​បាន​ចេញសេចក្តីប្រកាស​ព័ត៌មាន​មួយ​ស្តីពី​ការ​បិទ និង​ដកហូត​សេចក្តីសម្រេច​ឱ្យ​បើក​មន្ទីរពេទ្យ​ឯកជនឈ្មោះ​ “ស្ពានមង្គល” ក្រោយ​រក​ឃើញ​មានករណី​ស្លាប់​អ្នកជំងឺ។

ក្នុង​សេចក្តី​ប្រកាស​ព័ត៌មាន​របស់​ក្រសួងសុខាភិបាល​បាន​ឲ្យ​ដឹង​ថា យោងតាមការចុះត្រួតពិនិត្យ​របស់ក្រុមការងារចម្រុះ​ នៅ​មន្ទីរសម្រាកព្យាបាល​ស្ពានមង្គល​ ដែល​មាន​ទីតាំង​ស្ថិតនៅ​ផ្ទះលេខ៥១០ ផ្លូវលេខ៣៧១ សង្កាត់បឹងទំពន់ទី២ ខណ្ឌមានជ័យ រាជធានីភ្នំពេញ កាលពីថ្ងៃទី២០ ខែសីហា ឆ្នាំ២០២៣ បានពិនិត្យ​ស្រាវជ្រាវ​ករណី​ស្លាប់​អ្នកជំងឺ​ម្នាក់​ ក្រោយ​ពី​បាន​បញ្ជូន​ពី​មន្ទីរ​សម្រាក​ព្យាបាល​ស្ពាន​មង្គល ដោយរថយន្តគិលានសង្គ្រោះទៅសង្គ្រោះបន្តនៅមន្ទីរពេទ្យមិត្តភាព​ខ្មែរ-សូវៀត​ កាល​ពី​ថ្ងៃទី១១ ខែសីហា ឆ្នាំ២០២៣ វេលាម៉ោង ៦និង៣០នាទីព្រឹក​ និងបាន​សន្និដ្ឋានថា​ មន្ទីរសម្រាកព្យាបាល​ឈ្មោះស្ពានមង្គល​ មានចំណុចខ្វះខាតមួយចំនួន ក្នុងការ​ធ្វើរោគវិនិច្ឆ័យ​ បច្ចេកទេស​ជួយសង្គ្រោះបន្ទាន់ និងពេលបញ្ជូនអ្នកជំងឺ។

ក្រសួងបាន​បញ្ជាក់​ថា “អាស្រ័យហេតុនេះ ក្រសួងសុខាភិបាលបានសម្រេចបិទ​ និងដកហូត​សេចក្តីសម្រេចឱ្យ​បើក​មន្ទីរសម្រាកព្យាបាល​ឯកជនឈ្មោះ ស្ពានមង្គល”។

ដើម្បីពង្រឹង​ការអនុវត្តច្បាប់ និង​លិខិត​បទដ្ឋាន​គតិយុត្តិ ក្រសួងសុខាភិបាល សូមណែនាំដល់ម្ចាស់មូលដ្ឋាន​សុខាភិបាលឯកជន​ទាំងអស់​ ត្រូវយកចិត្តទុកដាក់ក្នុងការផ្ដល់សេវា​ប្រកបដោយ​គុណភាព សុវត្ថិភាព និងគោរពក្រមសីលធម៌វិជ្ជាជីវៈ និងស្មារតី​ទទួលខុសត្រូវខ្ពស់៕