ក្រសួង-ស្ថាប័ន ណាខ្លះ បានបង្កើតគណៈកម្មការទ្រទ្រង់មូលនិធិគន្ធបុប្ផាកម្ពុជា ២ខែចុងក្រោយនេះ?

គិតចាប់ក្រោយកិច្ចប្រជុំពិក្សាការងារ រវាងលោក អូន ព័ន្ធមុនីរ័ត្ន ជាមួយតំណាងក្រសួង-ស្ថាប័ន និងរដ្ឋបាលរាជធានី-ខេត្ត កាលពីថ្ងៃទី​២២ ខែមិថុនា ឆ្នាំ២០២៣ ក្នុងគោល​បំណង​ផ្សព្វផ្សាយ ចលនា​កៀរគរ​ការបរិច្ចាគ​ជូនមូលនិធិគន្ធបុប្ផាកម្ពុជា ប្រចាំស្ថាប័ននីមួយៗ មានក្រសួង និងស្ថាប័នចំនួន៦ និងគ្រឹះស្ថានធនាគារ ១ បានបង្កើតគណៈកម្មការទ្រទ្រង់មូលនិធិគន្ធបុប្ផា​កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដើម្បីគាំទ្រកិច្ចដំណើរការរបស់មន្ទីរពេទ្យគន្ធបុប្ផា គណៈកម្មការទ្រទ្រង់មូលនិធិគន្ធបុប្ផាកម្ពុជា របស់ក្រសួង ស្ថាប័ន ក្រុមហ៊ុន និងគ្រឹះស្ថានជាច្រើន បានបង្កើតឡើងជា​បន្តបន្ទាប់។ អ្វីដែលជាយន្ត​ការដ៏មានសារៈសំខាន់ គឺការចូលរួមរក្សា​និរន្តរភាព​នៃកិច្ចដំណើការ​របស់មន្ទីរពេទ្យគន្ធបុប្ផា ស្របតាមការតាំងចិត្តរបស់​ប្រមុខរាជរដ្ឋាភិបាលកម្ពុជា ដើម្បីជួយប្រជាពលរដ្ឋ​ក្រីក្រ គ្មានលទ្ធភាពព្យាបាល។

គិតត្រឹមរយៈពេលជាង​ ២ខែ ចុងក្រោយ ពោលគឺក្រោយថ្ងៃទី២២ ខែមិថុនា ឆ្នាំ២០២៣ គណៈកម្មការទ្រទ្រង់​មូលនិធិគន្ធបុប្ផា​កម្ពុជា បង្កើតឡើងចំនួន ៧ទៀត រួមមាន៖
– គណៈកម្មការទ្រទ្រង់មូលនិធិគន្ធបុប្ផាកម្ពុជា ប្រចាំក្រសួងវប្បធម៌ និងវិចិត្រសិល្ប:
– គណៈកម្មការទ្រទ្រង់មូលនិធិគន្ធបុប្ផាកម្ពុជា ប្រចាំក្រសួងប្រៃសណីយ៍ និង ទូរគមនាគមន៍
– គណៈកម្មការទ្រទ្រង់មូលនិធិគន្ធបុប្ផាកម្ពុជា ប្រចាំក្រសួងសេដ្ឋកិច្ច និង ហិរញ្ញវត្ថុ
– គណៈកម្មការទ្រទ្រង់មូលនិធិគន្ធបុប្ផាកម្ពុជា ប្រចាំអគ្គនាយកដ្ឋានពន្ធដារ
– គណៈកម្មការទ្រទ្រង់មូលនិធិគន្ធបុប្ផាកម្ពុជា ប្រចាំរដ្ឋលេខាធិការដ្ឋានអាកាសចរស៊ីវិល
– គណៈកម្មការទ្រទ្រង់មូលនិធិគន្ធបុប្ផាកម្ពុជា ប្រចាំអាជ្ញាធរសវនកម្មជាតិ
– គណៈកម្មការទ្រទ្រង់មូលនិធិគន្ធបុប្ផាកម្ពុជា ប្រចាំធនាគារ កាណាឌីយ៉ា
គណៈកម្មការទ្រទ្រង់មូលនិធិគន្ធបុប្ផា បង្កើតឡើង​ដើម្បី​ជួយដល់​ប្រជាពលរដ្ឋ​ខ្មែរ តាមរយៈមន្ទីរពេទ្យគន្ធបុប្ផា ​ខណៈដែល​មន្ទីរពេទ្យនេះ កំពុងដើរតួយ៉ាងសំខាន់ ក្នុងការព្យាបាល​អ្នកគ្មានលទ្ធភាព នៅតាមរាជធានីខេត្តទាំងអស់ទូទាំងប្រទេស។

គួររំលឹកថា រាជរដ្ឋាភិបាល បានសម្រេចឱ្យអាជ្ញាធររាជធានី-ខេត្ត​ទាំងអស់ បង្កើតនូវគណៈកម្មការទ្រទ្រង់មូលនិធិគន្ធបុប្ផា កម្ពុជា ដែល​មាន​តួនាទី និងភារកិច្ចផ្សព្វផ្សាយ អំពាវនាវ និងបំផុសចលនាកៀរគរការបរិច្ចាគ ពីមន្ត្រីគ្រប់ជាន់ថ្នាក់ចំណុះ រាជរដ្ឋាភិបាល ដើម្បីទ្រទ្រង់មន្ទីរពេទ្យគន្ធបុប្ផា។

ទន្ទឹមនេះ គណៈកម្មការទ្រទ្រង់មូលនិធិគន្ធបុប្ផា ក៏មាន​តួនាទី​រាយការណ៍ អំពីវឌ្ឍនភាពនៃការចូលរួមបរិច្ចាគ និងធ្វើបច្ចុប្បន្នភាព បញ្ជីឈ្មោះ​សប្បុរសជន ទៅលេខាធិការដ្ឋាន​មូលនិធិគន្ធបុប្ផាកម្ពុជា ដើម្បីបូកសរុបនិងផ្សព្វផ្សាយ ជាសាធារណៈឱ្យបានទាន់ពេល ក្នុងគោលដៅ ធានាតម្លាភាព និងទំនុកចិត្ត ពី​សាធារណជន ក៏ដូចជាបំពេញ​ការងារ​ផ្សេងទៀត តាមការណែនាំរបស់មូលនិធិគន្ធបុប្ផាកម្ពុជា។

ដើម្បីឱ្យដំណើរ​នៃការទទួលថវិកាពីសប្បុរសជន ជួយដល់មន្ទីរពេទ្យបានកាន់តែល្អប្រសើរ កាលពីពេល​កន្លងមក ក្នុងឆ្នាំ២០២២ លោក ឃួង ស្រេង ក្រោយការប្រជុំជាមួយមន្ត្រីពាក់ព័ន្ធ បានសម្រេចរៀបចំប្រមូលថវិកា តាមរយៈប្រើប្រាស់ QR Code ដោយដាក់នៅតាមទីតាំងនានា បណ្ដាក្រុមហ៊ុន ផ្សារ សណ្ឋាគារ ភោជនីយដ្ឋាន និងកន្លែងផ្ដល់សេវាសាធារណៈជាដើម។ ពិសេស គឺអាចបរិច្ចាគតាមធនាគារដៃគូរាជរដ្ឋាភិបាលផងដែរ៕

អត្ថបទ៖ សុធាវី