នាវិច្ឆិកា ឯកឧត្តម ហ៊ុន ម៉ាណែត  នឹងដឹកនាំវេទិការាជរដ្ឋាភិបាលផ្នែកឯកជន ដើម្បីស្ដាប់មតិ និងសំណូមពរ

ឯកឧត្តម ហ៊ុន ម៉ាណែត នាយករដ្ឋមន្ត្រីកម្ពុជា នឹងដឹកនាំវេទិការាជរដ្ឋាភិបាលផ្នែកឯកជន លើកទី១៩ ដើម្បីស្ដាប់មតិ និងសំណូមពរផ្សេងៗ។ នេះជាការគូសបញ្ជាក់របស់ ឯកឧត្ដម ហ៊ុន ម៉ាណែត នាយករដ្ឋមន្ត្រីកម្ពុជា នៅក្នុងកិច្ចប្រជុំពេញអង្គគណរដ្ឋមន្ត្រីលើកដំបូង នីតិកាលទី៧ នៃរដ្ឋសភា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្ដម នាយករដ្ឋមន្ត្រីបានគូសបញ្ជាក់ថា ការដឹកនាំវេទិការាជរដ្ឋាភិបាលផ្នែកឯកជន លើកទី១៩នេះ គឺដើម្បីស្ដាប់មតិ និងសំណូមពរផ្សេងៗការដាក់ចេញនូវវិធានការមុតស្រួចនិងជាក់ស្ដែង ដើម្បីបន្តជំរុញគាំទ្រដល់វិស័យឯកជនដែលជា កម្លាំងចលករនៃកំណើនសេដ្ឋកិច្ច។

បន្ថែមពីនេះ នាយករដ្ឋមន្ត្រីក៏បានអះអាងថា រាជរដ្ឋាភិបាលអាណត្តិទី៧ នឹងបន្តដាក់ចេញនូវយន្តការឧត្ដមក្រុមប្រឹក្សាពិគ្រោះនិងផ្ដល់យោបល់ជាប​ន្តទៀត ក្រោមហេតុផល ដើម្បីរក្សានូវភាពរស់រវើកនិងរួមបញ្ចូលគ្នា គ្រប់បក្សនយោបាយ ដែលចូលរួមបោះឆ្នោតជ្រើសតាំងតំណាងរាស្ត្រ បក្សដែលចុះបញ្ជីស្របច្បាប់នៅក្រសួងមហាផ្ទៃ។

ឯកឧត្តមនាយករដ្ឋមន្ត្រីក៏បានបញ្ជាក់ទៀថា ការបន្តរក្សាទុកនូវយន្តការឧត្ដមក្រុមប្រឹក្សាពិគ្រោះនិងផ្ដល់យោបល់នេះ គឺសំដៅដល់ការប្រមូលយកធាតុចូលដែល មានលក្ខណៈជាទស្សនៈពហុគំនិត ពីបណ្ដាគណបក្សនយោបាយនានា ដើម្បីសម្រាប់ជាប្រយោជន៍ដល់ ការស្ថាបនាជាតិ។

ឯកឧត្តម ហ៊ុន ម៉ាណែត  ប្រមុខរាជរដ្ឋាភិបាល ក៏បានអរគុណដល់ពលរដ្ឋកម្ពុជាដែលបានបោះឆ្នោតជូនបក្សប្រជាជនកម្ពុជា ដែលការបោះឆ្នោតជូនបក្សប្រជាជននេះ ជាការជំនឿនិងការគាំទ្រយ៉ាងធំធេងនូវដំណើរការប្រជាធិបតេយ្យ តាមរយៈការបោះឆ្នោត ឥស្សរជនគណបក្សប្រជាជនកម្ពុជា ឱ្យបន្តដឹកនាំរាជរដ្ឋាភិបាល អាណត្តិទី៧ នៃរដ្ឋសភា។

សូមជម្រាបឡើងវិញ នាយករដ្ឋមន្ត្រីកម្ពុជា ឯកឧត្ដម ហ៊ុន  ម៉ាណែត បានដឹកនាំកិច្ចប្រជុំពេញអង្គគណរដ្ឋមន្ត្រីលើលដំបូង ក្នុងនីតិកាលទី៧នៃរដ្ឋសភា ដោយបានដាក់ចេញនូវយុទ្ធសាស្ត្របញ្ចកោណ-ដំណាក់កាលទីមួួយ។ ក្នុងយុទ្ធសាស្ត្របញ្ចកោណ-ដំណាក់កាលទីមួយនេះ គឺរដ្ឋាភិបាលថ្មី ប្រកាសធានាកំណើនសេដ្ឋកិច្ចប្រចាំឆ្នាំ ៧% និងកាត់បន្ថយភាពក្រីក្រឲ្យទាបជាង១០% ក៏ដូចជាការធានាជាច្រើនផ្សេងទៀត៕

ដោយ៖ ង៉ិល ណារ៉ាត់