តើអ្វីទៅជាច្បាប់ស្តីពីសារពើពន្ធ?

ការរៀបចំច្បាប់ស្តីពីសារពើពន្ធដើម្បីធានាបាននូវចីរភាពនៃការកៀរគរចំណូល ជំរុញកំណើនសេដ្ឋកិច្ចជាតិ ប្រកួតប្រជែងដោយស្មើភាពនិងយុត្តិធម៌, សមធម៌សង្គម និងការបន្តលើកកម្ពស់គុណភាពសេវាជូនអ្នក​ជាប់ពន្ធឱ្យបានកាន់តែល្អ រហ័ស សាមញ្ញ និងងាយស្រួល។ នេះជាការបញ្ជាក់របស់លោក ឆាយ ជាហេង អនុប្រធាននាយកដ្ឋានគ្រប់គ្រងអ្នកជាពន្ធធំនៃអគ្គនាយកដ្ឋានពន្ធដារ។

ថ្លែងនៅក្នុងសិក្ខាសាលាផ្សព្វផ្សាយស្ដីពី ច្បាប់ស្ដីពីសារពើពន្ធ ថ្ងៃទី ២៩ សីហា លោក ឆាយ ជាហេង បានពន្យល់អំពីគោលបំណងនៃការរៀបចំ ច្បាប់ស្តីពីសារពើពន្ធថា ដើម្បីបំពេញបន្ថែមនូវបទប្បញ្ញត្តិ​ដែលមានភាពខ្វះចន្លោះ ដោយផ្អែកលើមូលដ្ឋានមួយចំនួនជាអាទិ៍ដូចជា បទពិសោធន៍ និងការលើក​ឡើងនានារបស់វិស័យឯកជនក្នុងការអនុវត្តច្បាប់លិខិតបទដ្ឋានគតិយុត្តស្តីពីពន្ធដារជាធរមាន ការអនុវត្ត​កិច្ចព្រមព្រៀងស្តីពី ការចៀសវាងការយកពន្ធត្រួតគ្នា និងឧត្តមានុវត្តន៍អន្តរជាតិជាដើម។

បន្ថែមពីលើសនេះ លោក ឆាយ ​ជាហេង បន្តឱ្យដឹងទៀតថា ការដាក់បញ្ចូលនូវគោលការណ៍ទន់ភ្លន់ ដើម្បីអនុវត្តគោលនយោបាយរបស់រាជរដ្ឋាភិបាល ជាការលើកទឹកចិត្តផ្នែកពន្ធដារមួយចំនួន ក្នុងករណី​ដែលកម្ពុជាប្រឈមនឹងវិបត្តិសេដ្ឋកិច្ច, វិបត្តិហិរញ្ញវត្ថុ, គ្រោះអាសន្ន, តម្រូវការចាំបាច់បន្ទាន់នានា ក្នុងការធានាលំនឹងជីវភាព និងសុខុមាលភាពរបស់ប្រជាជនក៏ដូចជាក្នុងការធានានូវប្រក្រតីភាពនៃកិច្ចដំណើរការសង្គម-សេដ្ឋកិច្ច។

លើសពីនេះទៀត បើកផ្លូវឱ្យមានការចូលរួមអនុវត្តក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ស្របតាមការវិវត្តនៃសង្គមសេដ្ឋកិច្ច និងបរិបទថ្មីនៃវិស័យធុរកិច្ច តាមរយៈការប្រើប្រាស់ប្រព័ន្ធបច្ចេកវិទ្យាព័ត៌មាន​ទំនើបក្នុងការកៀរគរ និងគ្រប់គ្រងការប្រមូលចំណូល។

សូមកត់សម្គាល់ថា ប្រភេទពន្ធមួយចំនួនត្រូវបានប្តូរឈ្មោះក្នុងច្បាប់ស្តីពីសារពើពន្ធ ឆ្នាំ២០២៣ នេះ រួមមាន ១. អាករពិសេសលើទំនិញនិងសេវាមួយចំនួន ត្រូវបានប្តូរជាអាករពិសេស, ២. ពន្ធលើឈ្នួលផ្ទះនិងដី ត្រូវបានប្តូរជា​ពន្ធលើថ្លៃឈ្នួលអចលនទ្រព្យ, ៣. ពន្ធតែមប្រិ៍សារពើពន្ធ ត្រូវបានប្តូរជា ពន្ធលើផ្ទាំងផ្សព្វផ្សាយ, ៤. ពន្ធលើ​មធ្យោបាយដឹកជញ្ជូននិងយានជំនិះគ្រប់ប្រភេទ ត្រូវបានប្ដូរជា ពន្ធលើមធ្យោបាយ ដឹកជញ្ជូន ជាដើម៕

អត្ថបទ៖ ផល ធារិត