លោក​ ជិន​ ម៉ាលីន ៖ លំហសេរីភាពពលរដ្ឋ និងប្រព័ន្ធផ្សព្វផ្សាយ មានការបើកទូលាយខ្លាំងហើយ

មន្ត្រីជាន់ខ្ពស់ក្រសួងយុត្តិធម៌ បានអះអាងថា លំហសេរីភាពប្រជាពលរដ្ឋ និងប្រព័ន្ធផ្សព្វផ្សាយនៅកម្ពុជា មានការបើកទូលាយខ្លាំងហើយ តែមានភាពចង្អៀតសម្រាប់ក្រុមមួយចំនួនតូច ដែលចូលចិត្តប្រព្រឹត្ត​តែអំពើល្មើសទៅនឹងច្បាប់ប៉ុណ្ណោះ។

ការអះអាងនេះ បន្ទាប់ពីគណៈប្រតិភូ នៃគណៈកម្មាធិការបែងចែកថវិកាជាតិ នៃព្រឹទ្ធសភាអាមេរិក និង ឯកអគ្គរដ្ឋទូតសហរដ្ឋអាមេរិក កាលពីពេលថ្មីៗនេះ បានជំរុញឲ្យរាជរដ្ឋាភិបាលថ្មី បើកឡើងវិញលំហសេរីភាពពលរដ្ឋ និងប្រព័ន្ធផ្សព្វផ្សាយ។

លោក​ ជិន​ ម៉ាលីន អ្នកនាំពាក្យក្រសួងយុត្តិធម៌ មានប្រសាសន៍ប្រាប់កម្ពុជាថ្មី នៅថ្ងៃទី ៣០ ខែសីហានេះថា បើពិនិត្យមើលការអនុវត្តជាក់ស្ដែង គឺលំហសេរីភាពប្រជាពលរដ្ឋ និងប្រព័ន្ធផ្សព្វផ្សាយនៅកម្ពុជា មានការបើកទូលាយខ្លាំងហើយ។

លោកថា «យើងមើលចំនួនបណ្ដាញសារព័ត៌មាន ការបញ្ចេញមតិលើបណ្ដាញសង្គម ការប្រើប្រាស់បណ្ដាញសង្គម ភាពសម្បូរបែបនៃស្ថាប័នព័ត៌មាន និងប្រព័ន្ធផ្សព្វផ្សាយរបស់យើង ក៏ប៉ុន្តែគ្រាន់តែអាចថា ចង្អៀត ចង្អៀតសម្រាប់ក្រុមមួយចំនួន ដែលចូលចិត្តប្រព្រឹត្តតែអំពើល្មើសទៅនឹងច្បាប់ អាចថា ក្រុម​មួយចំនួនតូច ដែលតែងធ្វើសកម្មភាពក្នុងចេតនានយោបាយ ដោយបំពានច្បាប់អាហ្នឹងគឺថា ចង្អៀត ចង្អៀតសម្រាប់ក្រុមហ្នឹង ហើយដែលពួកគេតែងតែប្រឈមមុខ និងការទទួលខុសត្រូវតាមផ្លូវច្បាប់»។

បើតាមមន្ត្រីជាន់ខ្ពស់ក្រសួងយុត្តិធម៌រូបនេះ សម្រាប់ប្រជាពលរដ្ឋទូទៅភាគច្រើន និងបណ្ដាញផ្សព្វ​ផ្សាយភាគច្រើន ដែលគោរពអនុវត្តច្បាប់បានត្រឹមត្រូវ គឺមិនមានបញ្ហាអ្វីនោះឡើយ។

លោក ជិន ម៉ាលីន បានបញ្ជាក់ទៀតថា «គឺថា លំហសេរីភាព ប្រជាធិបតេយ្យ ការផ្សព្វផ្សាយគឺបរិបូរ​ណ៌ សម្រាប់ពួកគេ ហើយលើកលែងតែមួយក្រុមតូច ដែលមានចេតនាអាក្រក់ ហើយប្រើប្រាស់សិទ្ធិសេរីភាពហ្នឹង គឺថា ជារបាំងក្នុងការប្រព្រឹត្តនូវអំពើល្មើស អាហ្នឹងគឺថា ត្រូវប្រឈមមុខតាមផ្លូវច្បាប់»៕