គោក្របីចំនួនជិត ៣ ម៉ឺនក្បាលបានចាក់វ៉ាក់សាំងការពារជំងឺឆ្លង

គោក្របីចំនួន ២៧.៣០១ ក្បាលត្រូវបានមន្ត្រីបសុព្យាបាលសត្វខេត្តស្ទឹងត្រែង សហការជាមួយមន្ត្រីបសុព្យាបាលសត្វ  និងមន្ត្រីស្ម័គ្រចិត្តសត្វភូមិ ឃុំ ចុះចាក់វ៉ាក់សាំងបង្ការជំងឺឆ្លង ត្រូវប្រមូលគោក្របីឱ្យមកនៅផ្តុំគ្នាងាយស្រួលក្នុងការចាក់ថ្នាំបានលឿនទប់ស្កាត់ជំងឺឆ្លង។

លោក ទុំ នីរ៉ូ ប្រធានមន្ទីរកសិកម្មរុក្ខាប្រមាញ់និងនេសាទខេត្តស្ទឹងត្រែងបានបញ្ជាក់ថា៖ រហូតមកដល់ថ្ងៃទី ៣១ ខែកញ្ញានេះ មន្ត្រីជំនាញបានចុះចាក់វ៉ាក់សាំងបង្ការជំងឺឆ្លងសត្វគោក្របីបានជិត៣ម៉ឺនក្បាល។

លោកថាមន្ត្រីជំនាញបាននាំបន្ថែមទៅគ្រប់កសិករយើងទាំងអស់ស្តីពីការចិញ្ចឹមសត្វត្រូវការថែទាំ និងធ្វើជីវអនាម័យសត្វជាប្រចាំដើម្បីបង្ការមេរោគឆ្លងដ៏សត្វ។

លោកបន្តថា៖ ការចិញ្ចឹមសត្វខ្វះការថែទាំ ធ្វើឱ្យសត្វពាហនៈ គ្រប់ប្រភេទកើតជំងឺឆ្លង ហើយមិនបានចាក់ថ្នាំវ៉ាក់សាំង និងថ្នាំព្យាបាលបង្កឱ្យសត្វមួយចំនួនងាប់ខាតបង់ផលប្រយោជន៍។  

លោកបន្តថា៖ ករណីនេះមានបងប្អូនខ្លះស្តាយបាននាំយកសត្វដែលងាប់នោះទៅលក់ ឬកាប់វាយកសាច់មកបរិភោគ  ប្រការនេះត្រូវជៀសវាងឱ្យបាន ព្រោះមន្ត្រីជំនាញបានចុះទៅណែនាំផងនិងចាក់វ៉ាក់សាំងបង្ការជំងឺឆ្លងសត្វផង។ក្រុមការងារមន្ត្រីជំនាញបសុព្យាបាល នៃមន្ទីរកសិកម្មរុក្ខាប្រមាញ់ និងនេសាទខេត្ត យើងបានដើរចុះទៅ ចាក់នៅតាមបណ្តាស្រុក ក្រុង ស្ទើតែជំវិញទៅហើយ។

លោក សៀង មេងហ៊ង ប្រធានការិយាល័យផ្នែកបសុព្យាបាលសត្វនៃមន្ទីរកសិកម្មរុក្ខប្រមាញ់និងនេសាទខេត្តបានបញ្ជាក់ថា៖ នៅឆ្នាំ២០២៣តាមរបាយការណ៍ផ្តល់ដំណឺងពីស្រុកសេសាននិងស្រុកសៀមប៉ាងមក មានសត្វងាប់ចំនួន២៣ក្បាលហើយ ក្នុងនោះមានក្របី១៨ក្បាល និងគោ៥ក្បាល។

លោកបនុ្តថា៖ ដោយសារពាក់ព័ន្ធនិងទំនៀមទំលាប់  ជាប្រពៃណីរបស់បងប្អូនប្រជាពលរដ្ឋមួយចំនួននៅខេត្តស្ទឹងត្រែងចិញ្ចឹមសត្វ គោ ក្របីជាលក្ខណៈយថាផល លែងចោល ពាសវាលពាសកាលស៊ីស្មៅទៅតាមទីវាល ហើយមិនមានក្រោលត្រឹមត្រូវនោះទេ ករណីនេះ សត្វមួយចំនួនបានឈឺស្លាប់បន្តបន្ទាប់ជារៀងរាល់ឆ្នាំ។

លោក ច្រាច ឃឿន មន្ត្រីស្ម័គ្រចិត្តសត្វភូមិ ក្បាលរមាស បានបញ្ចាក់ថា៖ កិច្ចការងារនេះលោកតែប្រាប់ប្រជាពលរដ្ឋជាម្ចាស់គោក្របី ជារឿយៗ នៅមុនពេលយើងទៅចាក់វ៉ាក់សាំង តែបងប្អូនយើងមួយចំនួនមិនបានអនុវត្តតាមទេ។

លោកបន្តថា៖គោក្របីលែងដើផ្តេសផ្តាសបង្កភាពលំបាកធ្វើឱ្យការងារទប់ស្កាត់ករណីជំងឺឆ្លងគោក្របី ដូចជាដុំពក -អ៊ុតក្តាម-សាទឹក-បូសខ្យល់-អនុវត្តទៅមិនបានជោគជ័យ។

សូមបញ្ជាក់ថា៖ គិតមកដល់ថ្ងៃទី២១សីហា កន្លងមកនេះ មន្ត្រីបសុព្យាបាលសត្វបានចាក់វ៉ាក់សាំងគោក្របី បានចំនួន ២៧.៣០១ ក្បាល-ក្នុងនោះវ៉ាក់សាំងសារទឹក គោបានចំនួន១៤.៥៣១ក្បាល ក្របីបាន ៧.៣៣២ ក្បាល-វ៉ាក់សាំងអ៊ុតក្តាមគោបាន២.២២០ក្បាល ក្របី ១.៩០០ក្បាល- វ៉ាក់សាំងបូសខ្យល់គោបាន១.៣១៨ក្បាល៕

អត្ថបទ៖ ងិនលីម