CDC អនុម័តគម្រោង ២៣ ទំហំទុនជិត ៥០០លានដុល្លារ ក្នុងខែសីហា

នៅក្នុងខែសីហាឆ្នាំ២០២៣នេះ ក្រុមប្រឹក្សាអភិវឌ្ឍន៍កម្ពុជា ហៅកាត់(CDC) បានអនុម័តចំនួន២៣គម្រោង មានទុនចំនួន៤៨៤,៨លានដុល្លារ ដោយបានបង្កើតការងារចំនួន៣៥០៥០កន្លែង មានការកើនឡើង បើធៀប ទៅនឹងខែកក្កដាកន្លងទៅ។

បើតាមរបាយការណ៍ប្រចាំថ្ងៃរបស់ CDC បានឱ្យដឹងថា ចំនួននេះ បើធៀបទៅនឹងខែកក្កដា កន្លងទៅ ឃើញថា មានការកើនឡើង១៤គម្រោង និងទុនវិនិយោគកើនឡើងជាង ៤០០លានដុល្លារ ខណៈខែកក្កដា CDC បានអនុម័ត គម្រោងវិនិយោគចំនួន ៩ គម្រោងដែលមានទុនវិនិយោគចំនួន៧៧,៤លានដុល្លារ ដោយផ្តល់ឱកាសការងារ ជូនដល់ ប្រជាពលរដ្ឋចំនួន១៧០២៩កន្លែងប៉ុណ្ណោះ។

ក្នុងចំណោមគម្រោងចំនួន២៣ក្នុងនោះគម្រោងធំជាងគេគឺ គម្រោងបង្កើតរោងចក្រផលិតស៊ីម៉ង់តិ៍ នៅខេត្តកំពង់ ស្ពឺមានទុនវិនិយោគ ២៥៨លានដុល្លារនិងអាចបង្កើតការងារបានចំនួន ៤៦៨កន្លែង។

គម្រោងសាងសង់ និងអាជីវកម្មសណ្ឋាគារថ្នាក់ផ្កាយ ៥ ចំនួន ២៣៧បន្ទប់នៅរាជធានីភ្នំពេញមានទុនវិនិយោគ៨៤,៥ លានដុល្លារ និងអាចបង្កើតការងារបានចំនួន ៨៥៥កន្លែង។គម្រោងបង្កើតរោងចក្រផលិតស្បែកជើង នៅខេត្តកំពង់ ចាមមានទុនវិនិយោគប្រមាណ ២០,៥លានដុល្លារនិងអាចបង្កើតការងារបានចំនួន ៤.៨៧០កន្លែង។

គម្រោងបង្កើតរោងចក្រផលិតសម្ភារៈប្រើប្រាស់ (ធ្នើ កន្ត្រក…) ពីដែក និងប្លាស្ទីកមានទុនវិនិយោគប្រមាណ ១០,៧ លានដុល្លារអាម៉េរិក និងអាចបង្កើតការងារបានចំនួន ៤.៨៧០កន្លែង៕

អត្ថបទ ៖ សំអឿន