អាជ្ញាធរ​ខេត្ត​បាត់ដំបង​សម្រុកជួសជុល ​ច្រាំងស្ទឹងសង្កែ មុនរដូវទឹកជំនន់

ប៉ុន្មានខែកន្លងមកនេះគេសង្គេតឃើញថា​រដ្ឋបាលខេត្តបាត់ដំបង បានដាក់កម្លាំងនិងគ្រឿងចក្រចុះជាច្រើន​កន្លែង​តាមបណ្តោយ​ដងស្ទឹងសង្កែត្រង់ចំណុច ដែលមានច្រាំងបាក់ស្រុត​ដើម្បីធ្វើការជួសជុលនិងស្ថាបនា។

កន្លងមក​ទីតាំងជាច្រើនកន្លែង​ត្រូវបានស្ថាបនារួចរាល់ ដើម្បីទប់ស្កាត់ការបាក់ស្រុតដែលបណ្តាល​ឲ្យ​ខូចទាំងផ្លូវថ្នលថែមទៀត។ ប៉ុន្តែដំណាក់កាលចុងក្រោយនេះ​រដ្ឋបាលខេត្តបានបញ្ជា​ឲ្យ​ក្រុមការងារ ធ្វើការសម្រុកជួសជុល​ឲ្យ​បានឆាប់រហ័សដោយសារ​​តែពេលនេះគឺជារដូវវស្សា និងម្យ៉ាងទៀតខ្លាចទឹកជំនន់ជន់​មកដល់​គឺជាឧបសគ្គរារាំងដល់ការងារនេះផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្តែង​ច្រាំងស្ទឹងត្រើយខាងកើត ត្រង់ចំណុចភោជនីយដ្ឋាន អាស៊ានបៀ ក្នុងភូមិរំចេក ៤ សង្កាត់រតន: ក្រុងបាត់ដំបង គឺជាប្រភេទដីរអិលដែលពិបាកក្នុងការជួសជុល និងមានប្រវែងប្រមាណជិត ៥០ ម៉ែត្រ គឺបានស្ថាបនារួចម្តងហើយ ប៉ុន្តែដើម្បីរក្សាគុណភាព​ឲ្យ​បានរឹងមាំ ក្រុមការងារបានបុកគ្រឹះបន្ថែមទៀត​ដើម្បីទប់ច្រាំងស្ទឹងផង និង​ធ្វើខឿន​ឆ្នេរស្ទឹងផងដែរ គឺបង្កើននូវសោភ័ណភាពមាត់ស្ទឹងសង្កែ ដើម្បីទុកជាកន្លែងអង្គុយកម្សាន្ត​មើលទេសភាពនាពេលរាត្រី។

ប្រជាពលរដ្ឋក្នុងក្រុងបាត់ដំបងសង្ឃឹមថា តទៅមុខមាត់ស្ទឹងសង្កែនឹង​ប្រែមុខមាត់ថ្មីជាក់ជាមិនខាន ដោយសារការកែប្រែ និងការកសាងនូវហេដ្ឋារចនាសម្ព័ន្ធថ្មីៗជាច្រើនពីរដ្ឋបាលខេត្ត និងថ្នាក់ដឹកនាំធំៗដែលបានគិតគូររហូតដល់ពេលនេះ៕

អត្ថបទ៖ សោ និយមរ័ត្ន