សហគ្រិនខ្មែរ ចាប់ដៃជាមួយអង្គការ ELIX និង Reactor School ពង្រឹងសមត្ថភាព​យុវជនកម្ពុជា​ ក្នុងភាពជាសហគ្រិន

សហគ្រិនខ្មែរ សហការជាមួយ អង្គការឯកទេស ភាពជាអ្នកដឹកនាំ នវានុវត្តន៍ បរិវត្តកម្ម Expert Leadership Innovation Exchange (ELIX) ដែល​ជាដៃគូ​អនុវត្តគម្រោងអភិវឌ្ឍកម្លាំង​ពលកម្មឌីជីថល​របស់ទីភ្នាក់ងារ​អភិវឌ្ឍន៍អន្តរជាតិ សហរដ្ឋអាមេរិក (USAID) និងសាកលវិទ្យាល័យ Carlifornia Berkeley’s Hass Bussiness School Faculty Reactor School មានមូលដ្ឋាននៅប្រទេស​សិង្ហបុរីឯកទេស ក្នុងការអប់រំ​សហគ្រិនភាព និងនវានុវត្តន៍ សម្រាប់យុវជន​អាយុក្រោម ៣០ឆ្នាំ បានប្រកាសប្រកាសបើក ដំណើរការកម្មវិធី​សហគ្រិនភាព​ចំនួន ២ សម្រាប់និស្សិតថ្នាក់បរិញ្ញាបត្រ ក្នុងគោលបំណងពង្រឹងប្រព័ន្ធអេកូឡូស៊ី សហគ្រិនភាព និងនវានុវត្តន៍នៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមសហគ្រិនខ្មែរ គំនិតផ្តួចផ្តើមនេះនឹងសហការរួមគ្នាជាមួយគ្រឹះស្ថានឧត្តមសិក្សាចំនួន 0៨ នៅទូទាំងប្រទេស រួមមាន សាកលវិទ្យាល័យជាតិគ្រប់គ្រង វិទ្យាស្ថានបច្ចេកវិទ្យាកម្ពុជា សាកលវិទ្យាល័យអាស៊ីអាគ្នេយ៍ សាកលវិទ្យាល័យ​ស្វាយរៀង វិទ្យាស្ថានពាណិជ្ជសាស្ដ្រ​អេស៊ីលីដា សាកលវិទ្យាល័យជាតិជាស៊ីមកំចាយមារ សាកលវិទ្យាល័យអាមេរិកាំងភ្នំពេញ និងវិទ្យាស្ថានបច្ចេកវិទ្យាគិរីរម្យ។

កម្មវិធី Entrepreneurship Lean Launchpad (ELL) នឹងបណ្ដុះបណ្ដាលនិស្សិតតាមរយៈ​វិធីសាស្ដ្រ Lean Launchpad ដែលផ្តោតលើការកំណត់បញ្ហាតាមរយៈការសម្ភាស​អ្នកពាក់ព័ន្ធ​ជាច្រើន បន្ទាប់មកបង្កើត និងធ្វើ​ពាណិជ្ជកម្មដំណោះស្រាយបច្ចេកវិទ្យា​ដែលដោះស្រាយបញ្ហាជាក់ស្តែងនៅក្នុងទីផ្សារកម្ពុជា។ កម្មវិធីនេះត្រូវបាន​សហការអនុវត្តដោយ អង្គការឯកទេស ភាពជាអ្នកដឹកនាំ នវានុវត្តន៍ បរិវត្តកម្ម (ELIX) ដោយរំពឹងថា នឹងបង្កើត​ស្ថាបនិកបច្ចេកវិទ្យាវ័យក្មេងចំនួន ៣០នាក់។

កម្មវិធីសហគ្រិនមហាវិទ្យាល័យ (UNIPRENEUR Program) គឺជាកម្មវិធី​សហគ្រិនភាព​ដែលគាំទ្រដល់និស្សិត សាកលវិទ្យាល័យ តាមរយៈការផ្ដល់ជាឧបករណ៍ ការប្រឹក្សា និងការណែនាំ ដើម្បីប្រែក្លាយគំនិតចាប់ផ្តើម អាជីវកម្មរបស់​ពួកគេឲ្យក្លាយជាការពិត។ កម្មវិធីនេះត្រូវបានអនុវត្តដោយ Reactor School។ កម្មវិធីនេះមានគោលបំណង​បណ្តុះ​បណ្តាល​និស្សិតសាកលវិទ្យាល័យប្រមាណ ១២០ នាក់ គាំទ្រក្នុងការបង្កើតគំនិត​ធុរកិច្ចថ្មី ដែលស្ថិតក្នុងដំណាក់​កាលដំបូងចំនួន​ ៣០ និងបំពាក់បំប៉នគ្រូចំនួន ២០ នាក់លើ​ជំនាញ និងចំណេះដឹងសំខាន់ៗ ទាក់ទង​នឹង​សហគ្រិន​ភាព។

លោកបណ្ឌិត ឈៀង វណ្ណមុនិណ្ឌ នាយកប្រតិបត្តិនៃសហគ្រិនខ្មែរ បានលើកឡើងថា កម្មវិធី Entrepreneurship Lean Launchpad និងកម្មវិធីសហគ្រិនមហា​វិទ្យាល័យ ត្រូវបានរៀបចំឡើងដើម្បី ជំរុញសហគ្រិនជំនាន់ថ្មី​តាមរយៈ​ការលើកកម្ពស់ ការស្រាវជ្រាវនិងនវានុវត្តន៍ដោយផ្អែកលើតម្រូវការនៃឧស្សាហកម្ម ការផ្ទេរបច្ចេកវិទ្យា និងការ​កសាង​សមត្ថភាពសហគ្រិនចំពោះនិស្សិតសាកលវិទ្យាល័យ។ សហគ្រិនខ្មែរ គាំទ្រក្នុងកិច្ច​សហការអនុវត្តកម្មវិធីទាំង​ពីរក្រោមភាពជាដៃគូជាមួយ ELIX និង Reactor School ដើម្បីនាំយកកម្មវិធីសហគ្រិនភាពកម្រិតសាកលវិទ្យាល័យ មកជួយ​សហគ្រិនវ័យក្មេងក្នុងការបំប្លែងគំនិតច្នៃប្រឌិតរបស់ពួកគេទៅជាដំណោះស្រាយសមស្រប  ឆ្លើយតបតម្រូវ​ការទីផ្សារ។

លោក ប៉ែន ចាន់ដា ប្រធានផ្នែកអភិវឌ្ឍន៍ពី USAID DWD បានលើកឡើងថា កម្មវិធី Entrepreneurship Lean Launchpad នឹងនាំយកអ្នកជំនាញការពីសាកលវិទ្យាល័យ Carlifornia Berkeley’s Hass Bussiness School Faculty ដែលមានបទពិសោធន៍​ក្នុងការបង្រៀនកម្មវិធីនេះទូទាំងពិភពលោក។ Launchpad គឺជាវិធី​សាស្រ្ដថ្មីមួយ​ដែលខុសប្លែកពីរបៀបបង្កើតអាជីវកម្មថ្មី ផ្សេងៗទៀត។ លោកសង្ឃឹមថា វិធីសាស្រ្ដ Launchpad អាចទាក់ទាញនិស្សិតដែលមានការគិតបែបឯករាជ្យ និងបែបនវានុវត្តន៍​ដែលនឹងអាចយកឈ្នះលើ​គំនិតសហគ្រិនភាព​ដែលមានភាពលម្អៀង។

លោក Rusydi Khairul សហស្ថាបនិក និងជានាយកប្រតិបត្តិនៃក្រុមហ៊ុន Reactor Group បានសម្តែងក្តីរំភើប​រីករាយ​ដែលបានចាប់ដៃគូជាមួយ​សហគ្រិនខ្មែរ​ដើម្បីណែនាំយកកម្មវិធីសហគ្រិនមហាវិទ្យាល័យ ឬ UNIPRENEUR មកប្រទេសកម្ពុជា។  កិច្ចសហការនេះ នឹងផ្តល់ឲ្យ​អ្នកដែលមានបំណងក្លាយជាសហគ្រិន នូវលទ្ធភាពទទួលបាន​ធនធាន និងការបង្ហាត់បង្រៀនដែលមិនអាចកាត់ថ្លៃបាន និង​ជួយជំរុញ​ពួកគេ ឲ្យមានគំនិតច្នៃប្រឌិតអាជីវកម្មជោគជ័យ៕