រដ្ឋមន្រ្តីកសិកម្មជំរុញបង្កើតពូជស្រូវសុទ្ធ ដើម្បីទទួលផលចំណេញខ្ពស់ ជួយសេដ្ឋកិច្ចជាតិ

រដ្ឋមន្រ្តីក្រសួងកសិកម្ម លោក ឌិត ទីណា បានណែនាំឱ្យមានការសហការគ្នាល្អរវាងភាគីពាក់ព័ន្ធ និងកសាង បណ្តាញពូជស្រូវសុទ្ធ ពិសេសពូជស្រូវសែនក្រអូប និងផ្ការំដួល ដែលមានតម្លៃថ្លៃ មានការចុះបញ្ជី មានវិញ្ញាបនបត្រ ត្រឹមត្រូវ មានខ្សែច្រវាក់ទីផ្សារល្អ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើសពីនេះទៀត ក៏បានជំរុញឱ្យកសិករប្រើប្រាស់ពូជស្រូវសុទ្ធនេះ និងប្រមូលទិញមកវិញ តាមតម្លៃកិច្ចសន្យា។ បើតាមលោករដ្ឋមន្រ្តី ការធ្វើបែបនេះ ដើម្បីជួយដល់កសិករឱ្យមានទីផ្សារ ទទួលបានផលចំណេញទាំងអស់គ្នា និងជួយដល់សេដ្ឋកិច្ចជាតិ។

លោក ឌិត ទីណា លើកឡើងបែបនេះ កាលពីថ្ងៃទី១០ ខែកញ្ញា ឆ្នាំ២០២៣ នៅពេលចុះជួបពិភាក្សាការងារជាមួយ លោក សុខ លូ អភិបាល នៃគណៈអភិបាលខេត្តបាត់ដំបង និងឧកញ៉ា ភូ ពុយ ម្ចាស់រោងម៉ាស៊ីនកិនស្រូវប៉ៃតងកម្ពុជា ខេត្តបាត់ដំបង ដើម្បីសិក្សាស្វែងយល់ពីស្ថានភាពពិតប្រាកដនៃតម្លៃស្រូវអង្ករ។

រដ្ឋមន្រ្តីក្រសួងកសិកម្ម ក៏បានបន្តចុះពិនិត្យកសិដ្ឋានផលិតពូជស្រូវទួលសំរោង ស្ថិតក្នុងឃុំបឹងព្រីង ស្រុកថ្មគោល ខេត្តបាត់ដំបងផងដែរ។

ក្នុងពេលចុះពិនិត្យឃ្លាំងស្តុកស្រូវ ឡសម្ងួត គ្រឿងចក្រកសិកម្ម និងសិក្សាពីដំណើរការនៃការផលិតពូជស្រូវរួចមក លោក ឌិត ទីណា បានជំរុញឱ្យយកចិត្តទុកដាក់ផលិតពូជស្រូវល្អ សែនក្រអូប និងផ្ការំដួល ដើម្បីឆ្លើយតបនឹងតម្រូវការទីផ្សារ និងការប្រើប្រាស់ផងដែរ៕

អត្ថបទ៖ ផល ធារិត