នាយករដ្ឋមន្រ្តីថ្មីថៃ នឹងមកបំពេញទស្សនកិច្ចនៅកម្ពុជានាចុងខែនេះ

លោក សេដ្ឋា ថាវីស៊ីន (Srettha Thavisin) នាយករដ្ឋមន្រ្តីថៃ នឹងមកបំពេញទស្សនកិច្ចនៅក្នុងប្រទេសកម្ពុជា នាចុងខែកញ្ញា ឆ្នាំ២០២៣នេះ។ ដំណឹងនៃដំណើរទស្សនកិច្ចរបស់នាយករដ្ឋមន្រ្តីថ្មីថៃនៅកម្ពុជានេះ ត្រូវបានបញ្ជាក់ឲ្យដឹងនៅក្នុងសេចក្តីប្រកាសព័ត៌មានរបស់ក្រសួងការបរទេសកម្ពុជាកាលពីថ្ងៃអាទិត្យ ម្សិលមិញ។

ដំណើរទស្សនកិច្ចរបស់នាយករដ្ឋមន្រ្តីថៃនេះ ត្រូវបានជជែកពិភាក្សាគ្នានៅក្នុងជំនួបលោកសារ៉ាន់ ចារើនសុវណ្ណ លេខាធិការអចិន្ត្រៃយ៍នៃក្រសួងការបរទេសថៃ និងលោកស្រីបណ្ឌិត សឿង រដ្ឋចាវី រដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ នៅក្នុងទីក្រុងបាងកក ប្រទេសថៃ។ លោកស្រីបណ្ឌិត សឿង រដ្ឋចាវី បានដឹកនាំគណៈប្រតិភូទៅបំពេញទស្សនកិច្ចការងារ នៅទីក្រុងបាងកកកាលពីថ្ងៃទី១៤ ដល់ថ្ងៃទី១៥ ខែកញ្ញា ឆ្នាំ២០២៣។​

នៅក្នុងជំនួបនោះ លោកស្រីបណ្ឌិត រដ្ឋលេខាធិការ និងលោកលេខាធិការអចិន្ត្រៃយ៍នៃក្រសួងការបរទេសថៃ បានពិភាក្សាយ៉ាងផុសផុលអំពីទំនាក់ទំនង និងកិច្ចសហប្រតិបត្តិការទ្វេភាគីរវាងព្រះរាជាណាចក្រកម្ពុជា និងព្រះរាជាណាចក្រថៃ លើគ្រប់វិស័យ ដូចជា នយោបាយ សន្តិសុខ សេដ្ឋកិច្ច ពាណិជ្ជកម្ម វិនិយោគ អប់រំ ទេសចរណ៍ ការងារ ការដោះមីន និងកិច្ចសហប្រតិបត្តិការផ្នែកបច្ចេកទេស។ ភាគីទាំងពីរ បានផ្តោតការពិភាក្សាអំពីការត្រៀមរៀបចំដំណើរទស្សនកិច្ចផ្លូវការរបស់លោក សេដ្ឋា ថាវីស៊ីន នាយករដ្ឋមន្ត្រីនៃព្រះរាជាណាចក្រថៃ មកកាន់ព្រះរាជាណាចក្រកម្ពុជា នៅចុងខែកញ្ញា ឆ្នាំ២០២៣ ខាងមុខនេះ។

មន្រ្តីតំណាងក្រសួងការបរទេសនៃប្រទេសទាំង២ បានបង្ហាញជំនឿយ៉ាងមុតមាំថា​ ក្រោមការដឹកនាំប្រកបដោយគតិបណ្ឌិត និងចក្ខុវិសយ័របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោក សេដ្ឋា ថាវីស៊ីន នាយករដ្ឋមន្ត្រី នៃព្រះរាជាណាចក្រថៃ គឺទំនាក់ទំនងមិត្តភាព និង កិច្ចសហប្រតិបត្តិការទ្វេភាគីដ៏ល្អប្រសើររវាងប្រទេសទាំងពីរ នឹងកាន់តែត្រូវបានបន្តពង្រឹង និងពង្រីកបន្ថែមទៀត ដើម្បីផលប្រយោជន៍របស់ប្រជាជនទាំងពីរ៕