ក្រសួងសុខាភិបាល និង WHO ពិគ្រោះយោបល់ គ្រប់គ្រងព័ត៌មានគ្រោះអាសន្នសុខភាពសាធារណៈ

ក្រសួងសុខាភិបាល នៃព្រះរាជាណាចក្រកម្ពុជា រួមជាមួយមន្ត្រីពាក់ព័ន្ធ នៃអង្គការសុខភាពពិភពលោក WHO និងប្រចាំនៅកម្ពុជា បានអញ្ជើញចូលរួមពិធីបើកសិក្ខាសាលា ពិគ្រោះយោបល់ លើការៀបចំនិតិវិធីប្រតិបត្តស្តង់ដា ស្តីពី ការគ្រប់គ្រងព័ត៌មានពាក់ព័ន្ធហានិយភ័យគ្រោះអាសន្នសុខភាពសាធារណៈ (Infodemic) ក្នុងគោលបំណង វិភាគលើហេតុផលជាក់ស្តែង សំដៅគ្រប់គ្រងព័ត៌មានទាំងនោះ ដើម្បីបន្ថយផលប៉ះពាល់លើឥរិយាបទដែលត្រូវប្រកាន់យក ពេលមានគ្រោះអាសន្នសុខភាពសាធារណៈ។

ពិធីនេះប្រារព្ធនៅ ខេត្តកំពង់ចាម​ នាព្រឹកថ្ងៃទី២១ ខែកញ្ញា ឆ្នាំ២០២៣ ដោយមានការចូលរួម វេជ្ជបណ្ឌិត ហុក គឹមចេង អគ្គនាយកបច្ចេកទេសសុខាភិបាល, លោកស្រី Lisa Smyth​ មន្រ្តីសម្របសម្រួលការប្រាស្រ័យទាក់ទងសុខភាព និងជាតំណាងអង្គការសុខភាពពិភពលោកប្រចាំនៅកម្ពុជា, លោកវេជ្ជបណ្ឌិត Fernan Talamayan ជំនាញការផ្នែក Infodemic Management, Emergencies Programme, របស់អង្គការសុខភាពពិភពលោក ព្រមទាំងមន្រ្តី នាយកដ្ឋានប្រយុទ្ធនឹងជំងឺឆ្លង នាយកដ្ឋានការពារសុខភាព​ និងអង្គភាពពាក់ព័ន្ធ។

គួរបញ្ជាក់ថា ក្រសួងសុខាភិបាល នៃព្រះរាជាណចក្រកម្ពុជា បានចាប់ផ្តើមរៀបចំនីតិវិធីប្រតិបត្តស្តង់ដា ស្តីពី ការគ្រប់គ្រងព័ត៌មានពាក់ព័ន្ធហានិយភ័យគ្រោះអាសន្នសុខភាពសាធារណៈ (Infodemic) មុនគេក្នុងបណ្តាប្រទេសក្នុងតំបន់ និងស្របតាមយុទ្ធសាស្រ្តជាអាទិភាពរបស់ សាស្រ្តចារ្យ ឈាង រ៉ា រដ្ឋមន្រ្តីក្រសួងសុខាភិបាល គឺបង្កើនសកម្មភាពអប់រំសុខភាពជូនប្រជាពលរដ្ឋ ដើម្បីលើកកម្ពស់សុខភាពជូនប្រជាជនឱ្យកាន់តែប្រសើរឡើង និងទប់ស្កាត់នឹងការរីករាលដាលជំងឺឆ្លងជាសាកលដែលកើតមានឡើង។