កម្ពុជា បញ្ចុះអត្រាអាករនាំចេញទំនិញ​ថ្មធម្មជាតិ ដើម្បីប្រកួតប្រជែង​លើទីផ្សារអន្តរជាតិ

សម្តេចធិបតី ហ៊ុន ម៉ាណែត បានចុះហត្ថលេខាលើអនុក្រឹត្យ អនុញ្ញាតឱ្យបញ្ចុះអត្រាអាករនាំចេញលើមុខទំនិញ​ថ្មធម្មជាតិសម្រាប់នាំចេញមួយចំនួន ក្នុងគោលដៅជួយសម្រាលបន្ទុកដល់ក្រុមហ៊ុននាំចេញថ្មធម្មជាតិ និងជួយ​ដល់ការប្រកួតប្រជែងនៃផលិតផលថ្មធម្មជាតិខ្មែរ នៅលើទីផ្សារអន្តរជាតិ។

ការបញ្ចុះអត្រាអាករនាំចេញលើមុខទំនិញថ្មធម្មជាតិខ្មែរនេះ ក្រោយពីសម្តេច ហ៊ុន ម៉ាណែត និងគណប្រតិភូ ចុះពិនិត្យតាម​ស្តង់ពិពណ៌លក់ផលិតផលរបស់កម្ពុជា នៅទីក្រុងណាននីង ប្រទេសចិន ក្នុងឱកាសចូល​រួមពិព័រណ៍​អាស៊ាន-​ចិនលើកទី២០ កាលពីថ្ងៃទី១៧ កញ្ញា កន្លងទៅថ្មីៗនេះ បានជួបជាមួយតំណាង​ក្រុមហ៊ុន​ធ្វើអាជីវកម្មថ្មធម្មជាតិ​នៅកម្ពុជា ដែលពេលនោះ តំណាងក្រុមហ៊ុន បានស្នើឱ្យរាជរដ្ឋាភិបាលកម្ពុជា ពិនិត្យ​លទ្ធភាពផ្តល់ការជួយបន្ថែម​ដល់ការធ្វើអាជីវកម្មថ្មធម្មជាតិនៅកម្ពុជា។

ជាការឆ្លើយតបទៅនឹងសំណូមពរនោះ ក៏ដូចជាសំណូមពរស្រដៀងគ្នាពីក្រុមហ៊ុនផ្សេងទៀតនៅកម្ពុជាដែលសម្តេច បានទទួលកន្លងមក សម្តេចក៏បានប្រគល់ភារកិច្ចជូនលោក អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច ដើម្បីសម្រប​សម្រួលកិច្ចប្រជុំរវាងស្ថាប័នពាក់ព័ន្ធដែលរួមមានក្រសួងសេដ្ឋកិច្ច និងហិរញ្ញវត្ថុ និងក្រសួងរ៉ែនិងថាមពល ជាមួយនិងសមាគមថ្មក្រានិតកម្ពុជា និងក្រុមហ៊ុនធ្វើអាជីវកម្មថ្មអារ ដើម្បីស្តាប់នូវកង្វល់និងសំណូមពរផ្សេងៗ និងដើម្បីដាក់ចេញនូវដំណោះស្រាយសមស្របនិងទាន់ពេលវេលា ក្នុងគោលបំណងជំរុញការធ្វើអាជីវកម្មថ្មធម្មជាតិ និងការនាំចេញថ្មធម្មជាតិ ឲ្យបានកាន់តែប្រសើរឡើង។

ជាលទ្ធផល កិច្ចប្រជុំបានរៀបចំជាសំណើរដើម្បីសុំគោលការណ៍សម្រេចរបស់រាជរដ្ឋាភិបាល ដែលថ្ងៃនេះ សម្តេច ហ៊ុន ម៉ាណែត បានចុះហត្ថលេខាលើអនុក្រឹត្យ អនុញ្ញាតឱ្យបញ្ចុះអត្រានាំចេញលើមុខទំនិញនាំចេញមួយចំនួន ក្នុងគោលដៅ​ជួយសម្រាលបន្ទុកដល់ក្រុមហ៊ុននាំចេញថ្មធម្មជាតិ និងជួយដល់ការប្រកួតប្រជែង​នៃផលិតផលថ្មធម្មជាតិ​របស់ខ្មែរ នៅលើទីផ្សារអន្តរជាតិ។

យោងតាមរបាយការណ៍គយ និងរដ្ឋាករកម្ពុជា បានបង្ហាញថា គិតត្រឹមរយៈពេល ៨ខែ ឆ្នាំ ២០២៣ ការនាំ​ចេញគុជខ្យងធម្មជាតិ ឬចិញ្ចឹម ត្បូងថ្មមានតម្លៃ ឬមានតម្លៃមធ្យម សម្រេចបានប្រមាណជាង ៦៥៨លានដុល្លារ កើនឡើងជាង ២៥៤ភាគរយ បើធៀបនឹងរយៈពេលដូចគ្នាកាលពីឆ្នាំ ២០២២ មានចំនួនជាង ១៨៥លានដុល្លារ៕