គ្រួសារកំពុងតាមរកសព ក្រោយបុរសម្នាក់ត្រូវទឹកហូរកួច​ទៅបាត់ នៅស្រុកថ្មគោល​ខេត្តបាត់ដំបង

បុរសម្នាក់ ត្រូវបានទឹកហូរកួចនាំយកទៅបាត់ ពេលកំពុងលេងទឹកហូរ ​នៅចំណុចបាតង់បិទបើកទ្វាទឹក ស្ថិតនៅភូមិ កៀនកែស១ ឃុំគោកឃ្មុំ ស្រុកថ្មគោល។ បន្ទាប់ពីមានករណីនេះកើតឡើង អាជ្ញាធរបានហាមអ្នក​ភូមិកុំឲ្យទៅលេងទឹកបន្តទៀត បើមិនចេះហែលទឹកដោយស្ទាត់ជំនាញ នឹងបង្កឲ្យមានគ្រោះថ្នាក់ដល់ជីវិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចប្រាប់ថា ករណីនេះបានកើតឡើង នៅថ្ងៃទី២១ ខែតុលា ឆ្នាំ២០២៣ នៅវេលាម៉ោងប្រម៉ាណជា៣ និង០០នាទី នៅ ចំណុចភូមិឃុំខាងលើ។ ជនរងគ្រោះមាន ឈ្មោះ យ៉ាន ដារ៉ា ហៅ(ព្លូង) ភេទប្រុស អាយុ ២៣ឆ្នាំ មានទីលំនៅ ភូមិប៉ោយយង់ ឃុំតាពូង ស្រុកថ្មគោល ខេត្តបាត់ដំបង ។បើតាមសាច់ញាតិ និងមិត្តភ័ក្តិជនរងគ្រោះបានប្រាប់ថា មុនកើតហេតុពួកគេបាននាំគ្នាមកលេងទឹក នៅត្រង់ចំណុចខាងលើ ខណៈដែ លកំពុងលេងសប្បាយ ជនរងគ្រោះ​ក៏បានរអិល​ជើងធ្លាក់ទៅក្នុងទឹកដែលកំពុងហូរខ្លាំងកួចយកទៅបាត់។

ហើយសាច់ញាតិជនរងគ្រោះក៏បានរាយការណ៍ជូនទៅដល់អាជ្ញាធរភូមិឃុំនិងមន្ត្រីនគរបាលប៉ុស្តិ៍ផងដែរ ។ ភ្លាមៗនោះ អ្នកភូមិជាច្រើននាក់ ក៏បាននាំគ្នាជួយរាវរកសពជនរងគ្រោះចាប់តាំងពីម៉ោង៣:០០ នាទី រសៀលរហូតដល់ម៉ោង០៦ និង០០នាទីយប់ នៅតែរកមិនឃើញ បើទោះបីមានការអុជធូបបន់ស្រន់ហើយក៏ដោយ។  

ក្រុមគ្រួសារបានបញ្ជាក់ថា បើយប់កាន់តែជ្រៅហើយនៅតែរកមិនឃើញទៀត ព្រឹកនេះ នឹងបន្តរុករកទៀត ខណៈមតិ​ពលរដ្ឋខ្លះថា ប្រហែលសពអណ្តែតចុះទៅឆ្ងាយណាស់ហើយ ព្រោះតែទឹកហូរមានកម្រិតខ្លាំង តែបើមានសម្រះ​ឬដើមឈើដុះតូចៗនៅចំណុចណាមួយតាមដងប្រឡាយ សពនឹងទើនៅចំណុចនោះ ។ ក្រុមគ្រួសារថា កំពុងបន្តតាម​រកឲ្យឃើញ ដើម្បីយកមកធ្វើបុណ្យ តាមប្រពៃណី ៕

អត្ថបទ៖ សៅ សារិទ្ធ