សម្ដេចធិបតី ហ៊ុន ម៉ាណែត ៖ ការរៀបចំអាជ្ញាធរជាតិដោះស្រាយវិវាទក្រៅប្រព័ន្ធតុលាការ ជាយន្តការបន្ថែមប្រព័ន្ធដោះស្រាយវិវាទ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ការរៀបចំអាជ្ញាធរជាតិដោះស្រាយវិវាទក្រៅប្រព័ន្ធតុលាការ គឺជាយន្តការបន្ថែមប្រព័ន្ធដោះស្រាយវិវាទ ហើយជាកិច្ចការមួយដ៏សំខាន់។ ការលើកឡើងនេះ ធ្វើឡើងក្នុងកិច្ចប្រជុំពេញអង្គគណៈរដ្ឋមន្ត្រី នៅព្រឹកថ្ងៃទី ២៧ ខែតុលា ឆ្នាំ ២០២៣នេះ។

សម្ដេចធិបតី ហ៊ុន ម៉ាណែត មានប្រសាសន៍ថា ការបង្កើតអាជ្ញាធរជាតិដោះស្រាយវិវាទក្រៅប្រព័ន្ធតុលាការ គឺជាវិធានការមួយនៃការពង្រឹង និងការលើកកម្ពស់គុណភាព និងប្រសិទ្ធភាពប្រព័ន្ធយុត្តិធម៌ ដែលជាវិធានការគន្លឹះមួយ ក្នុងចំណោមវិធានគន្លឹះទាំង ៥ ដែលរាជរដ្ឋាភិបាល នីតិកាលទី ៧ បានដាក់ចេញកាលពីកិច្ចប្រជុំពេញអង្គគណៈរដ្ឋមន្ត្រី លើកដំបូង នៅថ្ងៃទី ២៤ ខែសីហា ឆ្នាំ ២០២៣។

របៀបវារៈនេះ គឺពិតជាមានសារៈសំខាន់ដែលនឹងឆ្លើយតប ទៅនឹងតម្រូវការជាក់ស្ដែងរបស់ប្រជាពលរដ្ឋ។ ការរៀបចំ និងកិច្ចដំណើរការរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការនេះ គឺជាយន្តការបន្ថែមប្រព័ន្ធដោះស្រាយវិវាទ ហើយជាកិច្ចការមួយដ៏សំខាន់។

សម្ដេចធិបតី ហ៊ុន ម៉ាណែត មានប្រសាសន៍បន្តថា ការរៀបចំ និងកិច្ចដំណើរការរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការនេះ បង្កើតឡើងក្នុងគោលបំណង៖ ទី ១. កាត់បន្ថយការកកស្ទះសំណុំរឿងនៅតាមសាលាជម្រះក្ដី, ទី ២. បង្ខិតសេវាដោះស្រាយវិវាទឲ្យកាន់តែកៀកប្រជាពលរដ្ឋ, ទី ៣. ធានាបាននូវសុខដុម​រមនា និងយុត្តិធម៌សង្គម សម្រាប់ប្រជាពលរដ្ឋ។

សម្ដេចនាយករដ្ឋមន្ត្រី បានបញ្ជាក់ថា ការរៀបចំនូវយន្តការដ៏សំខាន់នេះ គឺបង្ហាញពីការយកចិត្តទុកដាក់របស់រាជរដ្ឋាភិបាល នៅក្នុងការដោះស្រាយបញ្ហាផ្សេងៗ ដែលឆ្លើយតបនឹងតម្រូវការរបស់ប្រជាពលរដ្ឋ ដែលត្រូវការនូវសេវាផ្សេងៗ រួមទាំងសេវាផ្លូវច្បាប់ ផងដែរ៕