ឧត្តមសេនីយ៍ឯក ហ៊ុន ម៉ានិត ណែនាំកងទ័ពឱ្យរួមគ្នាថែរក្សា និងការពារសន្តិភាពឱ្យខានតែបាន

នៅព្រឹកថ្ងៃទី៣ ខែវិច្ឆិកា ឆ្នាំ២០២៣នេះ ឯកឧត្តម ឧត្តមសេនីយ៍ឯក ហ៊ុន ម៉ានិត មេបញ្ជាការរងកងទ័ពជើងគោក និងជាអគ្គនាយកនៃអគ្គនាយកដ្ឋានស្រាវជ្រាវចារកិច្ច បានណែនាំដល់នាយទាហាន នាយទាហានរង និងពលទាហានទាំងអស់ ត្រូវប្ដេជ្ញារួមគ្នាថែរក្សា និងការពារសន្តិភាព បូរណាភាពទឹកដី បម្រើជាតិ និងប្រជាជនឱ្យបានជាដាច់ខាត។

នៅក្នុងពិធីជួបសំណេះសំណាលសួរសុខទុក្ខ និងប្រគល់អាវរងារជាអំណោយរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនដល់កងទ័ពនៃបញ្ជាការដ្ឋានយោធភូមិភាគពិសេស ឯកឧត្តម ឧត្តមសេនីយ៍ឯក ហ៊ុន ម៉ានិត បានថ្លែងថា៖ «សន្តិភាព មានភាពផុយស្រួយណាស់ ដែលអាចបាត់បង់គ្រប់ពេលវេលា ដូច្នេះយើងដាច់ ខាតប្តេជ្ញាត្រូវការពារថែរក្សាសន្តិភាពឱ្យខានតែបាន ការពារបូរណភាពទឹកដី និងប្រជាជន»។ ឯកឧត្តម បានបញ្ជាក់ថា កន្លងទៅ ប្រជាពលរដ្ឋ បានយល់យ៉ាងច្បាស់អំពីតម្លៃនៃសន្តិភាព ដោយបានទទួលស្គាល់ និងផ្តល់យុត្តិធម៏ តាមរយៈការបោះឆ្នោតគាំទ្រដ៏ច្រើនលើសលប់ជូនគណបក្សប្រជាជនកម្ពុជា ដើម្បីបន្តការដឹកនាំរាជរដ្ឋាភិបាល សម្រាប់នីតិកាល ទី៧នេះ។

ថ្លែងទៅកាន់កងទ័ព នៅព្រឹកថ្ងៃនេះ ឯកឧត្តម ឧត្តមសេនីយ៍ឯក ក៏បានណែនាំដល់កងទ័ពទាំងអស់ ត្រូវអនុវត្តតួនាទី-ភារកិច្ចឱ្យបានម៉ត់ចត់ ម៉ឺងម៉ាត់ ច្បាស់លាស់ និងចូលរួមគាំទ្រលើកំណែទម្រង់លើវិស័យយោធា កងយោធពលខេមរភូមិន្ទ និងទំនើបកម្មយោធាឱ្យកាន់តែរីកចម្រើន រឹងមាំ សំដៅបង្កើនកិត្យានុភាពលើឆាកអន្តរជាតិ និងបង្កើនសមត្ថភាពកងទ័ពក្នុងការចូលរួមទប់ស្កាត់បដិវត្តពណ៌ ឧក្រិដ្ឋកម្មឆ្លងដែន និងទប់ស្កាត់សកម្មភាពនានា ដែលប្រព្រឹត្តផ្ទុយនឹងច្បាប់ ហើយអាចជះឥទ្ធិពលដល់សន្តិភាព ស្ថិរភាពសង្គម ទាំងក្នុងប្រទេស និងតំបន់ ប្រកបដោយប្រសិទ្ធភាព និងគុណភាព។

ឧត្តមសេនីយ៍ឯក ហ៊ុន ម៉ានិត បានសង្កត់ធ្ងន់ថា ការចូលរួមគាំទ្ររបស់កងទ័ពទៅលើកំណែទម្រង់នេះ គឺជាការផ្តល់ផលប្រយោជន៍ដល់ប្រទេសជាតិយ៉ាងធំធេង និយាយជារួម និងនិយាយដោយឡែក បានចូលរួមជួយលើកស្ទួយដល់ជីវភាពរបស់កងទ័ពនៃកងយោធពលខេមរភូមិន្ទ ក្នុងបុព្វហេតុខឿនការពារជាតិ និងប្រជាជនកម្ពុជា។

ស្ថិតក្នុងឱកាសនោះ ឯកឧត្តម បានសម្តែងការអរគុណ និងកោតសរសើរចំពោះកងទព័របស់កម្ពុជាទាំងអស់ ដែលបានតែងតែចូលរួមយ៉ាងសកម្មជាមួយកងកម្លាំងផ្សេងៗទៀត ក្នុងសកម្មភាពសង្គមផ្សេងៗ និងជួយសង្គ្រោះប្រជាជន នៅពេលជួបគ្រោះមហន្តរាយ ជាដើម៕