រាជធានីខេត្តចំនួន ១១ បានប្រកាសមិនយកប្រាក់​ផ្ញើកង់​ម៉ូតូ​ពី​បេក្ខជន​ប្រឡងបាក់ឌុប

គិតត្រឹមព្រឹកថ្ងៃទី ០៤ វិច្ឆិកាឆ្នាំ ២០២៣ មានរាជធានីខេត្តចំនួន ១១ ហើយ បានប្រកាសមិនយកប្រាក់ពីការផ្ញើកង់​ម៉ូតូរបស់​បេក្ខជនប្រឡងបាក់ឌុប ដែលនឹងឈានចូលមកដល់នៅថ្ងៃទី ៦ និងថ្ងៃទី ៧ វិច្ឆកា ខាងមុខនេះ។

យោងតាមគេហទំព័រផ្លូវការរបស់ក្រសួងអប់រំយុវជន និងកីឡានៅថ្ងៃទី ០៤ វិច្ឆិកានេះបានឱ្យដឹងថា រាជធានីខេត្តដែលប្រកាស​​មិនយកប្រាក់ពីការផ្ញើកង់ម៉ូតូពីបេក្ខជនប្រឡងរួមមានរាជធានីភ្នំពេញ ខេត្តរតនគីរី មណ្ឌលគីរី សៀមរាប បាត់ដំបង បន្ទាយមានជ័យ ព្រះសីហនុ ព្រៃវែង ប៉ៃលិន កំពង់ធំ និងខេត្តពោធិ៍សាត់។

ចំណែកខេត្តផ្សេងទៀតអាចនឹងប្រកាសជាបន្តបន្ទាប់ ព្រោះថាមានខេត្តខ្លះបានប្រកាសរួចហើយ​​គ្រាន់តែមិនបាន​ផុសនៅ​លើ​ផេករបស់ក្រសួងអប់រំប៉ុណ្ណោះដូចជាខេត្តត្បូងឃ្មុំ មិនត្រឹមមិនយកប្រាក់ពីការផ្ញើកង់ម៉ូតូពីបេក្ខជនប៉ុណ្ណោះទេ ថែមទាំងផ្តល់ការស្នាក់នៅដោយ​ឥតគិតថ្លៃដល់​បេក្ខជនផងដែរ។

អ្នកនាំពាក្យក្រសួងអប់រំយុវជន និងកីឡាបានធ្វើការអំពាវនាវដល់​ម្ចាស់ផ្ទះសំណាក់ និងអាជីករ​លក់ម្ហូបអាហារ​ទាំងអស់សូម​កុំតម្លើងថ្លៃនៅក្នុងពេល​ប្រឡងបាក់ឌុប ដែលនឹងឈាន​ចូលមកដល់នៅដើមសប្តាហ៍ក្រោយនេះ។

លោកស្រី ឃួន វិច្ឆិកា អ្នកនាំពាក្យក្រសួងអប់រំយុវជន និងកីឡាបានបញ្ជាក់ថា «ការប្រឡងបាក់ឌុបនេះកន្លងមក ក្រសួងតែងតែឃើញមានការសហការច្រើនផ្នែក ពិសេសបើក្រឡេកមើលខាង​ផ្នែក​ផ្ទះសំណាក់ ម្ហូបអាហារ និងចំណតកង់ម៉ូតូជាដើម​ឃើញថា សហគមន៍អាជ្ញាធរដែនដី​ក៏បានចូលរួមយ៉ាងស្អិតរមួតដែរក្នុងការគាំទ្​រចំពោះសិស្សានុសិស្សហើយថ្មីៗនេះ​យើងឃើញថា មានការផ្សព្វផ្សាយជាផ្លូវការពីខេត្តមួយចំនួនគាត់គាំទ្រកន្លែងស្នាក់នៅ កន្លែងផ្ញើកង់ម៉ូតូដល់សិស្សជាបេក្ខជនប្រឡងទូទាំងខេត្ត ដែលចូលរួមប្រឡងហ្នឹង។ អីចឹងជាក់ស្តែងអភិបាលខេត្តត្បូងឃ្មុំជាដើមគាត់បាន​ចេញមុខប្រកាស​ព័ត៍មានថា គាត់នឹងឧបត្ថម្ភក្នុងការស្នាក់នៅ កន្លែងផ្ញើកង់ម៉ូតូដល់សិស្សទូទាំងខេត្តផងដែរ»។

យ៉ាងណាក៏ដោយលោកស្រីបានបន្តថា «ក្នុងនាមក្រសួងអប់រំយុវជននិងកីឡា ក៏សូមអំពាវនាវដល់សាធារណជនក៏ដូចជា​អាជីវករទាំងអស់ មេត្តាចូលរួមនិងសហការនិងគាំទ្រលើកទឹកចិត្តដល់សិស្សានុសិស្សរបស់យើង​ដែលជាទំពាំងស្នង​ឫស្សីរបស់កម្ពុជា ព្រោះថាពួកគាត់នឹងចូលរួមយ៉ាងសកម្មក្នុងការអភិវឌ្ឍន៍​ប្រទេសជាតិក្នុងពេលអនាគត។ អីចឹងសូម​ឱ្យគ្រប់ភាគីពាក់ព័ន្ធចូលរួមគាំទ្រពួកគាត់ក្នុងការចូលរួមប្រឡងនេះហើយក៏ដូចជាអាជីវករទាំងអស់មេត្តាចូលរួមជាមួយពួកគាត់ដែរតាមរយៈកុំតម្លើងថ្លៃផ្ទះសំណាក់ឬម្ហូបអាហារ»។

គួរបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ០៦ វិច្ឆិកា ២០២៣ មានបេក្ខជនចុះឈ្មោះប្រឡងសរុប ១៣៧ ៤១២នាក់ ស្រី៧៣ ២៧៨នាក់ មណ្ឌលប្រឡងសរុប ២២៧មណ្ឌល ត្រូវជា ៥ ៥៤៣បន្ទប់។

ក្រសួងអប់រំ យុវជន និងកីឡា គ្រោងនឹងប្រកាសលទ្ធផលប្រឡងនៅថ្ងៃទី២៨ ខែវិច្ឆិកា ឆ្នាំ២០២៣ សម្រាប់រាជធានីភ្នំពេញ និងខេត្តកណ្ដាល និងថ្ងៃទី២៩ ខែវិច្ឆិកា ឆ្នាំ២០២៣ សម្រាប់ខេត្តផ្សេងទៀត ព្រមទាំងមានផ្សាយនៅលើទំព័រហ្វេសប៊ុកផ្លូវការក្រសួងអប់រំ យុវជន និងកីឡា៕

អត្ថបទ៖ សំអឿន