រាជរដ្ឋាភិបាលកម្ពុជា កំពុងរៀប​ចំផែនការមេថ្មីមួយ ដើម្បីអភិវឌ្ឍន៍ខេត្តជាប់សមុទ្រ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានឲ្យដឹងថា រាជរដ្ឋាភិបាលកម្ពុជា កំពុងរៀប​ចំផែនការមេថ្មីមួយ ដើម្បីអភិវឌ្ឍន៍ខេត្តព្រះសីហនុ និងខេត្តជាប់សមុទ្រចំនួន ៣ផ្សេងទៀត ដែលជាការគិតគូររួមមួយ។

ការឲ្យដឹងនេះ បានធ្វើឡើងក្នុងពិធីជួបសំណេះសំណាល ជាមួយកម្មករ-និយោជិតចំនួន ១៥១៨៤នាក់ នៅតាមបណ្តា​រោងចក្រ សហគ្រាស ដែលមានមូលដ្ឋានក្នុងតំបន់សេដ្ឋកិច្ចពិសេស ខេមបូឌា ចេជាង ហ្គ័រជី ខេត្តព្រះសីហនុ នាថ្ងៃទី ៧ ខែវិច្ឆិកា ឆ្នាំ ២០២៣នេះ។

សម្ដេចធិបតី ហ៊ុន ម៉ាណែត បានថ្លែងថា «យើងកំពុងធ្វើផែនការមេ ដើម្បីអភិវឌ្ឍន៍ខេត្តព្រះសីហនុ និងខេត្តជាប់សមុទ្រ ខ្ញុំឲ្យមានការគិតគូររួម កុំឲ្យគិតគូរដាច់ដោយដុំ ត្រូវគិតគូរជាកញ្ចប់ ជាមាត្រដ្ឋាន បើយើងគិតតែពីខេត្តព្រះសីហនុ ហើយ យកខេត្ត ៣ទៀត ជាគូប្រជែងជាមួយខេត្តព្រះសីហនុ យើងអត់យកសក្ដា​នុពលបានទេ»។

បើតាមសម្ដេចធិបតី ហ៊ុន ម៉ាណែត កម្ពុជា ត្រូវយកខេត្ត ៤ រួមមាន៖ ខេត្តព្រះសីហនុ កោះកុង កែប និងខេត្តកំពត ផ្គុំគ្នា ដើម្បីប្រកួតប្រជែងជាមួប្រទេសផ្សេងៗ៕