មកដឹងមណ្ឌលកំណែសន្លឹកកិច្ចការបេក្ខជនទាំង១០​នៅភ្នំពេញតើមណ្ឌលនីមួយៗកែមុខវិជ្ជាអ្វីខ្លះ

ក្រសួងអប់រំ យុជន និងកីឡាបានកំណត់យកមណ្ឌលប្រឡងបាក់ឌុបចំនួន ១០ នៅក្នុងរាជធានីភ្នំពេញធ្វើជាមណ្ឌលកំណែសន្លឹកកិច្ចការបេក្ខជនហើយក្នុងចំណោមមណ្ឌលកំណែទាំងនោះក្រសួងបានបែងចែកការកែទៅតាមមុខវិជ្ជានីមួយៗផងដែរ។

លោក ស្រី ឃួន វិច្ឆិកា អ្នកនាំពាក្យក្រសួងអប់រំយុវជន និងកីឡាបានមានប្រសាសន៍នៅរសៀលថ្ងៃទី០៩វិច្ឆិកានេះថាមណ្ឌលកំណែទាំង ១០ ក្នុងនោះមណ្ឌលកំណែវិទ្យាល័យព្រះស៊ីសុវត្តិ ត្រូវកែ មុខវិជ្ជា អក្សរសាស្រ្តខ្មែរ មណ្ឌលកំណែវិទ្យាល័យបាក់ទូក កែមុខវិជ្ជា គណិតវិទ្យា មណ្ឌលកំណែវិទ្យាល័យហ៊ុនសែន ប៊ុនរ៉ានី វត្តភ្នំ កែ មុខវិជ្ជា ប្រវត្តិវិទ្យា មណ្ឌលកំណែវិទ្យាល័យជាស៊ីម សន្ធរម៉ុក កែមុខវិជ្ជា ភាសាអង់គ្លេស មណ្ឌលកំណែបឋមសិក្សាព្រះនរោត្តម កែមុខវិជ្ជា រូបវិទ្យា មណ្ឌលកំណែវិទ្យាល័យជាស៊ីម បឹងកេងកង កែមុខវិជ្ជា គីមីវិទ្យា មណ្ឌលកំណែវិទ្យាល័យបឹងត្របែក កែមុខវុជ្ជា ជីវវិទ្យាមណ្ឌលកំណែវិទ្យាល័យព្រះយុគន្ធរ កែមុខវិជ្ជា ភូមិវិទ្យាមណ្ឌលកំណែបឋមសិក្សាសន្ធរម៉ុក កែមុខវិជ្ជា សីលធម៌ពលរដ្ឋវិជ្ជានិងមណ្ឌលកំណែវិទ្យាល័យទួលទំពូង កែមុខវិជ្ជា ផែនដី និងបរិស្ថានវិទ្យា។

លោកស្រីបានបន្តថា ដំណើរការកំណែសន្លឹកកិច្ចការបេក្ខជនប្រឡងសញ្ញាបត្របាក់ឌុបបានចាប់ផ្ដើមនៅថ្ងៃទី០៩រហូតដល់ថ្ងៃទី១៥វិច្ឆិកាឆ្នាំ២០២៣និងថ្ងៃទី១៦ដល់ថ្ងៃទី ២៦ វិច្ឆិកាដំណើរការស្រង់ពិន្ទុដោយកុំព្យូរទ័រនិងពិនិត្យផ្ទៀងផ្ទាត់ពិន្ទុនិងប្រកាសលទ្ធផលនៅថ្ងៃទី២៧វិច្ឆិកាសម្រាប់រាជធានីភ្នំពេញ និងខេត្តកណ្តាល និងថ្ងៃទី២៨សម្រាប់បណ្តាខេត្តផ្សេងៗព្រមទាំងមានផ្សាយនៅលើទំព័រហ្វេសប៊ុកផ្លូវការក្រសួងអប់រំយុវជននិងកីឡា។

គួរបញ្ជាក់ថាក្នុងការធ្វើកំណែនេះលោកគ្រូ អ្នកគ្រូដែលជាប្រធានក្រុមដឹកនាំធ្វើអត្រាកំណែទាំងអស់បានធ្វើការបែងចែកសមាជិកបន្តជាក្រុមតូចនិងធ្វើការណែនាំដល់សមាជិកទាំងឲ្យបំពេញភារកិច្ចឲ្យបានត្រឹមត្រូវ និងយកចិត្តទុកដាក់ក្រោមស្មារតីទទួលខុសត្រូវខ្ពស់ដោយមិនត្រូវយកភ្ជាប់មកជាមួយនូវទូរស័ព្ទដៃនិងឧបករណ៍អេឡិចត្រូនិកចូលបន្ទប់កំណែគ្រប់បន្ទប់កំណែទាំងអស់មានបំពាក់កាម៉េរ៉ាសុវត្ថិភាពនិងក្រោមការត្រួតពិនិត្យដោយអង្គភាពប្រឆាំងអំពើពុករលួយ។

ចំណែកសមាជិក​​​កំណែ​នៅ​តាម​មណ្ឌល​កំណែ​ទាំង​១០កំពុង​បំពេញ​ភារកិច្ចដោយ​គណៈកម្មការ​ក្រុម​មុខវិជ្ជា​បន្ត​ដំណើរ​ការ​ចុះ​អក្សរ​សម្ងាត់គណៈកម្មការ​ក្រុម​ការ​ងារ​បែង​ចែក​សន្លឹក​កិច្ចការ​បន្ត​អនុវត្ត​បំពេញការងារនិង​គណៈកម្មការ​ក្រុម​កំណែកំពុងតែបន្ត​កែ​សន្លឹក​កិច្ចការរបស់បេក្ខជនប្រឡងដោយ​យកចិត្ត​ទុកដាក់​ប្រកប​ដោយ​ទំនួលខុសត្រូវ​ព្រមទាំង​មាន​ការ​ចូលរួម​ពី​អង្គភាព​ប្រឆាំង​អំពើ​ពុក​រលួយ (ACU)ក្នុង​ការ​ទប់​ស្កាត់​ភាព​មិន​ប្រក្រតី​ផ្សេងៗផង​ដែរ​។

ប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ០៦ វិច្ឆិកា២០២៣បានប្រព្រឹត្តទៅរយៈពេលពីរថ្ងៃ នៅថ្ងៃទី៦ និងទី៧ខែវិច្ឆិកាឆ្នាំ២០២៣ដែលមានបេក្ខជនចុះឈ្មោះប្រឡងសរុបចំនួន ១៣៧.៤១២នាក់ស្រី ៧៣.២៧៨នាក់ ចែកជា ២២៧មណ្ឌលប្រឡង ត្រូវជា៥.៥៤៣បន្ទប់។

ចំនួនគណៈមេប្រយោគទូទាំងប្រទេសនិងគណៈកម្មការនានានៅក្នុងដំណើរការសំណេរសរុប ២៩.៥២៥នាក់ក្នុងនោះទីស្តីការក្រសួង ៤.១២៦នាក់និងរាជធានី ខេត្ត ២៥.៣៥៥នាក់។ ថ្នាក់ដឹកនាំមន្ដ្រីនិងអ្នកសង្កេតការណ៍របស់អង្គភាពប្រឆាំងអំពើពុករលួយបានចូលរួមសរុប៣.០៤០នាក់។

ប្រឡងបាក់ឌុបឆ្នាំនេះមានបេក្ខជនអវត្តមានសរុប ២.៣២៨នាក់ ស្រី៩៣៤នាក់ ស្មើនឹង ១,៦៩ភាគរយ នៃបេក្ខជនចុះឈ្មោះសរុប (ក្នុងនោះបេក្ខជនស្វៃរិនអវត្តមានចំនួន ១.៨១៤នាក់ ស្រី៧៤៩នាក់)។

បេក្ខជនមានបញ្ហាសុខភាព ៨៥ករណី ក្នុងនោះ បេក្ខជនមានបញ្ហាសុខភាព និងមិនអាចបន្តការប្រឡងបានចំនួន ៥ ករណី ក្រៅពីនេះបេក្ខជនដែលមានបញ្ហាសុខភាពទាំងអស់បានបន្តការប្រឡងជាធម្មតាបន្ទាប់ពីអាការៈបានធូរស្រាល និងក្រោមការយកចិត្តទុកដាក់មើលថែពីក្រុមគ្រូពេទ្យ៕

អត្ថបទ៖​ សំអឿន