ព័ត៌មានជាតិ

អ្នកភូមិច្រកព្រំដែន ៤០០ ចូលព្រៃកាប់ស្លឹកចេកព្រៃលក់ ១ គីឡូលក់បាន ៥០០ រៀល មានម៉ូយមកទិញដល់កន្លែង

បានផុស

២ years មុន

នៅ

ថ្ងៃចន្ទ ១៣ វិច្ឆិកា ២០២៣

ដោយ

ពលរដ្ឋជាច្រើនគ្រួសាររស់នៅភូមិសាស្ត្រតំបន់ច្រក ៤០០ ក្នុងស្រុកសំឡូតបាននាំគ្នាចូលព្រៃដើម្បីកាត់ស្លឹកចេកព្រៃមកលក់យកកម្រៃក្រៅពីការប្រកបរបរកសិកម្មធ្វើស្រែចម្ការ ដែលបានសម្រួលដោះស្រាយជីវភាពគ្រួសារបានមួយផ្នែកធំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចូលព្រៃកាត់ស្លឹកចេកព្រៃរបស់អ្នកភូមិគឺនាំគ្នាចូលព្រៃតាំងពីព្រឹករហូតដល់ថ្ងៃរសៀល ទើបដឹកស្លឹកចេកចេញពីព្រៃតាមរយៈម៉ូតូដោយមានម៉ូយៗចាំទទួលទិញគឺអ្នកភូមិមិនចាំបាច់ដឹកយកទៅលក់ដល់ទីផ្សារដោយខ្លួនឯងនោះទេ។

បុរសម្នាក់កំពុងថ្លឹងស្លឹកចេកឲ្យម៉ូយបាននិយាយដោយអះអាងថា មុខរបរបន្ទាប់បន្សំតាមរយះចូលព្រៃកាត់ស្លឹកចេកព្រៃលក់នេះ បានផ្តល់ចំណូលបានយ៉ាងតិចក៏ជាង ៤ ម៉ឺនរៀលដែរក្នុងមួយថ្ងៃ។ លោកក៏ដូចជាអ្នកភូមិដទៃទៀតដែរគឺនាំគ្នាចូលព្រៃតាំងពីព្រលឹមរហូតដល់រសៀល ទើបដឹកស្លឹកចេកយកមកថ្លឹងឲ្យម៉ូយដែលបើករថយន្តមកចាំទទួលទិញ មិនពិបាកយកទៅចូលទីផ្សារដោយខ្លួនឯងនោះទេ។

បុរសរូបនេះបន្តថា “ថ្ងៃនេះខ្ញុំកាត់បានត្រឹម ១០០ គីឡូក្រាម។ តែបើមនុស្សស្រីគាត់កាត់បានតិចជាងខ្ញុំ ក្នុង ១ ថ្ងៃដូចគ្នា ដោយសារតែកម្លាំងពួកគាត់ខ្សោយ ហើយខ្វះជំនាញដូចខ្ញុំ តែគាត់តស៊ូដើម្បីដោះបន្ទុកគ្រួសាររៀងៗខ្លួនប៉ុណ្ណោះ ខណះតម្លៃស្លឹកចេកបាន ១ គីឡូក្រាម ៥០០រៀល។

ក្នុងវ័យ ៥៨ ឆ្នាំ អ្នកស្រី អោម ចាន់ បាននិយាយថា “ខ្ញុំកាត់បានស្លឹកចេកបានតែ ៥០ គីឡូក្រាមប៉ុណ្ណោះនៅថ្ងៃនេះ ដោយក្នុង ១ គីឡូថ្លៃ ៥០០ រៀល ខ្ញុំរកបានចំណូលបានត្រឹមតែ ២៥ ០០០ រៀលប៉ុណ្ណោះ”។

មិនខុសគ្នានេះ កញ្ញា ម៉ សុភ័ក្រ វ័យ ១៨ ឆ្នាំបាននិយាយប្រាប់ថា “ខ្ញុំបានជិះម៉ូតូចូលព្រៃជាមួយអ្នកភូមិ ដើម្បីកាត់ស្លឹកចេកចាប់ពីម៉ោង ៧ ព្រឹករហូតដល់រសៀលទើបដឹកស្លឹកចេកចេញពីព្រៃយកមកថ្លឹងលក់ តែថ្ងៃនេះបានតែ ៦០ គីឡូ”។

បើតាមស្រ្តីវ័យក្មេងរូបនេះ មុខរបរមួយនេះកញ្ញាបានធ្វើជាច្រើនឆ្នាំជាមួយបងប្អូន និងអ្នកភូមិក្រៅពីធ្វើចម្ការ “។

ចំណែកបុរសដែលកំពុងសែងស្លឹកចេកដាក់លើរថយន្តទាំងការុងគឺលោក សារ៉េន បានប្រាប់ថា “ខ្ញុំមិនមែនអ្នកទិញទេ ខ្ញុំគ្រាន់តែជាអ្នកស៊ីឈ្នូលដឹកឲ្យម៉ូយនៅបាត់ដំបង ហើយថ្លៃដឹកបានកម្រៃ ១ គីឡូក្រាម ២០០ រៀល ដោយក្នុងមួយជើងដឹកបានយ៉ាងតិចចន្លោះពី ៨០០ គីឡូ រហូតទៅដល់ ១,០០០ គីឡូក្រាម គឺដឹករៀងរាល់ថ្ងៃតែម្តង ហើយម៉ូយគេយកទៅ វេចសង្វាក់និងវេចណែម”។

អាជ្ញាធរមូលដ្ឋានក្នុងឃុំកំពង់ល្ពៅ ស្រុកសំឡូតបានឲ្យដឹងថា ការប្រកបរបរបន្ទាប់បន្សំរបស់អ្នកភូមិនេះ ចាប់ផ្តើមយូរឆ្នាំដែរហើយ។ គ្រួសារដែលមានសមាជិកចេញទៅរកកាត់ស្លឹកចេកព្រៃនេះគឺមានស្ថានភាពគ្រាន់បើ តែដល់រដូវកាលដាំដុះផលដំណាំក៏ពួកគាត់បានផ្អាកផងដែរ តែសម្រាប់អ្នកដែលមិនបានធ្វើការដាំដុះក៏នៅបន្តចូលព្រៃដើម្បីរកកម្រៃប្រចាំថ្ងៃដដែល។

មន្ត្រីយោធាគឺលោក តាំង ទីន ឈរជើងការពារព្រំដែនច្រក ៤០០ ក្នុងស្រុកសំឡូត បានប្រាប់កម្ពុជាថ្មីថា ដើមចេកព្រៃនេះបានដុះច្រើននៅតាមភូមិសាស្ត្រខ្សែក្រវ៉ាត់ព្រំដែនរវាងស្រុកសំឡូតខាងកម្ពុជា និង ថៃ ហើយដើមចេកព្រៃនេះបានដុះឡើងក្រោយពីតំបន់នោះ បានកាប់ឈើរលំចោលរហូតដល់ឈើដែលរលំនោះងាប់ពុក ហើ ដើមចេកព្រៃនេះ ក៏បានដុះជំនួសយ៉ាងព្រោងព្រាត ធ្វើឲ្យអ្នកភូមិប្រកាន់យករបរនេះបានយ៉ាងប្រសើរ ក្រៅពីធ្វើចម្ការ។លោកបន្តថា តំបន់ដែលដើមចេកព្រៃដុះមានដូចជា តំបន់ភ្នំ ៤០០,តំបន់ភ្នំផេះ, តំបន់ចរិយា, តំបន់ភ្នំតាង៉ោល, តំបន់ស្រែកបន្តុំ និងតំបន់ព្រែកក្របីជាដើម។ តំបន់ខាងលើនេះស្ថិតក្នុងស្រុកសំឡូត ហើយតំបន់ខាងលើមានតំបន់ចរិយា ដុះច្រើនជាងតំបន់ផ្សេងៗ៕