រាជអាវុធហត្ថ និងក្រសួងបរិស្ថាន ប្រកាសបង្ក្រាប ដោយគ្មានការលើកលែងចំពោះបទល្មើសធនធានធម្មជាតិ

កងរាជអាវុធហត្ថលើផ្ទៃប្រទេសគាំទ្រពេញទំហឹងក្នុងកិច្ចសហការជាមួយក្រសួងបរិស្ថាន ដើម្បីទប់ស្កាត់ និងបង្ក្រាបបទល្មើសធនធានធម្មជាតិ ដោយមិនមានការលើកលែងនោះឡើយ។ ការប្រកាសនេះ ធ្វើឡើងក្នុងកិច្ចពិភាក្សាការងាររវាងលោក អ៊ាង សុផល្លែត រដ្ឋមន្ត្រីក្រសួងបរិស្ថាន ជាមួយនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស។

កិច្ចប្រជុំរវាងអង្គភាពជាតិទាំងពីរនេះ បានផ្ដោតការពិភាក្សាគ្នាជាសំខាន់អំពីសភាពការណ៍នៃបទល្មើសធនធានធម្មជាតិ និងវិធានការអនុវត្ត ដោយក្នុងនោះដើម្បីប្រសិទ្ធភាពការងារ ក្រសួងបរិស្ថាន និងកងរាជអាវុធហត្ថលើផ្ទៃប្រទេស បានឯកភាពធ្វើការរៀបចំនីតិវិធីប្រតិបត្តិស្ដង់ដា “SOP” សម្រាប់ទប់ស្កាត់ និងបង្ក្រាបបទល្មើសធនធានធម្មជាតិ សំដៅរក្សាការពារឱ្យបានគង់វង្សនូវព្រៃឈើ និងសត្វព្រៃ ជាដើម។

លោកនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានលើកឡើងថា ក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានសម្រេចជាគោលការណ៍ គឺចំពោះមុខរក្សាគ្រប់យន្តការដែលមានស្រាប់ និងពង្រឹងការអនុវត្តរាល់សារាចរណែនាំរបស់រាជរដ្ឋាភិបាលជាធរមាន ក្នុងការទប់ស្កាត់ និងបង្ក្រាបបទល្មើសធនធានធម្មជាតិ។

លោកនាយកឧត្តមសេនីយ៍ សៅ សុខា បានអះអាងនៅចំពោះមុខរដ្ឋមន្ត្រីក្រសួងបរិស្ថាន ថា កងរាជអាវុធហត្ថបានត្រៀមរួចជាស្រេចនូវកម្លាំង និងមធ្យោបាយគ្រប់ប្រភេទសម្រាប់កិច្ចអន្តរាគមន៍តាមការស្នើសុំពីក្រសួង-ស្ថាប័នមានសមត្ថកិច្ច និងអាជ្ញាធររាជធានី-ខេត្ត ក្នុងបេសកកម្មចុះបង្ក្រាបករណីនៃបទល្មើសណាដែលមានការលំបាក ហើយក្រសួងជំនាញ ឬអាជ្ញាធរដែនដីមិនអាចធ្វើកិច្ចប្រតិបត្តិការបាន ដោយសារខ្វះកម្លាំង ឬមធ្យោបាយ។

ឆ្លៀតក្នុងឱកាសនោះ បន្ទាប់ពីកិច្ចពិភាក្សា និងមានការឯកភាពនូវគោលគំនិត គោលជំហររឹងមាំក្នុងកិច្ចសហប្រតិបត្តិការទប់ស្កាត់ និងបង្ក្រាបបទល្មើសធនធានធម្មជាតិរួចមក លោក អ៊ាង សុផល្លែត រដ្ឋមន្ត្រីក្រសួងបរិស្ថាន អមដំណើរដោយនាយឧត្តមសេនីយ៍ សៅ សុខា និងសហការី បានធ្វើការត្រួតពិនិត្យកម្លាំងកងរាជអាវុធហត្ថ និងគ្រឿងបំពាក់មធ្យោបាយ ដែលត្រៀមសម្រាប់កិច្ចអន្តរាគមន៍ទូទាំងប្រទេស៕