ព័ត៌មានជាតិ

លោក ឌិន សុមេធារិទ្ឋ លើកទឹកចិត្តយុវជនចូលរួមហាត់ការ ដើម្បីទទួលបានបទពិសោធន៍ការងារ

បានផុស

៣ years មុន

នៅ

ថ្ងៃព្រហស្បតិ៍ ២៣ វិច្ឆិកា ២០២៣

ដោយ

លោក ឌិន សុមេធារិទ្ឋ ប្រធានសមាគមសណ្ឋាគារកម្ពុជា បានលើកទឹកចិត្តដល់យុវជនចូលរួមហាត់ការតាមបណ្ដាក្រុមហ៊ុន សហគ្រាស ក្នុងគោលបំណងដើម្បីទទួលបានបទពិសោធជាក់ស្ដែង ទាំងចំណេះដឹង និងចំណេះធ្វើ មុននឹងឈានឆ្ពោះទទួលបានការងារធ្វើនាពេលអនាគត។

ការលើកទឹកចិត្តរបស់លោកយ៉ាងដូច្នេះ ស្របពេលរាជរដ្ឋាភិបាលកំពុងដាក់អនុវត្តកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ដល់ក្រុមគោលដៅ យុវជន មកពីគ្រួសារក្រីក្រ និងគ្រួសារងាយរងហានិភ័យ នៅទូទាំងប្រទេស ចំនួន ១,៥ លាន នាក់ ហើយក្រសួងការងារ និង បណ្ដុះបណ្ដាលវិជ្ជាជីវៈ ក៏បានជំរុញក្រុមហ៊ុន សហគ្រាស សមាគម ក្នុងការផ្តល់ឱកាសហាត់ការ និងកម្មសិក្សាដល់សិស្សដែលនឹងចូលរៀនក្នុងវគ្គបណ្ដុះបណ្ដាលនេះផងដែរ។

លោក ឌិន សុមេធារិទ្ឋ បានលើកឡើងថា ការហាត់ការគឺមានសារៈសំខាន់ណាស់ទាំងចំណេះដឹង និងចំណេះធ្វើ ដើម្បីឈានទៅរកការងារជាក់ស្ដែងឲ្យពួកគាត់យល់ចំពោះការអនុវត្តការងារផ្ទាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយនេះ លោកបានបង្ហាញសុទិដ្ឋិនិយមថា សមាគមដែលបានចុះអនុស្សរណៈ នៃការយោគយល់គ្នា ( MoU) ជាមួយក្រសួងការងារ និងបណ្ដុះបណ្ដាលវិជ្ជាជីវៈ គឺជាការផ្តល់ឱកាសដល់ប្អូនៗ ដែលបានរៀនសូត្រក្នុងកម្មវិធីនេះ ដើម្បីបញ្ចេញសមត្ថភាពឲ្យក្រុមហ៊ុនទាំងអស់នោះបានស្គាល់សមត្ថភាព ចំណេះជំនាញពួកគេ។

លោកមានប្រសាសន៍ថា «ការផ្តល់ឱកាសឲ្យគាត់ហាត់ការហ្នឹង ជាពេលវេលាមួយដ៏ល្អសម្រាប់ឲ្យភាគីទាំងពីរបានយល់ចិត្តគ្នា បានស្គាល់គ្នា ពិសេសបានផ្តល់ឱកាសការងារឲ្យអ្នកហាត់ការហ្នឹងទទួលបានចំណេះដឹង ចំណេះធ្វើ ឲ្យពួកគាត់អនុវត្តផ្ទាល់ តើការងារក្តៅ ត្រជាក់យ៉ាងណាចំពោះការអនុវត្តជាក់ស្ដែង»។

បន្ថែមលើសនេះ លោក សុមេធារិទ្ឋ ក៏បានគាំទ្រប្រសាសន៍ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានដាក់ចេញនូវគោលដៅ នៃការបណ្តុះបណ្តាលជំនាញវិជ្ជាជីវៈនេះ ដោយផ្តោតសំខាន់លើគោលការណ៍ «ឲ្យចប់ ឲ្យចេះ និងឲ្យមានការងារ» ក្នុងគោលបំណងដើម្បីឲ្យកម្មវិធីនេះទទួលបានប្រសិទ្ធភាព។

សូមជម្រាបថា កាលពីថ្ងៃទី ១១ ខែវិច្ឆិកា ក្រសួងការងារ និង បណ្ដុះបណ្ដាលវិជ្ជាជីវៈ បានចុះអនុស្សរណៈ នៃការយោគយល់គ្នា ជាមួយសភាពាណិជ្ជកម្មកម្ពុជា និងសមាគមនិយោជក ចំនួន ១៧ ស្ដីពីកិច្ចសហប្រតិបត្តិការលើការហាត់ការ និងកម្មសិក្សា ដើម្បីគាំទ្រដល់ការបណ្ដុះបណ្ដាលជំនាញវិជ្ជាជីវៈ និងបច្ចេកទេស។

ក្រសួងការងារ និង បណ្ដុះបណ្ដាលវិជ្ជាជីវៈ ក៏បានចាត់ទុកថា នេះជាកិច្ចសហប្រតិបត្តិការបើកផ្លូវ ដើម្បីផ្សារភ្ជាប់ទ្រឹស្ដីជាមួយនឹងការអនុវត្តក្នុងការចូលរួមចំណែកជួយកសាង អភិវឌ្ឍន៍ និងពង្រឹងធនធានមនុស្សនៅកម្ពុជា និងអាចឲ្យម្ចាស់រោងចក្រ សហគ្រាស និងក្រុមហ៊ុនឯកជននានាជ្រើសរើសក្នុងចំណោមអ្នកហាត់ការដែលស្គាល់ និងយល់ដឹងអំពីកន្លែងការងារស្រាប់ ធ្វើជាកម្មករ-និយោជិត និងបុគ្គលិករបស់ខ្លួនតែម្ដង៕

Related Topics:លោក ឌិន សុមេធារិទ្ឋ