ព័ត៌មានជាតិ

កម្ពុជា-ឡាវ សាទរការរីកចម្រើន នៃទំនាក់ទំនងទ្វេភាគី និងកិច្ចសហប្រតិបត្តិការប្រទេសទាំងពីរ

បានផុស

៣ years មុន

នៅ

ថ្ងៃអង្គារ ៥ ធ្នូ ២០២៣

ដោយ

កម្ពុជា-ឡាវ បានសាទរចំពោះការរីកចម្រើន នៃទំនាក់ទំនងទ្វេភាគី និងកិច្ចសហប្រតិបត្តិការរវាងប្រទេសទាំងពីរ ជាពិសេសតាមរយៈជំនួបទស្សនកិច្ចផ្លូវការកម្រិតថ្នាក់ដឹកនាំជាន់ខ្ពស់ និងការផ្លាស់ប្ដូរគ្រប់កម្រិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសាទរនេះ ក្នុងឱកាស ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានទទួលជួបសំដែងការគួរសម និងសំណេះសំណាលជាមួយ ឯកឧត្ដម បួរកែវ ភូមិវង្សសៃ ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាធិបតេយ្យប្រជាមានិតឡាវ ប្រចាំព្រះរាជាណាចក្រកម្ពុជា និងសហការី នាព្រឹកថ្ងៃទី ៥ ខែធ្នូ ឆ្នាំ ២០២៣។

នាឱកាសនោះ ឯកឧត្ដម ហ៊ុន ម៉ានី និង ឯកឧត្ដម បួរកែវ ភូមិវង្សសៃ បានសាទរចំពោះការរីកចម្រើន នៃទំនាក់ទំនងទ្វេភាគី និងកិច្ចសហប្រតិបត្តិការរវាង កម្ពុជា និងឡាវ ជាពិសេសតាមរយៈជំនួបទស្សនកិច្ចផ្លូវការកម្រិតថ្នាក់ដឹកនាំជាន់ខ្ពស់ និងការផ្លាស់ប្ដូរគ្រប់កម្រិតរវាងប្រទេសទាំងពីរ។

ទន្ទឹមនោះដែរ ឯកឧត្ដមរដ្ឋមន្ត្រីក្រសួងមុខងារសាធារណៈ បានគូសបញ្ជាក់ពីការបន្តរក្សាកិច្ចសហប្រតិបត្តិការរវាងប្រទេសទាំងពីរឲ្យកាន់តែរឹងមាំស៊ីជម្រៅ តាមរយៈការយល់ច្បាស់ពីមូលដ្ឋានប្រវត្តិសាស្ត្រ នៃទំនាក់ទំនង និងចំណងមិត្តភាពជាប្រពៃណី រវាង កម្ពុជា និងឡាវ ដើម្បីរួមគ្នាជំរុញកិច្ចសហប្រតិបត្តិការលើគ្រប់វិស័យ និងគ្រប់ក្របខណ្ឌ ទាំងផ្នែកនីតិប្បញ្ញត្តិ អង្គនីតិប្រតិបត្តិ ដែលនឹងនាំមកនូវផលប្រយោជន៍ដល់ប្រជាជន នៃប្រទេសទាំងពីរបន្ថែមទៀត។

ជាមួយគ្នានេះ ឯកឧត្ដមឯកអគ្គរដ្ឋទូតឡាវ ក៏បានរំលេចនូវលទ្ធផលសំខាន់ៗ មួយចំនួនដែលជាសមិទ្ធផលពីកិច្ចសហប្រតិបត្តិការគ្រប់ជ្រុងជ្រោយ នៃប្រទេសទាំងពីរ ក្រោមការដឹកនាំក្នុងដំណាក់កាល សម្ដេចអគ្គមហាសេនាបតីតេជោ ហ៊ុន សែន និងបន្តក្នុងអាណត្តិទី ៧ ក្រោមការដឹកនាំរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ផងដែរ៕

អត្ថបទ ៖ ពិសី