ព័ត៌មានជាតិ

អាជ្ញាធរខេត្តកោះកុង យល់ថា រាល់ការអភិវឌ្ឍសង្គមពិតជាមិនអាចខ្វះបាន ការរួមចំណែកអង្គការសង្គមស៊ីវិល

បានផុស

៣ years មុន

នៅ

ថ្ងៃពុធ ១៣ ធ្នូ ២០២៣

ដោយ

អាជ្ញាធរខេត្តកោះកុង លើកឡើងថា រាល់កិច្ចការងារអភិវឌ្ឍន៍សង្គមមានប្រសិទ្ធភាព គឺពិតជាមិនអាចខ្វះបាននូវការចូលរួមចំណែកដៃគូអង្គការ សមាគមនានា ក្រៅរាជរដ្ឋាភិបាល ជួយលើកស្ទួយចំគោលដៅបម្រើដល់ប្រជាពលរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហាក់ ឡេង ថ្លែងចំៗ ថា រដ្ឋបាលខេត្តកោះកុង ពិតជាមិនអាចខ្វះបាននូវការចូលរួមពីគ្រប់មជ្ឈដ្ឋាននានា ជាពិសេសភាពជាដៃគូអភិវឌ្ឍន៍ជាមួយអង្គការសង្គមស៊ីវិល ដែលបានធ្វើសកម្មភាព រួមចំណែកស្ទើរគ្រប់វិស័យ ដូចជាការកសាងធនធានមនុស្ស តាមរយៈការបណ្ដុះបណ្ដាល និងឧបត្ថម្ភដល់សិស្ស និស្សិត នៃគ្រួសារក្រីក្រ រួមចំណែកលើវិស័យ កសិកម្ម ដោយផ្តល់នូវពូជសត្វចិញ្ចឹម លើកកម្ពស់សុខុមាលភាពប្រជាពលរដ្ឋតាមសហគមន៍។

ការថ្លែងលើកសរសើររបស់លោក ហាក់ ឡេង អភិបាលរងខេត្តកោះកុង យ៉ាងដូច្នេះ ធ្វើឡើងក្នុងវេទិកាកិច្ចសន្ទនាភាពជាដៃគូ រវាងរដ្ឋបាលខេត្ត និងអង្គការសង្គមស៊ីវិល នៅថ្ងៃទី ១៣ ខែធ្នូ ឆ្នាំ ២០២៣ ដោយមានតំណាងមន្ទីរអង្គភាព អង្គការ សមាគម អាជ្ញាធរសមត្ថកិច្ចពាក់ព័ន្ធជាច្រើន។

លោកអភិបាលរងខេត្ត បន្ថែមទៀតថា គោលបំណងពង្រឹងកិច្ចសហការភាពជាដៃគូ រវាងរដ្ឋបាលខេត្ត និងអង្គការ សមាគម និងសហគមន៍នានា ក្នុងដែនសមត្ថកិច្ច ដើម្បីរួមចំណែកជាមួយរាជរដ្ឋាភិបាលក្នុងការអភិវឌ្ឍខេត្តកោះកុងឱ្យកាន់តែរីកចម្រើន និងស្របទៅនឹងគោលការណ៍ច្បាប់ ជាប្រទេសមានលទ្ធិប្រជាធិបតេយ្យ និងនីតិរដ្ឋពេញលេញ។ ស្ថិតក្នុងបរិយាកាសសុខសន្តិភាព និងក្រោមដំបូល នៃលទ្ធិប្រជាធិបតេយ្យ ថ្ងៃនេះ បានរៀបចំវេទិកាពិគ្រោះយោបល់ ជាមួយអង្គការ សមាគម និងសហគមន៍នានា ក្នុងខេត្តកោះកុង ក្រោមប្រធានបទ “ការពង្រឹងសហការភាពជាដៃគូ រវាងរដ្ឋបាលខេត្ត និងអង្គការ សមាគម និងសហគមន៍នានា នៅមូលដ្ឋានក្នុងដែនសមត្ថកិច្ចរដ្ឋបាលខេត្តកោះកុង”។

លោក ហាក់ ឡេង សង្កត់ធ្ងន់ដែរថា រាជរដ្ឋាភិបាលថ្មីដែលដឹកនាំដោយ សម្ដេចធិបតី ហ៊ុន ម៉ាណែត នាយករដ្ឋមន្ត្រី បានដាក់ចេញនូវយុទ្ធសាស្ត្រថ្មី គឺយុទ្ធសាស្ត្របញ្ចកោណដំណាក់កាលទី ១ ដើម្បីបន្តចីរភាពឱ្យសម្រេចនូវចក្ខុវិស័យឆ្នាំ ២០៥០ ជាប្រទេសមានចំណូលខ្ពស់ ដោយមានគន្លឹះអាទិភាពចំនួន ០៥ រួមមាន មនុស្ស ផ្លូវ ទឹក ភ្លើង និងបច្ចេកវិទ្យា។

រដ្ឋបាលខេត្តកោះកុង សូមស្នើឱ្យអង្គការសង្គមស៊ីវិលដែលធ្វើសកម្មភាពលើទឹកដី នៃខេត្តកោះកុង បន្តស្មារតីក្នុងភាពជាដៃគូឱ្យកាន់តែជិតស្និទ្ធជាមួយរដ្ឋបាលខេត្ត ដោយឈរលើមាគ៌ា សន្តិភាព ប្រជាធិបតេយ្យ ដើម្បីបន្តរួមចំណែកក្នុងការកាត់បន្ថយភាពក្រីក្រ លើកកម្ពស់សេដ្ឋកិច្ចមូលដ្ឋាន លើកកម្ពស់សមភាពយេនឌ័រ អភិរក្សធនធានធម្មជាតិ បរិស្ថាន ពង្រឹងវិស័យអប់រំជនបទ ពង្រឹងសេវាសាធារណៈ និងជួយជនងាយរងគ្រោះស្របតាមក្របខ័ណ្ឌ នៃគោលនយោបាយ និងយុទ្ធសាស្ត្របញ្ចកោណដំណាក់កាលទី ១ របស់រាជរដ្ឋាភិបាល។

ចំណែកឯ លោក ម៉េងហាក់ វិច្ឆ័យ ប្រធានបណ្ដាញសមាគម អង្គការមិនមែនរដ្ឋាភិបាល និងសហគមន៍ប្រចាំខេត្តកោះកុង អះអាងថា អង្គការសង្គមស៊ីវិល ជាតួអង្គបង្កើតឡើងដើម្បីចូលរួមចំណែកក្នុងការអភិវឌ្ឍប្រទេសមានការរីកចម្រើនគ្រប់វិស័យ តាមរយៈការពង្រឹងអភិបាលកិច្ចមូលដ្ឋាន កសាងសមត្ថភាព ការផ្តល់សេវាសាធារណៈ ដូចជា ៖ សុខភាព អប់រំ ការពារបរិស្ថាន និងការអភិរក្សធនធានធម្មជាតិជាដើម។

តំណាងប្រធានបណ្ដាញសមាគម អង្គការមិនមែនរដ្ឋាភិបាល និងសហគមន៍ប្រចាំខេត្តកោះកុង យល់ថា លោកចង់ឃើញវេទិកានេះបន្តមាន ព្រោះវាមិនគ្រាន់តែសម្រាប់ការពិភាក្សាអំពីបញ្ហាប្រឈមពីក្តីកង្វល់ពលរដ្ឋកើតឡើងក្នុងខេត្តប៉ុណ្ណោះទេ តែវាជាកន្លែងសម្រាប់យើងគ្រប់ផ្លាស់ប្ដូរបទពិសោធន៍ និងរៀនពីគ្នាទៅវិញទៅមក ពង្រឹងទំនាក់ទំនង ជឿទុកចិត្ត និងសាមគ្គីភាពដែលអាចដោះស្រាយបញ្ហាអភិវឌ្ឍន៍កាន់តែមានប្រសិទ្ធភាពល្អ៕

អត្ថបទ ៖ សិរីវឌ្ឍនៈ

Related Topics:ខេត្តកោះកុង