ភ្ញៀវទេសចរមួយ​រូបហៅ​ខេត្ត​បាត់ដំបង​ប្រៀបដូចជា​ឋានសួគ៌ ជា​ឱសថ​​ព្យាបាលជំងឺ​​ពី​ធម្មជាតិ​

ខេត្តបាត់ដំបង គឺជាខេត្តមួយមានការល្បីល្បាញលើ​វិស័យកសិកម្មនិងវិស័យទេសចរណ៍។ វិស័យទេសចរណ៍​ខេត្តមួយនេះបានស្រូបយកកំណើនភ្ញៀវទេសចរក្នុងនិងក្រៅស្រុក មានការកើនឡើងជាបន្តបន្ទាប់ពី ១ ឆ្នាំទៅ ១ ឆ្នាំ។

លោក ចំរើន ដែល​រស់នៅខេត្តបន្ទាយមានជ័យ​តែងតែ​ធ្វើ​ដំណើរជាមួយ​គ្រួសារ​មក​កម្សាន្តក្នុង​​ខេត្តបាត់ដំបង។ លោកបាន​បង្ហាញ​ចំណាប់អារម្មណ៍​ទឹកដីខេត្ត​បាត់ដំបង​សំបូរ​តំបន់កម្សាន្តច្រើន​ទាំងធម្មជាតិ​និង​កែច្នៃ។

ដោយសារ​សក្តានុពល​ទេសចរណ៍​ខេត្ត​បាត់ដំបង​ដែល​ពិបាក​រក​តំបន់ណាផ្ទឹមបាន លោក​ប្រៀប​ខេត្តបាត់ដំបងដូចជា​ឋាន​សួគ៌​សម្រាប់ការ​ដើ​រកម្សាន្ត​ ហើយ​ជា​ឱសថធម្មជាតិ​ដែល​អាចដោះបន្ទុកដល់អ្នក​ជំងឺ​ឲ្យ​ធូរស្រាល​។

«ខ្ញុំគិតថា អ្នកមកកម្សាន្តជាច្រើនទៀតក៏ពួកគេយល់ឃើញដូចខ្ញុំដែរ ទើបធ្វើខេត្តបាត់ដំបងទាញយកកំណើនភ្ញៀវច្រើនហើយម្ហូបអាហារក៏សំបូរបែបហើយមានរស់ជាតិឆ្ងាញ់»។

លោក ហម អរុណ អនុប្រធានមន្ទីរទេសចរណ៍ខេត្តបានឲ្យដឹងថា កត្តាដែលធ្វើឲ្យខេត្តបាត់ដំបង ស្រូបយកកំណើនភ្ញៀវច្រើន​ដោយសារតែខេត្តបាត់ដំបង សម្បូរទៅដោយតំបន់គោលដៅទេសចរណ៍បែបធម្មជាតិ និងកែច្នៃយ៉ាងសំបូរបែប។ ហើយ​អ្វីដែលមានការទាក់ទាញជាងនេះទៀតគឺការ​ជិះណូរី រួមមានម្ហូបអាហារបែបស្នាដៃអ្នកបាត់ដំបង ហើយតម្លៃក៏ សមរម្យ និងការស្នាក់នៅមានសណ្ឋាគារប្រកបដោយផាសុខភាព អ្នកបំរើរួសរាយរាក់ទាក់ ប្រកបដោយសុវត្ថិភាព យ៉ាងកក់ក្តៅ។

លោកបន្តថា ក្នុងខេត្តបាត់ដំបងសម្បទាទ្រទ្រង់វិស័យទេសចរណ៍ក្នុងខេត្តបាត់ដំបងរួមមាន÷ សណ្ឋាគារមានចំនួន ៤៨ ផ្ទះភ្ញៀវចំនួន ១០២ ផ្ទះស្នាក់ ០៣ សាលប្រជុំ ២២ ភោជនីដ្ឋាន ២១៥ បៀហ្កាឌិន ០១ រង្គសាល ០២ ខារ៉ាអូខេ ២៧ ម៉ាស្សានិងស្ប៉ា ០៦ និងទីភ្នាក់ងារទេសចរណ៍ចំនួន ០២ ផង។

ខេត្តបាត់ដំបង មានរមណីយដ្ឋានទេសចរណ៍ចំនួន ២២ ទីតាំង ក្នុងនោះសហគមន៍ និងអេកូទេសចរណ៍មាន ០៤ ទីតាំង សារមន្ទីរមាន ០២ ទីតាំង គោលដៅទេសចរណ៍មាន ៥៤ ទីតាំង ទេសចរណ៍សាសនាមាន ២៩ ទីតាំង កសិទេសចរណ៍មាន ០៤ ទីតាំង សរុបគោលដៅមាន ១១៥ ទីតាំង។

ខេត្តបាត់ដំបង ស្ថិតនៅភាគពាយ័ព្យនៃប្រទេសមានចំងាយ ២៩១ គីឡូម៉ែត្រពីរាជធានីភ្នំពេញ ដែលមានព្រំប្រទល់ខាងកើតជាប់ខេត្តពោធិសាត់និងបឹងទន្លេសាប ខាងលិចជាប់ខេត្តប៉ៃលិននិងប្រទេសថៃ ខាងជើងជាប់ខេត្តបន្ទាយមានជ័យ ខាងត្បូង ជាប់ខេត្តពោធិ៍សាត់ ដោយទិសភាគខាងលិចមានព្រំប្រទល់ជាប់ប្រទេស​ថៃ​ប្រវែង ១៤៤,៨គីឡូម៉ែត្រ ដែល​ជាប់ខេត្ត ច័ន្ទបុរី ត្រាត និង ស្រះកែវ៕

អត្ថបទ៖ សៅ សារិទ្ធ