សម្តេច ហ៊ុន ម៉ាណែត ប្រាប់ឱ្យក្រសួងធម្មការ និងក្រសួងយុត្តិធម៌ ដោះស្រាយបញ្ហា«បុគ្គលយកសាសនាធ្វើអាជីវកម្ម»

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានប្រាប់ឱ្យលោក ចាយ បូរិន រដ្ឋមន្រ្តីក្រសួងធម្មការ និងសាសនា និងលោក កើត រិទ្ធ រដ្ឋមន្រ្តីក្រសួងយុត្តិធម៌ ដោះស្រាយបញ្ហាដែលបុគ្គលមួយចំនួនយកសាសនាធ្វើជាខែល ក្នុងគោលបំណងណាមួយ ឬក្នុងគោលបំណងធ្វើអាជីវកម្ម។ សម្តេចនាយករដ្ឋមន្រ្តីកម្ពុជា បានប្រាប់បែបនេះនៅក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤របស់ក្រសួងបរិស្ថាននៅរសៀលថ្ងៃព្រហស្បតិ៍នេះ។

សម្តេចធិបតី ហ៊ុន ម៉ាណែត លើកឡើងថា មួយរយៈនេះ សម្តេចបានសង្កេតឃើញថា មានបុគ្គលមួយចំនួនបានយកស្បង់របស់ព្រះសង្ឃទៅគ្រង តាំងខ្លួនជាបុគ្គលបែបនេះបែបនោះ ខ្លះទៅរាំ ដើម្បីឱ្យប្រជាពលរដ្ឋជឿ។ សម្តេចអះអាងថា សម្តេចក៏ចង់ពុលនឹងការផ្សព្វផ្សាយពីបុគ្គលតាំងខ្លួនជាអ្នកខ្លាំងពូកែទាំងនេះដែរ។ សម្តេចនាយករដ្ឋមន្រ្តី ក៏បានគូសបញ្ជាក់ចំទៅលើបុគ្គលម្នាក់ដែលតាំងខ្លួនជាគ្រូសិល្ប៍ចេះច្រើនភាសា ដោយសម្តេចបញ្ជាក់បែបលេងសើចថា សម្តេចស្តាប់អត់យល់ ហើយប្រហែលមានតែលោក ចាយ បូរិន រដ្ឋមន្រ្តីក្រសួងធម្មការ និងសាសនាទេ ទើបអាចស្តាប់យល់។

បើតាមប្រមុខរាជរដ្ឋាភិបាលកម្ពុជា ការផ្សព្វផ្សាយបែបណា គឺជាសិទ្ធិបុគ្កលរបស់ពួកគេ ប៉ុន្តែ ត្រូវផ្សព្វផ្សាយនៅក្នុងផ្ទះរបស់ពួកគេ។ ក្នុងករណី បើសិនផ្សព្វផ្សាយជាសាធារណៈ ដើម្បីឱ្យប្រជាពលរដ្ឋជឿនោះ គឺត្រូវដោះស្រាយ ព្រោះវាដើរហួសពីសិទ្ធិបុគ្គលហើយ។ ត្រង់ចំណុចនេះ សម្តេចធិបតី ហ៊ុន ម៉ាណែត បានប្រាប់ដោយផ្ទាល់ទៅលោក កើត រិទ្ធ រដ្ឋមន្រ្តីក្រសួងយុត្តិធម៌ ត្រូវពិនិតិ្យលើបញ្ហានេះ។

ងាកមកក្រសួងធម្មការ ​និងសាសនាវិញ សម្តេចនាយករដ្ឋមន្ត្រី ក៏បានប្រាប់ដោយផ្ទាល់ទៅលោក ចាយ បូរិន ឱ្យដោះស្រាយបញ្ហានេះឱ្យបាន ព្រោះថា បើបណ្តែតបណ្តោយ វានឹងប៉ះពាល់ដល់សាសនា និងបំផុលសង្គមផងដែរ។ សម្រាប់សម្តេចធិបតី សាសនា គឺត្រូវតែគោរព តែការគោរព ក៏ត្រូវតែមានព្រំដែន ហើយគោរពត្រូវតែមានមូលដ្ឋានច្បាស់លាស់។ សម្តេចធិបតី បានអះអាងថា ក្រសួងពាក់ព័ន្ធ ត្រូវធ្វើការងារ ដើម្បីការពារគុណតម្លៃរបស់សាសនា ហើយសម្តេចផ្តល់ការណែនាំដល់លោក ចាយ បូរិន ឱ្យពិភាក្សាជាមួយសាសនាផ្សេងៗនៅក្នុងប្រទេសកម្ពុជា ក្នុងគោលបំណងស្វែងរកដំណោះស្រាយលើបញ្ហាទាំងនេះ៕