របរចិញ្ចឹមទាបែបធម្មជាតិរបស់កសិករនៅខេត្តបាត់ដំបងចំណាយថ្លៃដើមតិច ទទួលផលច្រើន

កសិករចិញ្ចឹមសត្វទាយកពងលក់ ដើម្បីទ្រទ្រង់ជីវភាពគ្រួសារជាច្រើនកន្លែង ខេត្តបាត់ដំបង បានកំពុងប្រមូល​ទិន្នផលខ្ពស់ ខណៈការចិញ្ចឹមមិនរំពឹងលើចំណីទាំងស្រុង ចំណាយថវិកាថ្លៃដើមច្រើន បាននាំគ្នាងាកមក​ចិញ្ចឹមតាមប្រពៃណីបែបធម្មជាតិវិញ ទើបទទួលបានទិន្នផលខ្ពស់ ហើយការចំណាយថ្លៃដើមមានកម្រិតទាប ប៉ុន្តែត្រូវការមើលថែទាំដោយយកចិត្តទុកដាក់បំផុត។

លោក ធឿន ប្រធានសហគមន៍ ឃុំកំពុងព្រៀង បានប្រាប់ឱ្យដឹងថា កសិករដែលបានចិញ្ចឹមទាយកពងលក់​តាមបែប​ជាតិនេះមាននៅក្នុងភូមិអូសទូក ភូមិកាច់រទេះ និងភូមិសាលាត្រាវ ក្នុងឃុំកពង់ព្រៀង និងក្នុងឃុំ រាំងកេសី ស្រុកសង្កែ ក៏មានច្រើនកន្លែងផងដែរ។

ជាមួយគ្នានេះដែរ ងាកទៅមើលកសិករ ចិញ្ចឹមទានៅក្នុងឃុំរាំងកេសី ស្រុកសង្កែ លោក សំនឿង បានរៀបរាប់​ឲ្យដឹងដែរថា បច្ចុប្បន្នលោកចិញ្ចឹមទាចំនួនជាងបីពាន់ក្បាល ក្រោយពីលោកបានផ្អាកមុខរបរផ្សេង ដែលលោកបាន​ធ្វើកន្លងមកហើយទ្រទ្រង់សេដ្ឋកិច្ចគ្រួសារមិនបានប្រសើរ ទើបលោកសម្រេចចិញ្ចឹមទាយកពងលក់តែម្តង ។ លោកថា ការចិញ្ចឹមទានេះក៏មានផលលំបាកដែរ តែលោកតស៊ូរហូតបានផលដ៏ប្រសើរមកដល់ពេលនេះ លោកមិនបារម្ភ​លើជីវភាព​គ្រួសារដូចមុននោះទេ បើទោះបីហត់នឿយបន្តិច ខណៈលោកថា ក្នុង១ថ្ងៃលោកប្រមូលពងទា​បានជាងបី​ពាន់គ្រាប់ហើយលក់ឲ្យម៉ូយ១គ្រាប់ចន្លោះពី២៥០រៀល ដល់៣០០រៀល។

ចំណែកនៅលើទីផ្សារឈ្មួញ​លក់ចេញវិញ១​គ្រាប់បានចន្លោះពី៤០០-៥០០រៀល ។ លោកបន្តថា ទារបស់​លោកជាងបីពាន់ក្បាលនេះ លោកជ្រើសយកពូជចំនួន២ ប្រភេទមកចិញ្ចឹម វាឆាប់ហុចផលក្នុងរយៈពេល ០៣ខែ ដោយចាប់គិតពីរយៈពេលទិញកូនមកចិញ្ចឹម។ ពូជទាំង២នោះគឺ ពូជទាសំពៅ និងពូជទាអង្កាម ទម្ងន់វា១ក្បាល​ជាង២គីឡូក្រាម ។ លោកបន្តថា បើចិញ្ចឹមនៅក្នុងទ្រុងហើយ​សំអាង​លើចំណី ទូទាត់លើថ្លៃចំណី បានកម្រៃសល់តិចតួច បើទោះបីក្នុង១ថ្ងៃ លោកអាចរកចំណូលបានចន្លោះ​ពី៤០-៥០ម៉ឺនរៀល ក៏មិនសូវសល់កម្រៃច្រើនដែរ។ តាំងពីរយៈពេលលោកបាន ដេញទាឲ្យរកស៊ីតាមវាលស្រែតាម​បែបធម្មជាតិ បានបន្ថយចំណីឲ្យស៊ីតែ២ការ៉ុងប៉ុណ្ណោះ ក្នុង១ថ្ងៃ ក៏បានសល់កម្រៃច្រើនគួរសម ហើយសុខភាពទាក៏ល្អ ពងក៏មានគុណ​ភាពរស់ជាតិឆ្ងាញ់ជាងពងឲ្យចំណីសុទ្ធ។

កសិកររូបនេះបន្តថា “ត្រឹមម៉ោង៥កន្លេះព្រឹក ខ្ញុំចាប់ផ្តើមដេញទាទៅតាមវាលស្រែ ឲ្យវាដើរស៊ីក្តាម ខ្យង ខ្ចៅ និងគ្រាប់ស្រូវដែលជ្រុះខ្លះនៅតាមស្រែ ក្រោយពីម្ចាស់គេច្រូតរួច ដោយក្នុង១ខែផ្លាស់ទីតាំងម្តង ខ្ញុំសុំម្ចាស់​ស្រែគេម្នាក់ៗហើយគេអត់កំណាញ់ទ។ ផ្ទុយទៅវិញពួកគាត់ថា បានចំណេញជីអាចម៌ទាដាក់​លើដីស្រែ​របស់ពួកគាត់ទៀតផង” ។

មន្ត្រីនៃមន្ទីរកសិកម្មបានលើកជាយោបល់ថា ការចិញ្ចឹមទាយកពងរបស់កសិករ ក្នុងស្រុកសង្កែ តាមបែបធម្មជាតិនេះ គឺដូចជាបានជួយការពារសុខភាពសត្វ ទាអ៊ីចឹងដែរ ហើយគុណភាព និងរស់ជាតិពងវា ឬក៏សាច់មានរស់ជាតិ​ឆ្ងាញ់​មិនចាញ់សត្វព្រៃនោះទេ នឹងបានកាត់បន្ថយ ថវិការច្រើនទៅលើចំណីផង។ មន្ត្រីរូបនេះក៏បានសាទរនិងកោតសសើ ចំពោះក្រុមកសិករចិញ្ចឹមទាទាំងអស់ ដោយមានការតស៊ូក្នុងការដើរឃ្វាលនិងមើលថែទាំទាបានល្អ ដើម្បីជាប្រយោជន៍​ទ្រទ្រង់ជីវភាពគ្រួសារប្រចាំថ្ងៃ ដោយមិនធ្វើចំណាកស្រុកដោយប្រថុយប្រថានឡើយ។

ទន្ទឹមនេះ កសិករចិញ្ចឹមទាជាច្រើនកន្លែងក្នុងស្រុកសង្កែ បានសំណូមពរដល់មន្ទីរពាក់ព័ន្ធ ជួយទប់ស្កាត់​ការនាំចូលទាពីក្រៅប្រទេស ដើម្បីទុកឱកាសឲ្យកសិករក្នុងស្រុកពង្រីកការចិញ្ចឹមឲ្យកាន់តែមានវិសាលភាព ខណៈបច្ចុប្បន្ន មហាជនបានមើលឃើញថា ពងទាកំពុងមានតម្រូវការច្រើនសម្រាប់ប្រជាពលរដ្ឋក្នុងស្រុក និងបានលើកកម្ពស់ដល់សុខភាព របស់ប្រជាពលរដ្ឋដែលកំពុងនិយមបរិភោគប្រចាំថ្ងៃផងដែរ៕

អត្ថបទ៖ សៅ សារិទ្ធ