ព័ត៌មានជាតិ

សមត្ថកិច្ចចម្រុះខេត្តបាត់ដំបង បន្តពង្រឹងកិច្ចការពារតាមបន្ទាត់ព្រំដែនទប់ស្កាត់ការរីករាលដាលនៃជំងឺកូវីដ១៩

បានផុស

៣ years មុន

នៅ

ថ្ងៃសុក្រ ១២ កុម្ភៈ ២០២១

ដោយ

មួយរយៈកន្លងទៅនេះ ពិសេសគឺមុនថ្ងៃបុណ្យទានម្តងៗ សមត្ថកិច្ចចម្រុះដែលកំពុងដាក់ពង្រាយកម្លាំងឈរជើងតាមខ្សែបន្ទាត់ព្រំដែនកម្ពុជា ថៃ បាននឹងកំពុងយកចិត្តទុកដាក់យ៉ាងខ្លាំង ដើម្បីត្រួតពិនិត្យឲ្យបានល្អិតល្អន់ លើករណីឆ្លងដែនរបស់ពលករខ្មែរ ដែលវិលត្រឡប់មកពីប្រទេសថៃ តាមច្រកនានា នៅតាមខ្សែបន្ទាត់ព្រំដែនដើម្បីពង្រឹងលើការទប់ស្កាត់ឲ្យបាននូវមេរោគកូវីដ-១៩ ដែលអាចឆ្លងដែនតាមរយៈពលករចំណាកស្រុកចូលក្នុងសហគមន៍ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៊ឹម កុសល អ្នកនាំពាក្យនៃស្នងការដ្ឋាននគរបាលខេត្តបាត់ដំបង បានបញ្ជាក់ថា ចាប់តាំងពីមានករណីឆ្លងនៃជំងឺកូវីដ-១៩ គឺកម្លាំងសមត្ថកិច្ចចម្រុះបានយកចិត្តទុកដាក់យ៉ាងខ្លាំងលើកិច្ចការពារតាមខ្សែបន្ទាត់ ពិសេសនៅពេលថ្មីៗនេះកម្លាំងបានបន្ថែមជាច្រើនទៀតដើម្បីទប់ស្កាត់ឲ្យបាននូវការលួចឆ្លងដែនរបស់ពលករខ្មែរ ដែលមិនបានធ្វើចត្តាឡីស័ក គឺអាចប្រឈមទៅនឹងការរីករាលដាលចូលទៅក្នុងសហគមន៍ ។

លោកក៏បានបន្ថែមថា បច្ចុប្បន្នក្រៅពីកម្លាំងអធិការដ្ឋានដែលជាប់នឹងព្រំដែនថៃ ដូចជាស្រុកសំឡូត ស្រុកសំពៅលូន ស្រុកភ្នំព្រឹក និងស្រុកកំរៀង ក៏មានកម្លាំងវរៈការពារព្រំដែនគោកទាំង៤ បន្ថែមទៀត ក្នុងនោះគឺវរៈ៨២៣ វរៈ៣១០ វរៈ៨១៧ និងវរៈ៨១៩ ពិសេសក៏មានការចូលរួមក្នុងការងារនេះដែរ ដូចជាកម្លាំងសឹករង កម្លាំងយោធាព្រំដែន កម្លាំងកងរាជអាវុធហត្ថ អន្តោប្រវេសន៍ និងកម្លាំងភូមិភាគ៥ ជាដើម។ល។

ដោយឡែកលោកឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបង បានមានប្រសាសន៍ថា មិនត្រឹមតែច្រកអន្តរជាតិច្រកតំបន់ ឬក៏ច្រករបៀងនោះទេ កម្លាំងបានចេញល្បាត និងត្រួតពិនិត្យគ្រប់ច្រកល្ហក ដើម្បីទប់ស្កាត់ឲ្យបាននូវការលបឆ្លងដែនរបស់ពលករ ដែលវិលត្រឡប់មកស្រុកកំណើតវិញដោយមិនបានបង្ហាញខ្លួនដើម្បីឲ្យសមត្ថកិច្ចជំនាញ និងក្រុមគ្រូពេទ្យធ្វើចត្តាឡីស័ក ទេនោះ គឺដាច់ខាតកុំឲ្យមានការរីករាលដាលនូវមេរោគកូវីដ-១៩ ចូលទៅក្នុងសហគមន៍ នេះគឺជាជំហរយ៉ាងច្បាស់លាស់របស់លោកឧត្តមសេនីយ៍ស្នងការ ក៏ដូចជាគណបញ្ជការកងឯកភាពខេត្ត ដើម្បីភាពសុខសាន្តរបស់ប្រជាពលរដ្ឋ ទោះបីជាមានការនឿយហត់ ឬលំបាកយ៉ាងណាក៏ដោយ ៕

អត្ថបទ ៖ សោ និយមរ័ត្ន