សាលាក្រុងភ្នំពេញ ចំណាយថវិកាប្រមាណ២លានដុល្លារក្នុង១ខែ លើសេវាដឹកជញ្ជូនសំរាម ក្នុងរាជធានី

រដ្ឋបាលរាជធានីភ្នំពេញ ត្រូវចំណាយថវិកាយ៉ាងហោចណាស់ក្នុងមួយខែប្រមាណ២លានដុល្លារសហរដ្ឋអាមេរិក ទៅលើសេវា បង់ថ្លៃ ប្រមូល និងដឹកជញ្ជូនសំរាម សំណល់រឹងនៅក្នុងរាជធានីភ្នំពេញ ដែលក្នុងចំនួននេះ រដ្ឋបាលរាជធានី ត្រូវខាតបង់ថវិកាប្រមាណពី៥០ទៅ៦០ម៉ឺនដុល្លារក្នុង១ខែ។

នេះបើតាមការបញ្ជាក់របស់លោក ហួត ហៃ អភិបាលរងរាជធានីភ្នំពេញ នារសៀលថ្ងៃទី១១ ខែមករា ក្នុងកិច្ចប្រជុំស្តីពីការពង្រឹងតួនាទី ភារកិច្ច របស់ភ្នាក់ងារអនាម័យនៅតាមសង្កាត់ទាំង១០៥ ការជំរុញការផាកពិន័យ ចំពោះអ្នកដែលចោលសំរាម និងសំណល់រឹងខុសម៉ោង និងទីតាំងដែល បានកំណត់ និងអ្នកដែលមិនព្រមបង់ថ្លៃសេវាប្រមូល និងដឹកជញ្ជូនសំរាម សំណល់រឹង និងការអនុវត្តអនុស្សរណៈយោគយល់ រវាងក្រសួងបរិស្ថាន និងរដ្ឋបាលរាជធានីភ្នំពេញ ស្តីពីយុទ្ធនាការកាត់បន្ថយការប្រើប្រាស់ប្លាស្ទិក “ថ្ងៃនេះ ខ្ញុំមិនប្រើថង់ប្លាស្ទិកទេ”។

លោកហួត ហៃ បានពន្យល់ថា កាលពីមានក្រុមហ៊ុន ស៊ីន ទ្រីតែមួយ ការប្រមូលសម្រាមបានចំនួន២៧០០តោនក្នុងមួយថ្ងៃប៉ុណ្ណោះ តែនៅពេលមានក្រុមហ៊ុនប្រមូលសំរាម៣ ក្នុង១ថ្ងៃក្រុមហ៊ុនប្រមូលសំរាមបានប្រមាណ៣៩០០តោន ហើយក្នុង១តោន រដ្ឋបាលរាជធានី ត្រូវចំណាយថវិកាឱ្យទៅក្រុមហ៊ុន ជាង២០ដុល្លារក្នុងមួយតោន។ ក្នុងចំនួននេះរដ្ឋបាលរាជធានីភ្នំពេញ ត្រូវចំណាយថវិកាយ៉ាងហោចណាស់ក្នុងមួយខែប្រមាណ២លានដុល្លារសហរដ្ឋអាមេរិក ទៅលើសេវា បង់ថ្លៃ ប្រមូល និងដឹកជញ្ជូនសំរាម សំណល់រឹងនៅក្នុងរាជធានីភ្នំពេញ ដោយក្នុងចំនួននេះ រដ្ឋបាលរាជធានី ត្រូវខាតបង់ថវិកាប្រមាណពី៥០ទៅ៦០ម៉ឺនដុល្លារក្នុង១ខែ។

ជាមួយគ្នានេះ លោកបានបន្តថា ភ្នាក់ងារអនាម័យនៅតាមសង្កាត់ទាំង១០៥ ជាភ្នែក ជាច្រមុះរបស់រដ្ឋបាលរាជធានីភ្នំពេញ។ ជាមួយគ្នានេះ លោកក៏បានណែនាំឱ្យភ្នាក់ងារអនាម័តតាមសង្កាត់ចុះពិនិត្យឱ្យបានជាប្រចាំ ជុំវិញ ការទុកដាក់សំរាម សំណល់រឹង ពិសេសរបាំងទ្រូងផ្លូវ ដាច់ខាត កុំអោយមានដី ឬធូលី ប្រឡាក់។ ក្នុងករណីពិនិត្យរកឃើញបើឃើញត្រូវជំរាបទៅភ្នាក់ងារក្រុមហ៊ុនប្រមូលសំរាម ដើម្បីមកសំអាតឬកើបចេញ។ មិនដូច្នេះទេ បើអភិបាលរាជធានីភ្នំពេញធ្វើដំណើរឆ្លងកាត់ឃើញទ្រូងផ្លូវ(ប្លូ)មានដី ឬធូលី ប្រឡាក់នោះ ភ្នាក់ងារអនាម័យនៅតាមសង្កាត់នោះនឹងប្រឈមការផ្លាស់ប្តូរចេញ។

លោកបន្ថែមថា ភ្នាក់ងារអនាម័យនៅតាមសង្កាត់ក្នុងរាជធានីភ្នំពេញ ជាអ្នកផាកពិន័យ ទៅលើអ្នកចោលសំរាម និងសំណល់រឹងខុសម៉ោង និងទីតាំងដែល បានកំណត់។ យើងបានផ្សព្វផ្សាយ អប់រំច្រើនឆ្នាំមកហើយ វាល្មមដល់ពេលវេលាត្រូវផាកពិន័យ ទៅលើអ្នកចោលសំរាម ខុសម៉ោង និងទីតាំងដែល បានកំណត់ហើយ បើនៅតែអប់រំ ផ្សព្វផ្សាយទៀត ភ្នំពេញមិនដឹងថា ថ្ងៃណាបានស្អាតនោះទេ៕ 

អត្ថបទដោយ៖ស្រីរ័ត្ន