ក្រសួងការពារជាតិលុបឈ្មោះនាយទាហាន២រូបចេញពីក្របខណ្ឌនៃកងយោធពលខេមរភូមិន្ទ

លោក ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានសម្រេចលុបឈ្មោះនាយទាហានចំនួន២រូបចេញពីក្របខណ្ឌ នៃកងយោធពលខេមរភូមិន្ទ ដោយសារជាប់ពាក់ព័ន្ធការប្រើប្រាស់គ្រឿងញៀន។

យោងតាមសេចក្ដីប្រកាសកាលពីថ្ងៃទី៩ ខែមករា ឆ្នាំ២០២៤ ដែលចុះហត្ថលេខាដោយនាយឧត្ដមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានសម្រេចលុបឈ្មោះលោកវរនាវីត្រី ត្រី ដារ៉ា អត្តលេខ ២២៤៤១៨ មេបញ្ជាការរង កងកាំភ្លើងការពារអាកាស មូលដ្ឋានសមុទ្រ កងទ័ពជើងទឹក និងលោកវរសេនីយ៍ត្រី រ៉េន ស៊ីណាត អត្តលេខ ១៩៦៨៤៧ មេបញ្ជាការរងមូលដ្ឋានកងរាជអាវុធហត្ថ ខណ្ឌជ្រោយចង្វារ បញ្ជាការដ្ឋានកងរាជអាវុធហត្ថរាជធានីភ្នំពេញ ចេញពីក្របខណ្ឌ នៃកងយោធពលខេមរភូមិន្ទ។

ក្នុងសេចក្ដីប្រកាសបានបញ្ជាក់ថា ការលុបឈ្មោះនាយទាហាន២រូបចេញពីក្របខណ្ឌនៃកងយោធពលខេមរភូមិន្ទនេះ គឺដោយសារជាប់ពាក់ព័ន្ធការប្រើប្រាស់គ្រឿងញៀន៕