ព័ត៌មានជាតិ

កម្ពុជានៅរក្សាបានគុណភាពខ្យល់ល្អ មិនមានសញ្ញាព្រួយបារម្ភនោះទេ

បានផុស

២ years មុន

នៅ

ថ្ងៃចន្ទ ២៩ មករា ២០២៤

ដោយ

ក្រសួងបរិស្ថាន បានឲ្យដឹងនៅព្រឹកថ្ងៃទី២៩ ខែមករា ឆ្នាំ២០២៤ នេះថា គុណភាពខ្យល់នៅក្នុងប្រទេសកម្ពុជា ជាពិសេសនៅតាមបណ្ដារាជធានី-ខេត្ត មានភាពល្អប្រសើរ។

ក្រសួងបរិស្ថានបានបញ្ជាក់ថា តាមរយៈការតាមដានគុណភាពខ្យល់កំឡុងពេលមួយខែកន្លងមកនេះ ប្រទេសកម្ពុជាមិនទាន់មានការកត់សម្គាល់ពីការធ្លាក់ចុះគុណភាពខ្យល់គួរឲ្យព្រួយបារម្ភនៅឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងបរិស្ថានបានពិនិត្យ តាមដានដោយយកចិត្តទុកដាក់ពីមន្រ្តីជំនាញ និងឧបករណ៍តាមដានត្រួតពិនិត្យគុណភាពខ្យល់សាធារណៈចំនួន ១៤ទីតាំងនៅរាជធានីភ្នំពេញ និង ៣៧ទីតាំង នៅតាមបណ្ដាខេត្ត។

ការរក្សាបានសន្ទស្សន៍គុណភាពខ្យល់ (AQI) ល្អ និងល្អប្រសើរនៅគ្រប់ទីតាំងទាំងអស់នោះ ជាលទ្ធផលដោយមានកិច្ចសហការពីអ្នកពាក់ព័ន្ធ និងរដ្ឋបាលថ្នាក់ក្រោមជាតិ ជាមួយនឹងវិធានការណ៍មួយចំនួនដែលក្រសួងដាក់ចេញ។

ក្រសួងបរិស្ថានបញ្ជាក់ថា ទោះបីជាគុណភាពខ្យល់នៅកម្ពុជាមានភាពល្អប្រសើរ ប៉ុន្តែក្រសួងបរិស្ថានក៏បានស្នើឲ្យរដ្ឋបាលរាជធានីភ្នំពេញ និងខេត្តទាំងអស់បន្តជំរុញផ្សព្វផ្សាយការអនុវត្តសារាចរលេខ ០១ សរ របស់រាជរដ្ឋាភិបាល ស្តីពីវិធានការទប់ស្កាត់ និងកាត់បន្ថយការបំពុលខ្យល់សាធារណៈ ដល់រដ្ឋបាលក្រុង ស្រុក ខណ្ឌ ឃុំ សង្កាត់ និងប្រជាពលរដ្ឋ នូវវិធានការសំខាន់ ៣ចំណុច ដែលក្រសួងបរិស្ថានបានដាក់ចេញនាពេលកន្លងមក។

ជាក់ស្ដែង កំហាប់ភាគល្អិតនិចលដែលមានវិជ្ឈមាឌតូចជាង ឬស្មើ ២,៥មីក្រូម៉ែត្រ ឬហៅថា PM2.5 មានកំហាប់ចន្លោះពី ១៨,០៣ µg/m3 ទៅ ២១,៤៣ µg/m3 ដែលទាបជាងស្តង់ដារដែលក្រសួងបរិស្ថាន បានកំណត់គឺ ៥០ µg/m3 ជាមធ្យមក្នុងរយៈពេល ២៤ម៉ោង៕

Related Topics:គុណភាពខ្យល់