ជនណាមិនបានប្រកាសទ្រព្យសម្បត្តិ និងបំណុល ត្រូវផ្តន្ទាទោសដាក់ពន្ធនាគារពី១ខែ ទៅ១ឆ្នាំ

ប្រធាននាយកដ្ឋានប្រកាសទ្រព្យសម្បត្តិ និងបំណុល បានឱ្យដឹងថា ជនណាមិនបានប្រកាសទ្រព្យសម្បត្តិ និងបំណុល
ត្រូវផ្តន្ទាទោសដាក់ពន្ធនាគារពី ១ខែ ទៅ១ឆ្នាំ ខណៈនៅសល់តែ ២ថ្ងៃទៀតប៉ុណ្ណោះ ការប្រកាសទ្រព្យសម្បត្តិ និងបំណុល តាមរបប ២ឆ្នាំ ឆ្នាំ២០២៤ នឹងត្រូវបញ្ចប់។

លោក ញីវ បញ្ញារិទ្ធ ប្រធាននាយកដ្ឋានប្រកាសទ្រព្យសម្បត្តិ និងបំណុលបានឱ្យដឹងថា យោងតាមមាត្រា ៣៨នៃច្បាប់ ស្តីពីការប្រឆាំងអំពើពុករលួយបានចែងថា ជនណាដែលមិនបានប្រកាសទ្រព្យសម្បត្តិ និងបំណុល ឬបាន ប្រកាសមិនត្រឹមត្រូវនូវទ្រព្យសម្បត្តិរបស់ខ្លួនទៅតាមបទប្បញ្ញត្តិនៃច្បាប់នេះ ត្រូវផ្តន្ទាទោសដាក់ពន្ធនាគារពី ១ (មួយ) ខែ ទៅ ១ (មួយ) ឆ្នាំ និងពិន័យជាប្រាក់ពី ១០០.០០០ (មួយសែន) រៀល ទៅ ២.០០០.០០០ (ពីរលាន) រៀល ហើយត្រូវបានបង្ខំឱ្យធ្វើការប្រកាសទ្រព្យសម្បត្តិ ជូនអង្គភាពប្រឆាំងអំពើពុករលួយ។ ក្នុងករណី រឹងរូសមិនព្រមប្រកាសទ្រព្យសម្បត្តិទៀត ត្រូវផ្តន្ទាទោសទ្វេដង។ ដូច្នេះសូមបុគ្គលដែលមិនទាន់បានមកប្រកាសទ្រព្យសម្បត្តិ និងបំណុល សូមអញ្ជើញមកប្រកាសឱ្យបានរួសរាន់ តាមច្បាប់កំណត់។

លោកបញ្ជាក់បន្ថែមថា នៅព្រឹកថ្ងៃទី២៩មករានេះ ក្រសួងសង្គមកិច្ច អតីតយុទ្ធជន និងយុវនីតិសម្បទា ក៏បានបញ្ចប់ការប្រកាសទាំងស្រុង ១០០% នៃចំនួនបុគ្គលដែលជាប់កាតព្វកិច្ចប្រកាសទ្រព្យសម្បត្តិ និងបំណុល តាមរបប២ឆ្នាំ
ឆ្នាំ២០២៤ ផងដែរ។

បើតាមអង្គភាពACUបានបញ្ជាក់ទៀតថា មានមន្រ្តីចំនួន៥៥០នាក់ ដែលជាប់កាតព្វកិច្ចក្នុងការប្រកាសទ្រព្យសម្បត្តិ និងបំណុលបានចូលខ្លួនមកកាន់អង្គភាពACUបានប្រកាសទ្រព្យសម្បត្តិរបស់ខ្លួនគិតចាប់តាំងពីថ្ងៃទី១ ដល់ថ្ងៃទី២៩ ខែមករាឆ្នាំ២០២៤នេះ។

ការប្រកាសទ្រព្យសម្បត្តិ និងបំណុលនេះរួមមានមន្រ្តីទើបតែងតាំងថ្មីចំនួន២៨៤នាក់ និងមន្រ្តីមកប្រកាសចុងក្រោយមានចំនួន២៦៥នាក់ មូលហេតុមកប្រកាសក្រោយគេដោយសារឈប់ពីការងារ.ចូលនិវនត្ត និងចប់អាណត្តិការងារ។ ចំណែកមន្រ្តីចំនួន១៨០០១នាក់ បានមកចូលខ្លួនមកប្រកាសទ្រព្យ និងបំណុលតាមច្បាប់កំណត់ គឺជាប់កាតព្វកិច្ចត្រូវតែប្រកាសទ្រព្យសម្បត្តិ និងបំណុលក្នុងចំណោមមន្រ្តីដែលត្រូវមកប្រកាសទ្រព្យសម្បត្តិក្នុងរយៈពេល២ឆ្នាំម្តងមានសរុបចំនួន១ម៉ឺន៨ពាន់១៣២នាក់៕

អត្ថបទ៖ សំអឿន