រដ្ឋមន្ត្រីអប់រំ៖ ការអនុវត្តស្តង់ដាសាលារៀនគំរូដើម្បីពង្រឹងចំណេះដឹង និងសីលធម៌សិស្ស

បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡាបានអះអាងថា ការអនុវត្តស្តង់ដាសាលារៀនគំរូ គឺជាកំណែទម្រង់អប់រំកម្រិតសាលារៀនជាកញ្ចប់ដោយផ្តោតជាសំខាន់លើគ្រឹះស្ថានសិក្សាសាធារណៈ ចាប់ពីកម្រិតមត្តេយ្យសិក្សារហូតដល់កម្រិតមធ្យមសិក្សាទុតិយភូមិ ក្នុងគោលបំណងពង្រឹងចំណេះដឹង និងសីលធម៌របស់សិស្សឱ្យបានល្អប្រសើរ ដើម្បីឈានទៅថ្នាក់ឧត្តមសិក្សា។

ក្នុងពិធីប្រកាសដាក់ឱ្យអនុវត្តស្តង់ដារៀនគំរូ ក្នុងរាជធានីភ្នំពេញ នៅថ្ងៃទី១ កុម្ភៈនេះ លោកឧបនាយករដ្ឋមន្ត្រីបានបន្តថាការដាក់ឱ្យអនុវត្តស្តង់ដាសាលារៀនគំរូ នៅរាជធានីភ្នំពេញ ដែលជាការឆ្លើយតបនឹងស្មារតីនៃកិច្ចប្រជុំដំបូងរបស់គណៈរដ្ឋមន្ត្រី នីតិកាលទី៧នៃរដ្ឋសភា កាលពីថ្ងៃទី២៤ ខែសីហា ឆ្នាំ២០២៣ ដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ចេញវិធានការគន្លឹះចំនួន ៤ ក្នុងគោលដៅពង្រឹងគុណភាពគ្រឹះស្ថានសិក្សារដ្ឋ ចាប់ពីថ្នាក់មត្តេយ្យសិក្សាដល់មធ្យមសិក្សា រួមមានទី១. ការពង្រឹងអភិបាលកិច្ចសាលារៀន ទី២. ការពិនិត្យ កែសម្រួល និងរៀបចំកម្មវិធីសិក្សា, និងសកម្មភាពក្រៅម៉ោងសិក្សាឱ្យស្របទៅតាមតម្រូវការក្នុងការពង្រឹងចំណេះដឹង, វិន័យ, សីលធម៌ និងឥរិយាបថរបស់សិស្ស ទី៣. ការយកចិត្តទុកដាក់លើសុខភាពរបស់សិស្ស តាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលារៀន និងទី៤. ការជំរុញ និងលើកទឹកចិត្តការចូលរួមរបស់មាតាបិតា អ្នកអាណាព្យាបាល និងសហគមន៍ក្នុងការអប់រំស្របតាមពាក្យស្លោក «ភាពជាដៃគូរដ្ឋ និង សហគមន៍ ដើម្បីការអប់រំ»។

លោកឧបនាយករដ្ឋមន្ត្រីបានបន្តទៀតថា ក្រសួងអប់រំបានពិនិត្យឡើងវិញលើស្តង់ដាសាលារៀន ដែលបានដាក់ ចេញនាពេលកន្លងមក ដោយបញ្ជ្រាបចំណុចគន្លឹះទាំង៤ខាងលើទៅក្នុង “ស្តង់ដាសាលារៀន គំរូ” ចំនួន ៥ សម្រាប់មត្តេយ្យសិក្សារហូតដល់មធ្យមសិក្សា រួមមានស្តង់ដាទី១ ផ្តោតលើ លទ្ធផលសិក្សារបស់សិស្ស ស្តង់ដាទី២ ផ្តោតលើ ការបង្រៀននិងរៀន ស្តង់ដាទី៣ ផ្តោតលើ ការចូលរួមរបស់សហគមន៍ ស្តង់ដាទី៤ ផ្តោតលើ ដំណើរប្រតិបត្តិការនិងរដ្ឋបាលសាលារៀន និងស្តង់ដាទី៥ ផ្តោតលើ គណនេយ្យភាពរបស់សាលារៀន ។សាលារៀនគំរូនឹងផ្តោតលើលទ្ធផលសិក្សារបស់សិស្ស ដោយសាលារៀនត្រូវផ្តោតការ យកចិត្តទុកដាក់ និងកំណត់យកលទ្ធផលសិក្សារបស់សិស្សជាគោល ដោយប្រើប្រាស់យន្តការ ពីលើចុះក្រោម និងពីក្រោមទ្បើងលើ។

លោកឧបនាយករដ្ឋមន្ត្រីបានបន្ថែមទៀតថា ចំពោះយន្តការពីលើចុះក្រោមគឺក្រសួងនឹងជ្រើសរើសវិទ្យាល័យ និងអនុវិទ្យាល័យចំនួន ២០០ ដែលមានអត្រាសិស្សទទួលបាននិទ្ទេស A, B, C ខ្ពស់ជាងគេ ឬដែលមានអត្រាសិស្សប្រទ្បងជាប់សម្រេចបានស្មើ ឬខ្ពស់ជាងលទ្ធផលមធ្យមភាគថ្នាក់ជាតិ ដើម្បីធ្វើការវាយតម្លៃ ។សិស្សមធ្យមសិក្សាបឋមភូមិគឺគ្រឹះស្ថានសិក្សាដែលមានពិន្ទុរង្វាយតម្លៃសិក្សាថ្នាក់ជាតិថ្នាក់ទី ៨ ឬ អន្តរជាតិ (PISA) ខ្ពស់និងសម្រាប់សិស្សបឋមសិក្សាគឺ គ្រឹះស្ថានសិក្សាដែលមានសិស្សទទួលបានពិន្ទុរង្វាយ តម្លៃសិក្សាថ្នាក់ទី ៣ និងទី ៦ ខាងផ្នែកអំណាន និងគណិតវិទ្យាខ្ពស់។

ចំណែកឯយន្តការពីក្រោមទ្បើងលើ គឺមន្ទីរអប់រំ យុវជន និងកីទ្បា ឬគ្រឹះស្ថានសិក្សាមាន សិទ្ធិស្នើបេក្ខភាពសាលារៀនគំរូ សម្រាប់គណៈកម្មការថ្នាក់ជាតិចុះវាយតម្លៃ។ ខេត្តដែលមាន សាលារៀនគំរូច្រើន ប្រធានមន្ទីរនឹងត្រូវទទួលស្គាល់ថា ជាប្រធានមន្ទីរគំរូផងដែរ។

ជាមួយគ្នានេះដែរនៅក្នុងអំឡុងពេលនៃដំណើរការឆ្នាំសិក្សា ២០២៣-២០២៤ ក្រសួងនឹងជ្រើសរើស សាលារៀនសំណាក ដែលជាសាលារៀនមានសក្តានុពលប្រមាណ ៥០០ ទៅ ១០០០ សាលា ដើម្បីទទួលការជួយគាំទ្រនិងធ្វើការវាយតម្លៃ ដោយរំពឹងថាសម្រេចបានតាមស្តង់ដាសាលារៀនគំរូ ក្នុងរយៈពេល២ឆ្នាំខាងមុខ។ ក្នុងរយៈពេលចំពោះមុខ ក្រសួងនឹងវាយតម្លៃជ្រើសរើស សាលារៀនប្រមាណ ៥០ សម្រាប់ប្រកាសនៅក្នុងសន្និបាតអប់រំ ដែលគ្រោងប្រារព្ធឡើងនៅដើមខែមេសា ឆ្នាំ២០២៤ ខាងមុខនេះ។

លោកឧបនាយករដ្ឋមន្ត្រីបានស្នើឱ្យគ្រប់ភាគីពាក់ព័ន្ធទាំងអស់ត្រូវសហការគ្នាបន្តផ្សព្វផ្សាយស្តង់ដាសាលារៀនគំរូឱ្យបានទូលំទូលាយទៅដល់សាលារៀន និងរៀបចំផែនការសកម្មភាពសម្រាប់អនុវត្តរួមគ្នា ឆ្ពោះទៅសម្រេចឱ្យបានតាមតម្រូវការរបស់ក្រសួង និងរាជរដ្ឋាភិបាលក្នុងការអភិវឌ្ឍធនធានមនុស្ស៕

អត្ថបទ៖ សំអឿន