កំណាត់​ផ្លូវជាតិលេខ ១ ប្រវែង​ជិត ៣ គីឡូម៉ែត្រគ្រោង​បើកការដ្ឋានជួសជុលអ៊ុតកៅស៊ូ​ឆាប់ៗ​នេះ

មន្ទីរសាធារណការនិងដឹកជញ្ជូនខេត្តកណ្តាល បានចេញ​សេចក្តី​​ជូនដំណឹង​ពីគម្រោង​​ជួសជុលឡើងវិញកំណាត់​ផ្លូវជាតិលេខ១ ប្រវែង ២ ៩៧០ ម៉ែត្រនៅស្រុក​កៀនស្វាយ​ ខេត្តកណ្តាល។

នៅក្នុង​សេចក្តីជូ​នដំណឹង​ដល់​​បងប្អូនប្រជាពលរដ្ឋដែលរស់នៅ និងធ្វើចរាចរណ៍តាមបណ្តោយផ្លូវជាតិលេខ ១ ស្ថិតក្នុងស្រុកកៀនស្វាយ ខេត្តកណ្តាល មន្ទីរសាធារណការ និងដឹកជញ្ជូនខេត្តកណ្តាល នឹងបើកការដ្ឋានជួសជុលឡើងវិញផ្លូវជាតិលេខ១ មានប្រវែង ២ ៩៧០​ម៉ែត្រ ទទឹង ១២​ ម៉ែត្រ (ចន្លោះគ.ម ៣៨+១០០ ដល់ គ.ម ៤០+៧២០ និងគ.ម ៤៨+០០០ ដល់​គ.ម ៤៨+​៣៥០​) ដោយកាត់បកយកកៅស៊ូចាស់ចេញដោយកន្លែង រួចកាយគ្រឹះផ្លូវ ចាក់ដីល្បាយថ្មកម្រាស់ ០,២៥ ម៉ែត្រ និងចាក់ក្រាលថ្មមិចកម្រាស់ ០,២៥ ម៉ែត្រ កៀរកិនបង្ហាប់ រួចចាក់ក្រាលកៅស៊ូ AC បំពេញ ហើយ​ចាក់ក្រាលបេតុងកៅស៊ូ AC ជាន់ទី២ (Overlay) កម្រាស់ ៥ សង់ទីម៉ែត្រ ចាប់ពីថ្ងៃទី១៤ ខែកុម្ភៈ ឆ្នាំ២០២៤ ខាង​មុខនេះតទៅរហូតដល់គម្រោងត្រូវបញ្ចប់៕