ព័ត៌មានជាតិ

មន្ទីរសាធារណការខេត្តកណ្ដាល ចុះពិនិត្យការងាររំដោះទឹកចេញពីកំណាត់ ផ្លូវជាតិលេខ ២ ចាប់ពីចំហៀងសាលាខេត្តចាស់មកមាត់ស្ទឹងព្រែកត្នោត

បានផុស

១១ ខែ មុន

នៅ

ថ្ងៃសៅរ៍ ២១ មិថុនា ២០២៥

ដោយ

មន្ទីរសាធារណការ និងដឹកជញ្ជូនខេត្តកណ្ដាល បានចុះពិនិត្យការងាររំដោះទឹកចេញពីកំណាត់ផ្លូវជាតិលេខ ២ ចាប់ពីចំហៀងសាលាខេត្តចាស់ មកមាត់ស្ទឹងព្រែកត្នោត ក្រុងតាខ្មៅ ដែលតែងតែមានការជន់លិចនៅពេលមានភ្លៀងធ្លាក់ម្ដងៗ ក្រោយមានការណែនាំពី លោក គួច ចំរើន អភិបាល នៃអភិបាលខេត្តកណ្ដាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងកាលពីរសៀលថ្ងៃទី ២០ ខែមិថុនា ឆ្នាំ ២០២៥ ម្សិលមិញ លោក បូរី វង្សសានិត្យ ប្រធានមន្ទីរសាធារណការ និងដឹកជញ្ជូនខេត្ត និងលោក ចាប វន្នី ប្រធានមន្ទីរព័ត៌មានខេត្ត ព្រមទាំងមន្ត្រីជំនាញពាក់ព័ន្ធ បានចុះពិនិត្យការងាររំដោះទឹកចេញពីកំណាត់ផ្លូវជាតិលេខ ២ ចាប់ពីចំហៀងសាលាខេត្តចាស់ មកមាត់ស្ទឹងព្រែកត្នោត។

លោក បូរី វង្សសានិត្យ មានប្រសាសន៍ថា កន្លងមក ឲ្យតែមានភ្លៀងធ្លាក់ តែងតែឃើញថា មានទឹកដក់ និងជន់លិចនៅតាមផ្លូវ និងចំហៀងសាលាខេត្តជាប្រចាំ ដោយសារទីនេះមានប្រព័ន្ធលូចាស់ ដែលមានអាយុកាល ២៥ ឆ្នាំ មកហើយ ហើយលូនេះថែមទាំងមានមុខកាត់តូចតែ ៦ តឹក។ បើគិតមកដល់ពេលនេះ សម្រាប់ការអភិវឌ្ឍ និងចំនួនប្រជាពលរដ្ឋរស់នៅយ៉ាងច្រើនកុះករ មានការលក់ដូរក៏ច្រើន ទើបធ្វើឲ្យប្រព័ន្ធលូនេះមានលក្ខណៈមិនសមស្រប បើប្រៀបជាមួយការអភិវឌ្ឍនាពេលបច្ចុប្បន្ននេះ។

លោកប្រធានមន្ទីរសាធារណការ បានបន្ថែមថា ចំពោះបញ្ហារំដោះទឹកនេះ រដ្ឋបាលខេត្ត ក៏បានគិតគូរដាក់លូថ្មីផងដែរ តែក្នុងពេលចំពោះមុខ ដើម្បីដោះស្រាយបញ្ហាបន្ទាន់នេះ មន្ទីរសាធារណការ បានធ្វើការកែសម្រួលច្រកចេញប្រវែង ២៤ ម៉ែត្រ ចាប់ផ្ដើមចេញពីរីហ្គែរធំធ្វើបណ្ដាញថ្មីដែលមានមុខកាត់ ១ ម៉ែត្រ និងធ្វើមាត់ឈ្នាងចេញទៅស្ទឹង ហើយថែមទាំងកែសម្រួលគម្របលូ និងទបង្ហូរទឹកតាមបណ្ដោយផ្លូវជាតិលេខ ២ ចំហៀងសាលាខេត្តចាស់ ដែលជាទីតាំងមានការលក់ដូរប្រកបអាជីវកម្មច្រើន ជាហេតុធ្វើឲ្យបិទមុខទឹកមិនឲ្យចូលក្នុងរីហ្គែរ។ ដូច្នេះត្រូវការកាយស្ដារឡើងវិញ រៀបចំទបង្ហូរទឹកថ្មី និងរៀបចំក្បាលរីហ្គែរថ្មី ប្រមាណ ៤០ ក្បាលវីហ្គែរ បន្ថែមទៀត។ សំដៅជួយពន្លឿនការបង្ហូរទឹកចូលលូឆាប់អស់ពីតួថ្នល់ កុំឲ្យមានការលិចលង់បន្ទាប់ពីភ្លៀងធ្លាក់រួច។

លោកប្រធានមន្ទីរសាធារណការ បានបញ្ជាក់ថា ការងារចំពោះមុខនេះ គឺធ្វើការតិចតួចទេ តែជាការងារសំខាន់ដែលអាចជួយដោះស្រាយបញ្ហាជន់លិចក្នុងពេលរដូវវស្សានេះបាន។ ការងារបន្ទាប់ទៀតនោះ មន្ទីរ នឹងរៀបចំផែនការសិក្សាឲ្យបានជាក់លាក់ ក្នុងការដូរលូចាស់ចេញ ហើយដាក់លូថ្មីដែលមានទំហំធំស្របទៅនឹងស្ថានភាពនាពេលបច្ចុប្បន្ន។ ការងារនេះ មន្ទីរ បានសិក្សាមួយជំហានរួចហើយ គ្រោងដាក់សំណើនេះជូន លោកអភិបាលខេត្ត ដើម្បីពិនិត្យ និងណែនាំបន្ថែមតែប៉ុណ្ណោះ។

លោកប្រធានមន្ទីរសាធារណការ ក៏បានអំពាវនាវដល់ប្រជាពលរដ្ឋរស់នៅតាមបណ្ដោយផ្លូវដែលមានប្រព័ន្ធបណ្ដាញលូ សូមមេត្តាជួយសហការសម្អាត កុំបោះចោលសំរាម ឬ ថង់ប្លាស្ទិក ចូលក្នុងបណ្ដាញលូ។ សូមជួយសម្អាតដី ក៏ដូចជាសំរាមនៅតាមមាត់លូជាប្រចាំ។ ជៀសវាងដាច់ខាត់ កុំយកសំរាមទម្លាក់ចូលក្នុងមាត់លូ ដែលជាហេតុបណ្ដាលឲ្យមានការជន់លិចបន្តទៀត មានតែការចូលរួមសម្អាតទាំងអស់គ្នាទេ ទើបធ្វើឲ្យទីក្រុងមានអនាម័យ និងបរិស្ថានល្អ៕

អត្ថបទ ៖ ម៉េង