លោក ស សុខា បញ្ជាឱ្យបន្តរឹតបន្ដឹងការត្រួតពិនិត្យគ្រឿងស្រវឹងឱ្យបានម៉ឺងម៉ាត់

លោក ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានបញ្ជាឱ្យស្នងការនគរបាលរាជធានី-ខេត្ត បន្តរឹតបន្ដឹងច្បាប់ ត្រួតពិនិត្យគ្រឿងស្រវឹង ឱ្យបានម៉ឺងម៉ាត់បន្ថែមទៀត។ លោកបានចេញបទបញ្ជាបែបនេះ នៅក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោក ឆ្នាំ២០២៣ និងលើកទិសដៅបន្ដ នៅទីស្តីការក្រសួងសាធារណការ និងដឹកជញ្ជូន នាព្រឹកថ្ងៃទី៧ ខែកុម្ភៈ ឆ្នាំ២០២៤។

ក្រៅពីបញ្ហាការត្រួតពិនិត្យលើការបើកបរដោយស្ថានភាពស្រវឹងនេះ លោក ស សុខា ក៏បានបញ្ជាឱ្យផាកពិន័យ និងពិនិត្យរថយន្ដគ្រប់ប្រភេទដែលបំពាក់ភ្លើងខុសបច្ចេកទេស ពិសេស ភ្លើងស៉ីរ៉ែន ឬភ្លើងហ្វា ផងដែរ។ លោកបានអះអាងឱ្យដឹងថា ការបំពាក់ភ្លើងខុសលក្ខណៈបច្ចេកទេសទាំងភ្លើងហ្វា និងភ្លើងក្រហមខៀវដូចភ្លើងស៊ីរ៉ែនរបស់សមត្ថកិច្ច តែងកើតមានឡើងនៅលើរថយន្ដដឹកទំនិញធុនធំ ហើយកន្លងទៅ លោកឃើញ និងជួបរថយន្ដទាំងនោះផ្ទាល់ពេលធ្វើដំណើរតាមបណ្ដាខេត្ត។

ប​ន្ថែមលើបញ្ហាការបំពាក់ភ្លើងខុសលក្ខណៈបច្ចេកទេសនេះ លោកឧបនាយករដ្ឋមន្ដ្រី ក៏បានណែនាំឱ្យពិនិត្យមើលរថយន្ដទាំងឡាយ ពិសេស រថយន្ដដឹកនាំទំនិញធុនធំដែលបិទស្ទឹកឃ័រអក្សរ ឬរូបភាពផ្សេងនៅលើកញ្ចក់ ឬដាក់រាំងនន ដែលធ្វើបាំងកំហើញនៅពេលបើកបរ ហើយជាកត្តាងាយរងគ្រោះថ្នាក់ដល់អ្នកដទៃនៅតាមដងផ្លូវ។ លោកបានដាក់បទបញ្ជាឱ្យផាកពិន័យ និងពិនិត្យ ឱ្យមានប្រសិទ្ធភាព។

លោក ស សុខា បានបញ្ជាក់ថា​ កន្លងទៅ ស្នងការនគរបាលរាជធានី-ខេត្ត អនុវត្តការងារនេះបានល្អហើយ ប៉ុន្ដែ ហាក់មិនទាន់មានប្រសិទ្ធភាព ឬអស់ទាំងស្រុងនៅឡើយទេ ពោល គឺនៅបន្ដឃើញមានការដាក់វាំងនន ឬបិទអក្សរ ឬរូបភាពផ្សេងៗដោយផ្ទាល់តែម្ដង ហើយពេលខ្លះបើកកាត់គោលដៅសមត្ថកិច្ចតែម្ដង។ ដូច្នេះ ត្រូវពង្រឹងយកចិត្តទុកដាក់លើការងារនេះឡើងវិញនៅគ្រប់គោលដៅ។ លោកបន្តថា ការអនុវត្តវិធានការទាំងអស់នេះ គឺសំដៅកាត់បន្ថយគ្រោះថ្នាក់ចរាចរណ៍ ដែលនៅតែជាបញ្ហាប្រឈមក្នុងសង្គមនាពេលបច្ចុប្បន្ននេះ។

របាយការណ៍របស់អនុគណៈកម្មការទី២ នៃគណៈកម្មាធិការជាតិសុវត្ថិភាពចរាចរណ៍ផ្លូវគោក បានឱ្យដឹងថា នៅក្នុងឆ្នាំ២០២៣ គ្រោះថ្នាក់ចរាចរណ៍បានកើតឡើងសរុប ៣,៣១៧លើក (យប់៥៥%) បណ្តាលឲ្យស្លាប់មនុស្ស ១,៥៩០នាក់ និងរបួស ៤,៥១៥នាក់ (ធ្ងន់២,៧៦៦នាក់)។ មូលហេតុបង្កគ្រោះថ្នាក់ចរាចរណ៍ រួមមាន បើកបរល្មើសល្បឿន ៤១% មិនគោរពសិទ្ធិ ២២% មិនប្រកាន់ស្តាំ ៩% បត់ ៩% ប្រជែងគ្រោះថ្នាក់ ៧% កត្តាយាន ៥% ស្រវឹង ៣% ភ្លើង/សញ្ញា ១% សុខភាព/ងងុយ ១% និងកត្តាអាកាសធាតុ១%៕