អភិបាលខេត្តស្វាយរៀង​ ស្នើឪពុកម្តាយអប់រំកូនៗឱ្យចៀសឆ្ងាយពីគ្រឿងញៀន

លោក ប៉េង ពោធិ៍សា អភិបាលខេត្តស្វាយរៀង បានស្នើទៅឱពុក ម្តាយ និងអាណាព្យាបាល ត្រូវអប់រំកូនចៅឱ្យចៀសឆ្ងាយពីគ្រឿងញៀន ការសេពគប់មិត្តមិនល្អ និងជំរុញឱ្យពួកគេខិតខំរៀនសូត្រ ដើម្បីអនាគតខ្លួនឯង និងសង្គមជាតិ។ លោកលើកឡើងបែបនេះនៅក្នុងពិធីសម្ពោធខ្លោងទ្វារ និងសមិទ្ធផលនានានៅក្នុងវត្តឈេីទាល ស្ថិតនៅភូមិសង្គម ឃុំគគីសោម ស្រុកស្វាយទាប ខេត្តស្វាយរៀង នៅព្រឹកថ្ងៃទី១៧ ខែកុម្ភៈ ឆ្នាំ២០២៤។ 

ក្រៅពីអំពាវនាវដល់អាណាព្យាបាលឱ្យយកចិត្តទុកដាក់អប់រំកូនៗឱ្យបានល្អ ចៀសឆ្ងាយពីគ្រឿងញៀន លោក ប៉េង ពោធិ៍សា ក៏បានស្នើទៅអាជ្ញាធរគ្រប់លំដាប់ថ្នាក់ និងឪពុកម្តាយគ្រប់រូប ត្រូវចូលរួមផ្សព្វផ្សាយពីការគោរពច្បាប់ចរាចរណ៍ឱ្យត្រឹមត្រូវគ្រប់ៗគ្នា។ បន្តរួមគ្នាថែរក្សាការពារនូវសុខសន្តិភាព និងមានជំនឿជឿជាក់លេីការដឹកនាំរបស់ប្រមុខរាជរដ្ឋាភិបាល ហេីយប្រឆាំងដាច់ខាតចំពោះជនអគតិទាំងឡាយណាដែលមានបំណងចង់បំផ្លាញសន្តិភាព និងរួមគ្នាថែរក្សាសមិទ្ធផលនានាដែលមានស្រាប់ និងសមិទ្ធផលដែលនៅក្នុងវត្តអារាមត្រូវថែរក្សាឲ្យបានគង់វង្ស។

បន្ថែមពីនេះ លោក បានបន្តអំពាវនាវទៅកាន់អាជ្ញាធរមានសមត្ថកិច្ច ត្រូវយកចិត្តទុកដាក់ទៅលេីការអនុវត្តគោលនយោបាយភូមិឃុំមានសុវត្ថិភាព ការបង្រ្កាបល្បែងស៉ីសងខុសច្បាប់ និងអំពេីអសន្តិសុខផ្សេងៗទៀត។ អាជ្ញាធរ ត្រូវមានតួនាទី បន្តតាមដានការបង្កបង្កេីនផលស្រូវរបស់ប្រជាពលរដ្ឋ និងដោះស្រាយបញ្ហាប្រឈមនានា ដូចជា ការខ្វះខាតទឹកធ្វេីស្រែជាដេីម។

អភិបាលខេត្តស្វាយរៀងបញ្ជាក់ថា ស្របតាមប្រសាសន៍ណែនាំរបស់សម្តេចធិបតី ហ៊ុន ម៉ាណែត  អាជ្ញាធរមូលដ្ឋានត្រូវផ្សព្វផ្សាយឲ្យបានទូលំទូលាយដល់យុវជន និងអ្នកដែលមានជីវភាពខ្វះខាត គ្រួសាររងហានិភ័យ ត្រូវមកដាក់ពាក្សចូលសិក្សាជំនាញបណ្តុះបណ្តាលវិជ្ជាជីវៈ និងបច្ចេកទេសនៅសាលាវិទ្យាស្ថានពហុបច្ចេកទេសភូមិភាគតេជោសែនស្វាយរៀង ដែលជាការសិក្សាមិនឥតគិតថ្លៃ ព្រមទាំងទទួលបានថវិកាឧបត្ថម្ភប្រចាំខែថែមទៀតផង ដើម្បីជួយបណ្តុះបណ្តាលលើជំនាញផ្សេងៗដល់ពួកគេ៕