សមាគមយុវជនខ្មែរមហានគរ សាទរចំពោះគណ បក្សប្រជាជន ដែលទទួលបានសំឡេងឆ្នោតគាំទ្រ លើសលប់ក្នុងការបោះឆ្នោតព្រឹទ្ធសភា

សមាគមយុវជនខ្មែរមហានគរ អបអរសាទរ និងគាំទ្រយ៉ាងពេញទំហឹងចំពោះលទ្ធផលបឋមនៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ក្នុងនោះ គណបក្សប្រជាជនកម្ពុជា ទទួលបានសំឡេងឆ្នោតគាំទ្រដ៏ច្រើនលើសលប់ ខណៈដំណើរការបោះឆ្នោត បិទបញ្ចប់ដោយភាពរលូន គ្មានអំពើហិង្សា និងអនុវត្តតាមគោលការណ៍លទ្ធិប្រជាធិបតេយ្យ សេរី ពហុបក្ស និងយុត្តិធម៌។

តាមលទ្ធផលបឋម ដែលបង្ហាញដោយគណ:កម្មាធិការជាតិរៀបចំការបោះឆ្នោត គឺគណបក្សប្រជាជនកម្ពុជា ទទួលបានសំឡេងគាំទ្រយ៉ាងច្រើនលើសលប់នៅក្នុងមណ្ឌលភូមិភាគទាំង៨ ក្នុងសំឡេងឆ្នោតសរុបចំនួន១០ ០៥២សំឡេង ដែលនឹងអាចទទួលបានអាសនៈចំនួន៥៥អាសនៈ។

ជុំវិញលទ្ធផលនេះ សមាគមយុវជនខ្មែរមហានគរ បានចេញសេចក្ដីថ្លែងការណ៍ សម្ដែងការសាទរចំពោះលទ្ធផលនេះ ជាពិសេសសាទរចំពោះគណបក្សប្រជាជនកម្ពុជា​ ដែលបានទទួលជោគជ័យសម្រាប់ការបោះឆ្នោតព្រឹទ្ធសភា នីតិកាលទី៥ ដែលបានប្រព្រឹត្តទៅនាថ្ងៃទី២៥ ខែកុម្ភៈ ឆ្នាំ២០២។ សេចក្ដីថ្លែងការណ៍ បានកត់សម្គាល់ថា ការបោះឆ្នោតជ្រើសតំាងសមាជិកព្រឹទ្ធសភា ជាការបោះឆ្នោតអសកល ដែលមានសមាជិកសមាជិការដ្ឋសភា និងសមាជិកក្រុមប្រឹក្សាឃុំ សង្កាត់ ក្នុងតំណែងជាអង្គបោះឆ្នោតនេះ គឺបានអនុវត្តគោលការណ៍លទ្ធិប្រជាធិបតេយ្យដែលមានចែងនៅក្នុងរដ្ឋធម្មនុញ្ញកម្ពុជា ដោយបានរៀបចំការបោះឆ្នោតសកល និងអសកលជាទៀងទាត់ស្រប តាមច្បាប់ជាធរមាន ខណៈសុខសន្តិភាព គឺជាមូលដ្ឋានគ្រឹះធ្វើឱ្យកម្ពុជាមានលទ្ធភាពក្នុងការពង្រឹងលទ្ធិប្រជាធិបតេយ្យ និងពន្លឿនការអភិវឌ្ឍប្រទេសជាតិ លើកកម្ពស់ជីវភាពពលរដ្ឋឱ្យមានការរីកចម្រើនជាលំដាប់។

សមាគមយុវជនខ្មែរមហានគរ ដែលបណ្តុំអង្គការ សមាគម សង្គមស៊ីវិលនានា បានបង្ហាញក្ដីជឿជាក់ថា ក្រោមការដឹកនាំរបស់គណបក្សប្រជាជនកម្ពុជា ដែលមានសម្ដេច តេជោ ហ៊ុន សែន ជាប្រធានគណបក្ស និងសម្ដេចធិបតី ហ៊ុន ម៉ាណែត ជានាយករដ្ឋមន្រ្ដី នឹងដឹកនាំនាវាកម្ពុជាទៅកាន់ភាពរីកចម្រើន និងការអភិវឌ្ឍលើគ្រប់វិស័យ នឹងសម្រេចបាននូវគោលដៅកម្ពុជា ក្លាយទៅជាប្រទេសមានចំណូលខ្ពស់នៅឆ្នាំ២០៥០។ ជាពិសេសក្រោមការដឹកនាំប្រកបដោយគតិបណ្ឌិតរបស់ប្រធានគណបក្សប្រជាជនកម្ពុជា សម្តេចតេជោ ហ៊ុន សែន និងឥស្សរជនជាច្រើនទៀត ប្រទេសកម្ពុជាពីមួយអាណត្តិទៅមួយអាណត្តិ មានការអភិវឌ្ឍ និងរីកចម្រើនជាលំដាប់ និងឥតឈប់ឈរ៕