២ថ្ងៃជាប់គ្នា សមត្ថកិច្ចបង្ក្រាបបទល្មើសនេសាទ ៦ ទីតាំង​នៅ​ស្រុក​ឯកភ្នំ

បើតាមតាមរបាយការណ៍ដែលកម្ពុជាថ្មីទទួលបាន​ពីលោក ជួង សុភា នាយខ័ណ្ឌរដ្ឋបាលជលផលខេត្តបាត់ដំបងបាន​ឲ្យ​ដឹង​ថា ក្នុង​រយៈពេល ២ ថ្ងៃ​ជាប់​គ្នា​ ចាប់ពីថ្ងៃទី ១៥ រហូតដល់ថ្ងៃទី ១៦ ខែកុម្ភ: មន្រ្តីជលផល​បាន​ចុះ​បង្ក្រាបបទល្មើសធនធានធម្មជាតិ​នៅ​ក្នុងភូមិសាស្ត្រស្រុកឯកភ្នំ​បាន​ចំនួន ៦ ​ទីតាំង។

ទីតាំងទាំង ៦ មាន​នៅ​ចំណុច ក្បាលក្របី ព្រែកត្រសក់ ពាមក្បាលតោល មាត់ពាមកោះដាច់ ក្រឡុកសារ៉ាយ និង កប់ជេស (មាត់ទន្លេ) ស្ថិតក្នុងឃុំកោះជីវាំង ស្រុកឯកភ្នំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាលទ្ធផលនៃកិច្ចប្រតិបត្តិការទាំង ២ ថ្ងៃ ដកហូតបានរបាំងសាច់អួនប្រវែង ៦៧០០ ម៉ែត្រ, បង្គោលចំនួន ១៦០០ ដើម ,ឡុកចំនួន ៣៧ គ្រឿង និងកូនត្រីចម្រុះចំនួន ១៤០ គីឡូក្រាម បានព្រលែងចូលបឹងធម្មជាតិវិញ។ បើតាមប្រជា​សហគមន៍ ឃុំកោះជីវាំងនៃស្រុកឯកភ្នំ គឺជាគោលដៅប្រព្រឹត្តបទល្មើសនេសាទជាងបណ្តាឃុំ​ផ្សេង​ទៀត​ជាប់ដែនបឹងទន្លេសាប។

លោក ជួង សុភា នាយខ័ណ្ឌរដ្ឋបាលជលផលខេត្តបាត់ដំបងបានណែនាំ​ឲ្យ​មន្ត្រីប្រចាំការនៅក្នុងស្រុកឯកភ្នំ ត្រូវពង្រឹងសមត្ថភាពនៅលើគោលដៅងាយរងគ្រោះដោយយកចិត្តទុកដាក់ និង​ត្រូវសហការជាមួយប្រជាសហគមន៍ រួមនិងប្រជានេសាទជាលក្ខណះគ្រួសារផង ដើម្បីជួយផ្តល់ព័ត៌មានពាក់ព័ន្ធនិងករណីបទល្មើសនេសាទ និងងាយស្រួលក្នុងការបង្ក្រាប​ឲ្យកាន់តែមានប្រសិទ្ធិភាព៕

អត្ថបទ៖ សៅ សារិទ្ធ