បេក្ខជនជាង ២ពាន់នាក់ ចូលរួមប្រឡងជ្រើសរើសមន្ត្រីរាជការ ចូលបម្រើការងារក្នុងក្របខណ្ឌអង្គភាពប្រឆាំងអំពើពុករលួយ

បេក្ខជនជាង ២ពាន់នាក់ បានចូលរួមប្រឡងប្រជែងជ្រើសរើសមន្ត្រីរាជការ ចូលបម្រើការងារក្នុងក្របខណ្ឌអង្គភាពប្រឆាំងអំពើពុករលួយ នៅថ្ងៃទី ៣​ ខែមីនា ឆ្នាំ ២០២៤នេះ ខណៈដែលក្របខណ្ឌត្រូវជ្រើសរើសមានចំនួនតែ ៣៣នាក់ តែប៉ុណ្ណោះ។ នេះបើតាមឲ្យដឹងពីឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ។

ក្នុងពេលចុះត្រួតពិនិត្យការប្រឡង នៅសាកលវិទ្យាល័យភូមិន្ទភ្នំពេញ ឯកឧត្តម ហ៊ុន ម៉ានី មានប្រសាសន៍ថា ការប្រឡងប្រជែងជ្រើសរើសមន្ត្រីរាជការ ចូលបម្រើការងារក្នុងក្របខណ្ឌអង្គភាពប្រឆាំងអំពើពុករលួយនាពេលនេះ មានបេក្ខជនចុះឈ្មោះចូលរួមប្រឡងប្រជែងចំនួន ២,៤៧៩នាក់ ដោយមានស្ត្រីចំនួន ១,១៩៩នាក់ និងមានព្រះសង្ឃចំនួន ១៤អង្គ ព្រមទាំងមានជនមានពិការភាពចំនួន ១៥នាក់ ផងដែរ ខណៈការជ្រើសរើសយកមានចំនួនតែ ៣៣នាក់ តែប៉ុណ្ណោះ។

ឯកឧត្ដមឧបនាយករដ្ឋមន្ត្រី បានបញ្ជាក់ថា ការប្រឡងប្រជែងនេះ គឺអនុវត្តទៅតាមអនុក្រឹត្យរបស់រាជរដ្ឋាភិបាលកម្ពុជាលេខ ៣៧ ដែលបានដាក់ឲ្យប្រើប្រាស់នូវការជ្រើសរើសមន្ត្រីរាជការស៊ីវិល ដោយផ្អែកទៅលើនិយាមថ្មី។

ចំពោះការប្រឡងប្រជែងជ្រើសរើសមន្ត្រីរាជការ ចូលបម្រើការងារក្នុងក្របខណ្ឌអង្គភាពប្រឆាំងអំពើពុករលួយ និងការប្រឡងប្រជែងជ្រើសរើសមន្ត្រីរាជការ ចូលបម្រើការងារនៅក្នុងក្រសួង-ស្ថាប័នផ្សេងទៀត គឺផ្អែកទៅលើនិយាមថ្មី ដែលត្រូវបានបែងចែកជា ៣ដំណាក់កាល។ ដំណាក់កាលទី ១. ដំណាក់កាលនៃការផ្សព្វផ្សាយឲ្យបានទូលំទូលាយ, ដំណាក់កាលទី ២. ដំណាក់កាលនៃការប្រឡងប្រជែង និងដំណាក់កាលទី ៣. ដំណាក់កាលនៃការកែវិញ្ញាសា។

សម្រាប់វិញ្ញាសាប្រឡងវិញ គឺមានមុខវិជ្ជាពាក់ព័ន្ធនឹងក្រមព្រហ្មទណ្ឌ, ក្រុមនីតិវិធីព្រហ្មទណ្ឌ, ច្បាប់ ស្តីពី ការប្រឆាំងអំពើពុករលួយ និងច្បាប់មួយចំនួនទៀត រួមទាំងការវិភាគបទល្មើស ចំណេះដឹងទូទៅ ភាសាអង់គ្លេស និងកុំព្យូទ័រ ផងដែរ។

ឯកឧត្ដមរដ្ឋមន្ត្រីក្រសួងមុខងារសាធារណៈ បានបញ្ជាក់ថា ចំពោះការតាក់តែងវិញ្ញាសា គឺមិនខុសពីការប្រឡងប្រជែងជ្រើសរើសមន្ត្រីរាជការចំនួន ២ក្រសួងកន្លងទៅនោះទេ ពោលគឺត្រូវតាក់តែងភ្លាមៗ នៅថ្ងៃប្រឡងតែម្ដង។ «វិញ្ញាសានេះ គឺមានលោកគ្រូឧទ្ទេសចំនួន ៣ ដែលមានជំនាញច្បាស់លាស់ទៅលើអ្វី ដែលជាចំណុចទាំងអស់នេះ មកពីខាងអង្គភាពប្រឆាំងអំពើពុករលួយ ដែលគាត់បានមកជួបជុំគ្នាតាំងពីព្រឹក បានចាប់ផ្ដើមតាក់តែងវិញ្ញាសានៅក្នុងពេលតែមួយ»។ នេះជាការបញ្ជាក់បន្ថែមរបស់ឯកឧត្ដម ហ៊ុន ម៉ានី។

ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ក៏បានឲ្យដឹងដែរថា នៅថ្ងៃទី ៤ ខែមីនា ឆ្នាំ ២០២៤ ក៏នឹងមានការរៀបចំការប្រឡងប្រជែងជ្រើសរើសមន្ត្រីរាជការស៊ីវិល ចូលបម្រើការងារក្នុងក្របខណ្ឌក្រសួងសាធារណការ និងដឹកជញ្ជូនចំនួន ៩៩នាក់ ហើយនៅថ្ងៃទី ៥ ខែមីនា ឆ្នាំ ២០២៤ខាងមុខ ក៏នឹងមានការរៀបចំការប្រឡងប្រជែងជ្រើសរើសមន្ត្រីរាជការស៊ីវិល ចូលបម្រើការងារក្នុងក្របខណ្ឌក្រសួងកសិកម្ម រុក្ខាប្រមាញ់ និងនេសាទចំនួន ៥២នាក់ ផងដែរ៕